Vosavakaibalebale 22 - Vakavakadewa Makawa

¹ A ka me digitaki na rogo vinaka, ia nai yau levu e segai; A ka me digitaki na loloma, na siliva kei na koula e segai,

² Na vutuniyau kei na dravudravua era soqoni vata: Sa buli ira kecega ko Jiova.

³ O koya sa yalomatua sa kunea na ca, ka sa vunitaki koya: Ia ko ira sa sega ni vuku era sa lako tu yani, a ra sa kunea na rarawa.

⁴ A kenai sau ni yalomalumalumu kei na rerevaki Jiova Nai yau, kei na vakarokoroko, kei na bula.

⁵ A kau karokaroa, kei nai cori sa no e nona sala na yaloveve: Ko koya sa qarauna na yalona ena yawa kina.

⁶ Vakatavulica na gone e na sala e dodonu me lako kina: Ia ni sa qase mai, ena sega ni lako tani maikina.

⁷ O koya sa vutuniyau sa lewai ira na dravudravua, A sa veiqaravi ko koya sa kere ka vua sa soli ka vua.

⁸ O koya sa kaburaka nai valavala ca ena tamusuka na ca: Nai titoko talega ni nona cudru ena yali.

⁹ O koya sa mata lomasoli ena kalougata; Ni sa solia na nona madrai me kedra na dravudravua.

¹⁰ Vakasevei koya tani na dauveivakalialiai, ena lako tani kina na veileti; Io, ena mudu na veileti kei na veibeitaki.

¹¹ O koya sa vinakata ni yalosavasava Ka vosa vakayalololoma, ena veiwekani kaya na tui.

¹² A mata i Jiova sa maroroya na lomavuku, A sa vukica ko koya na nona vosa nai valavala ca.

¹³ Sa kaya na yalovucesa, A laioni ka tiko mai tautuba, Ka'u na vakamatei e na saqata.

¹⁴ Sai keli titobu na gusudra na yalewa i valavala ca: O koya sa cata ko Jiova ena lutu kina.

¹⁵ A ka lialia sa vauci e lomana na gone; A kuita ni veivakatavulici ena vakaseva tani vua.

¹⁶ O koya sa vakasaurarataka na dravudravua me levu kina na nonai yau, Kei koya talega sa dausoli ka vua na vutuniyau, ena dravudravua ga.

¹⁷ Mo vakalakala daligamu, mo rogoca na nodra vosa na vuku, Ka vagolea na lomamu ki nai vakavuvuli:

¹⁸ Ni sa ka vinaka kevaka ko vakabauta e lomamu; Ena rauta talega na tebenigusumu.

¹⁹ Mo vakararavi kina vei Jiova, Ka'u sa vakatakila kina vei iko e na siga edaidai, io vei iko.

²⁰ Au sa sega beka ni vola oti vei iko na ka talei, E nai vakavuvuli kei na vuku, ne?

²¹ Me'u vakatakila kina vei iko na kena dinadina ni vakavuvuli dina; Mo tukuna rawa nai vakavuvuli dina vei ira era sa talaki vei iko?

²² Mo kakua ni butakoca na nona ka na dravudravua, e na vuku ni sa dravudravua: Kakua talega ni vakasaurarataki koya sa malumalumu mai na matamata-ni-koro:

²³ Ni na totaki ira ko Jiova, Ka vakacacana na yalo ni tamata era vakacacani ira.

²⁴ Mo kakua ni veiwekani kei na tamata daucudru; Kakua talega ni ko lako vata kaya na tamata yalodauveikata:

²⁵ De ko vulica na nonai valavala, Ka qai tacori kina na yalomu.

²⁶ Mo kakua ni dua vei ira era veitauri liga, Se dua vei ira era veiyalayalati wale e na ka e dinautaki:

²⁷ Kevaka sa sega vei iko na kenai voli, Me kauta vakacava ko koya na nomu i mocemoce ko sa daudavo kina?

²⁸ Mo kakua ni kisira tani nai yalayala makawa ni vanua, O koya era lesia ko ira na nomu qase eliu.

²⁹ Ko sa kunea li e dua na tamata daugumatua e na nona cakacaka? ena tu ko koya e matadra na tui; Ena sega ni tu e matadra na tamata wale.