Vosavakaibalebale 18 - Vakavakadewa Makawa

¹ Ni sa tawasei koya tani na tamata, sa qara na ka e domona, A sa veivorati kei na vuku kece.

² Sa sega ni reki ni vuli vuku na lialia, Sa reki ga ni tukuna na lomana.

³ Ni sa lako mai na tamata ca, sa lako talega mai na veibeci, A veivakamaduataki talega kei na veivakalialiai.

⁴ Na vosa ni gusu ni tamata sa vaka na wai titobu, Kei nai vurevure ni vuku sa vaka na uciwai drodro.

⁵ Sa sega ni vinaka na vinakata na tamata ca, Me vukica kina na yalododonu ni sa lewai.

⁶ A tebenigusu ni tamata lialia sa goleva na veileti, Ia na gusuna, sa kere kuita.

⁷ Na gusu ni tamata lialia sa rusa kina ko koya, Kei na tebenigusuna sai cori ni yalona.

⁸ A vosa ni daukakase sa vaka na vue, Ka sa lau ki na vu ni loma ni tamata.

⁹ O koya talega e gu ca e na nona cakacaka, Sa rau veitacini kei koya na dauvakacaca.

¹⁰ Na yaca i Jiova sa vale-cecere kaukauwa: Sa dro kina na yalododonu, ka sa bula.

¹¹ Ai yau ni tamata vutuniyau sa nona koro kaukauwa, Ka sa vakasama ko koya ni sa vaka na bai cecere.

¹² Sa liu e na loma ni tamata na viavialevu, a sa qai tarava na rusa; Ka sa liu na yalomalumalumu a sa muri na vakarokorokotaki.

¹³ O koya sa vosa e na ka ni sa bera ni rogoca, Sa ka lialia vua ka sa ka me madua kina.

¹⁴ A yalo ni tamata sa vosota rawa ni sa tauvi mate; Ia na yalo sa mavoa ko cei sa vosota rawa?

¹⁵ A loma ni tamata yalomatua sa rawata na vuku; Kei na daligana na yalovuku sa gu ni kila ka.

¹⁶ A nonai solisoli na tamata sa vakararawataki koya, Ka sa kauti koya ki na matadra na tamata turaga.

¹⁷ Ko koya sa tukuna taumada na nona ka e veiletitaki sa rairai dodonu ga; Ia sa tarava mai na kai nona ka vakatarogi koya.

¹⁸ Sa tinia na veileti na vakawiri madigi, Ka sa lewa rawa vei rau na kaukauwa.

¹⁹ Na veitacini erau veimecaki sa dredre, ka rawarawa na koro kaukauwa: Ia na nodrau veileti sa vaka nai sogo ni vale kaukauwa.

²⁰ E na vua ni gusuna sa na mamau kina na kete ni tamata; Ena vakamamautaki talega e na ka e tubu mai na tebenigusuna.

²¹ A mate kei na bula sa rawa e na yame ni tamata: Ia ko koya sa vinakata sa na kania na vuana.

²² O koya sa kunea e dua me watina sa kunea na ka vinaka, Ka sa rawata na loloma maivei Jiova.

²³ Sa ia na vakamamasu na tamata dravudravua; Ia na vutuniyau sa vosa vakaukauwa ga.

²⁴ A tamata sa vakaveiwekani tiko kei na lewe vuqa sa vakaveiwekani kei na rusa: Ia sa dua na weka da sa veikabiti dina sara ka sa sega ni vakakina na veitacini.