Vosavakaibalebale 20 - Vakavakadewa Makawa

¹ A dauveivakalialiai na waini, a daucudru na yaqona: Ia ko ira kece era vakacalai kina era sa sega ni vuku.

² Sa vaka na tagi ni laioni na cudru ni tui: Ko koya sa vakacudrui koya sa caka ca ki na yalona dina.

³ Sa ka ena dokai kina na tamata ni sa cegu mai na veileti: Ia na yalolialia era na dui via kauwai kina.

⁴ Ni sa liliwa, ena sega ni via cuki were na vucesa; O koya ena vosai kena e na vula i katakata, ka na sega ga.

⁵ Sa wai titobu na lewa e na loma ni tamata; Ia na tamata vuku ena takiva mai.

⁶ Era lewe vuqa na tamata era na dui tukuna yadua na nodra yalovinaka: Ia ko cei me kunea rawa e dua na tamata lomadina.

⁷ Sa muria na nona yalodina na yalododonu: Era sa kalougata na luvena era taravi koya.

⁸ A tui sa tiko e nai tikotiko ni veilewai Sa vakaseva tani e na matana na ka ca kecega.

⁹ O cei me kaya rawa, Au sa vakasavasavataka na yaloqu, Au sa savasava mai na noqu i valavala ca?

¹⁰ Ai vakabibi lasu, kei nai vakarau lasu, Sa cata sara ruarua ko Jiova.

¹¹ Ia na gone sa kilai e na nonai valavala, Se savasava ka dodonu na nona cakacaka, se segai.

¹² A daliga rogo, kei na mata rai, Sa bulia ruarua ko Jiova.

¹³ Kakua ni ko vinakata na moce, de ko dravudravua mai; Me yadra mada na matamu, ko na qai vakamamautaki e na kakana.

¹⁴ Sa ka ca, sa ka ca, e kaya ko koya sa via volia: Ia ni sa lako tani yani, sa qai vakacaucautaka.

¹⁵ Sa tu na koula, kei na rupi e vuqa; Ia sa ka talei duaduaga na tebenigusu vuku.

¹⁶ Mo kauta na nonai sulu sa ia na veiyalayalati e na vuku ni kai tani: Ka mo kauta na nonai vakadinadina e na vukuna na yalewa tani.

¹⁷ Sa kamikamica vua na tamata na kakana ni lasu; Ia emuri ena sinai na gusuna e na laqere.

¹⁸ A ka e nakiti sa vakataudeitaki e na bose: Ia ni sa lewai vinaka mada, mo qai ia nai valu.

¹⁹ O koya sa lako voli ka daukakase sa tukuna na ka e tabu ni tukuni: Ia mo kakua kina ni veiriti kaya sa vosaveicavilaki.

²⁰ O koya sa rukaki tamana se tinana, Ena bokoci na nona cina me butobuto loaloa sara.

²¹ Ai yau sa na taukeni vakusarawa beka e nai vakatekivu; Ia na kenai otioti ena sega ni kalougata.

²² Mo kakua ni kaya, Au na sauma na ca; Mo waraki Jiova ga, ka na vakabulai iko.

²³ A ka ca sara vei Jiova nai vakabibi lasu: Ia nai vakarau ni bibi lasu sa sega ni vinaka.

²⁴ Sa vu maivei Jiova na nonai lakolako na tamata; Ia mo qai kila vakaevei na tamata na nona sala?

²⁵ Sa tacori na tamata ni sa kania na ka tabu, Ni bubului oti, ka qai taroga emuri.

²⁶ A tui vuku sa vakasevi ira na tamata ca, Ka butuki ira e ruku ni yava ni qiqi ni sila.

²⁷ Na yalo ni tamata sa cina i Jiova, Sa cinava na tikina kece e lomana.

²⁸ A yalololoma kei na yalodina nai vakabula ni tui: Ia nai tutu ni nonai tikotiko vakaturaga na yalololoma.

²⁹ Sa nodra ka ni lagilagi na cauravou ni ra sa kaukauwa: Kei na nodra i ukuuku na qase na ulu sika.

³⁰ A vue e loaloa nai sava ni ca, Ia na kuita sa kenai sava ni loma ni tamata.