Vosavakaibalebale 24 - Vakavakadewa Makawa

¹ Mo kakua ni vuvutaki ira na tamata ca, Kakua talega ni ko via tiko vata kei ira:

² Ni sa vakanananu na lomadra ki nai valavala kaukauwa, Ka sa vosataka na ca na tebenigusudra.

³ Na vuku ga sa tara rawa kina na vale, Kei na yalomatua sa vakataudeitaki kina:

⁴ Kei na kila ka ena oso kina na kena veiloqi E nai yaya kecega sa talei ka vinaka.

⁵ Sa kaukauwa na tamata vuku; Ia na tamata daukila ka sa vakaikuritaka na kaukauwa:

⁶ Ni ko sa bosea vakavuku ko na qai ia rawa kina na nomu i valu: Ka sa rawa na tiko vinaka ni ra lewe vuqa na daubose.

⁷ Sa cecere na vuku vua na lialia: Sa sega ni vosa rawa e na matamata-ni-koro.

⁸ O koya sa dauvakananuma me caka ca Ena vakatokai me vuni ca.

⁹ Na nanuma ni lomana na lialia nai valavala ca: Ka sa ka vakasisila vei ira na tamata na dauveivakalialiai.

¹⁰ Kevaka ko sa gu ca e na siga ni rarawa, Sa lailai na nomu kaukauwa.

¹¹ Kevaka ko sa sega ni vakabulai ira era sa yarataki me mate, Kei ira era sa voleka me ra moku;

¹² Kevaka ko kaya, Raica, keitou a sega ni kila; Sa sega li ni nanuma kina ko koya sa dikeva na yalo? Sa sega beka ni kila ko koya sa maroroya na yalomu? Ka na sega beka ni sauma ko koya na tamata yadua me vaka na nona cakacaka?

¹³ Na luvequ, mo kania na oni, ni sa ka vinaka; Kei na qa ni oni, ni sa kamikamica ki na gusumu:

¹⁴ Ena vakakina na kila vuku ki na yalomu: Ni ko sa qai kunea, ena dua kina na kenai sau, Ia na ka ko nuitaka ena sega ni muduki tani.

¹⁵ Ko iko, na tamata ca, kakua ni ko lawavaka na nonai tikotiko na yalododonu; Kakua ni vakacacana na nona lomanibai:

¹⁶ Ni sa bale vakavitu na tamata yalododonu, ia sa na tu cake tale: Ia ko ira na tamata ca era na vukici sara e na ka ca.

¹⁷ Ni sa bale na nomu meca kakua ni ko reki kina, Ia ni sa tidara me kakua ni marau na yalomu;

¹⁸ De sa kunea ko Jiova, ka sa ca vua, Ka sa vakasuka tani vua na nona cudru.

¹⁹ Kakua ni ko rarawa e na vukudra na tamata ca; Mo kakua talega ni vuvutaki ira na tamata ca;

²⁰ Ni na sega na kenai sau vinaka vua na tamata ca; A nodra cina na tamata ca ena bokoci.

²¹ Na luvequ, mo rerevaki Jiova kei na tui: Kakua ni veiriti kei ira era dauveivukiyaki:

²² Ni na yaco vakidacala na nodra ca; Ia nai valavala ni dui nodra rusa kecega ko cei me kila?

²³ A ka talega oqo sa nodra na vuku. Sa sega ni vinaka me vinakati ira loa na tamata ni ia na veilewai.

²⁴ O koya ka kaya vua na tamata ca, Ko iko ko sa dodonu; Ena cati koya ko ira na tamata, ka ra na vakasisilataki koya ko ira na lewe ni veivanua:

²⁵ Ia ko ira era vunauci koya ena nodra kina na reki, Ena yacovi ira talega na vosaveivakalougatataki vinaka.

²⁶ Ena reguci na tebenigusu i koya Sa vosa vakadodonu yani.

²⁷ Mo vakarautaka mai bili na nomu cakacaka, Ka vakarautaka mai veikau me yaga vei iko; Ka oti, mo qai tara na nomu vale.

²⁸ Mo kakua ni beitaki koya wale na kai nomu; Kakua talega ni ko ia na veivakacalai e na tebenigusumu:

²⁹ Kakua ni ko kaya, Me vaka na nonai valavala vei au, ka'u na kitaka vakakina vua; Ka'u na sauma vua na tamata ko ya me vaka na nona cakacaka.

³⁰ Au a lako voli yani ki nona were na vucesa, Kei na nona were-ni-vaini na tamata sa sega ni vakayalo;

³¹ Ka raica, sa robota sara na wa-votovotoa, Ka sa ubi na delana e na kau karokaroa, A kena bai vatu talega sa kabasu.

³² Au a qai raica, ka vakasama vakavinaka: Au a vakaraica, ka'u sa vakavulici kina.

³³ Me vakalailai tale na moce, ka vakalailai na sosovu, Ka vakalailai na roqoveinu me moce:

³⁴ Ia na nomu dravudravua ena qai lako mai me vaka e dua sa lako tu; Kei na nomu viakana, me vaka na tamata i valu.