Vosavakaibalebale 2 - Vakavakadewa Makawa

Sa yalataka na lotu dina ko Vuku vei ira na luvena, 1-9, kei na tiko vinaka, kei na lako vakadodonu, ni sa tawase tani mai na ka ca, 10-22.

¹ Na luvequ, kevaka ko na vakabauta na noqu vosa, Ka vunia na noqu vunau me nomu;

² Mo vakatu daligamu kina ki na vuku, Ka vagolea sara na lomamu ki na yalomatua;

³ Io, kevaka ko tagica na lomavuku, Ka tabalaka na domomu mo kila ka;

⁴ Kevaka ko qara me vaka ko sa qara na siliva, Ka vakasaqara me vaka sai yau vuni;

⁵ Ko na qai kila na rerevaki Jiova, Ka kunea na Kalou mo kilai koya.

⁶ Ni sa solia na vuku ko Jiova: Sa lako mai na gusuna na kila ka kei na yalomatua:

⁷ Sa binia na vuku dina me nodra na yalododonu: Ai sasabai ko koya vei ira era sa lako vakadodonu;

⁸ Sa vakatawa ko koya na nodra i lakolako na caka dodonu, Sa maroroya na nodra sala na yalosavasava:

⁹ Ko na qai kila nai valavala dodonu, kei na lewa, Kei na cakacaka dodonu; io, na sala vinaka kecega.

¹⁰ Ni na qai curuma na lomamu na vuku, Ka sa kamikamica mai ki na yalomu na daukila ka;

¹¹ Ena qai maroroi iko na lomavuku, Ka vakatawai iko na yalomatua:

¹² Me vakabulai iko mai na sala ni tamata ca, Mai na tamata sa vosataka na ka veve:

¹³ Ko ira era sa biuta na sala dodonu, Me ra muria na sala butobuto;

¹⁴ Era reki ni ra kitaka na ka ca, Ka marautaka nai valavala veve ni tamata ca;

¹⁵ Sa tatakelokelo na nodra sala, A ra sa vakavevetaka na nodra i lakolako:

¹⁶ Me vakabulai iko mai na yalewa dua tani, Io mai vua na kai tani sa vosaveicavilaki:

¹⁷ Ko koya sa biuti koya ka dautubera voli ni sa goneyalewa, A sa guilecava na nona veiyalayalati kaya na nona Kalou.

¹⁸ Ni sa qara ki na mate na nona vale, Kei na nonai lakolako ki nai bulubulu.

¹⁹ Sa sega e dua sa lako vua me tale mai, Se butuka tale na sala ni bula.

²⁰ Mo muria na nodra sala na tamata vinaka, Ka vakabauta na nodra sala na yalododonu.

²¹ Ni ra na tiko ga e na vanua na yalododonu, Ka ra na tiko dei kina na yalodina.

²² Ia ko ira na tamata ca era na muduki tani e vuravura, Kei ira na dautalaidredre era na cavu laivi maikina.