Vosavakaibalebale 16 - Vakavakadewa Makawa

¹ Sa nei koya na tamata me vakarautaka na lomana; Ia sa vu maivei Jiova na vosa me kaya mai.

² A nonai valavala kecega na tamata sa savasava e matana; Ia sa vakatovolea na yalo ko Jiova.

³ Mo vakalaiva vei Jiova na nomu cakacaka, Ena vakataudeitaki kina na nanuma ni lomamu.

⁴ Sa cakava na ka kecega ko Jiova me nona: Io, na tamata ca talega ki na siga ca.

⁵ Sa ka vakasisila vei Jiova ko ira yadua sa viavialevu: Ke ra veitauri liga era na sega ni dro bula rawa mai na cudruvi.

⁶ E na yalololoma kei na dina sa sava tani kina na caka cala: Ia e na rerevaki Jiova ga sa ra dro tani kina na tamata mai na ca.

⁷ Ni sa vinaka vei Jiova nai valavala ni tamata, Sa lewai ira na nona meca me ra veivinakati kaya.

⁸ Sa vinaka na ka lailai kei na yalododonu, Ka ca nai yau levu ni sa yali nai valavala dodonu.

⁹ A loma ni tamata sa vakananuma na nona sala: Ia ko Jiova ga sa lewa na nonai lakolako.

¹⁰ A vosa vakaturaga sa tu e na gusuna na tui: Ni sa lewa sa sega ni cala na gusuna.

¹¹ A vatu ni bibi kei nai vakarau ni bibi e dodonu sa nei Jiova: Sa nona cakacaka na vatu bibi kecega e na taga.

¹² A ka era vakasisila kina na tui ni ra sai valavala ca: Ni sa vakataudeitaki nai tikotiko vakaturaga e na cakacaka dodonu ga.

¹³ A ka era sa vinakata ko ira na tui na tebenigusu sa vosa vakadodonu; Ka ra sa lomani koya sa vosa vakadodonu ga.

¹⁴ A cudru ni tui sa vakataki ira nai talaki ni mate: Ia na tamata vuku ena vakamalumalumutaka.

¹⁵ E na rarama ni matana na tui sa tu na bula; Kei na nona yalovinaka sa vaka na o ni uca taumuri.

¹⁶ Na kena vinaka me rawata na vuku, ka ca me rawata na koula! Kei na rawata na yalomatua sa ka me digitaki, ia na rawata na siliva e sega ni vakakina.

¹⁷ Sa nona salatu na yalododonu me lako tani mai na ca: Sa maroroya na yalona ko koya sa raica vinaka na nona sala.

¹⁸ Sa liu na viavialevu, ia sa muri na rusa, A sa liu na yaloviavialevu ia sa muri na bale.

¹⁹ E vinaka me tiko na yalomalumalumu kei ira na yalomalua, Ka ca ni vakaivotavota vata kei ira na viavialevu e nai toki ni valu.

²⁰ O koya sa lewa vakavinaka na ka, ena kune ka vinaka: Kei koya sa vakararavi vei Jiova, sa na kalougata ga.

²¹ O koya sa lomavuku ena vakatokai me yalomatua: Ia ni sa kamikamica na tebenigusu, sa na tubu kina na ka e vakavulici.

²² Sai vurevure ni wai bula na yalovuku vua sa taukena: Ia na nodra i vakavuvuli na lialia sa ka lialia ga.

²³ A lomana na vuku sa vakavukuya na gusuna, Ka sa kuria nai vakavuvuli ni tebenigusuna.

²⁴ A vosa vinaka sa vaka na qa ni oni, Sa ka kamikamica ki na yalo, ka sa bula kina na sui.

²⁵ Sa dua na sala sa rairai dodonu vua na tamata, Ia na kenai otioti na sala ga ni mate.

²⁶ O koya sa cakacaka sa cakacaka e na vukuna ga; Ni sa garova na ka vua na gusuna.

²⁷ O koya sa yaloca sa daukelia na ca: Ka sa vaka e tu e na tebenigusuna na bukawaqa.

²⁸ A tamata yalovakatani sa kaburaka na veileti: Kei koya na daukakase sa tawasei ira era veiwekani dina.

²⁹ A tamata i valavala kaukauwa sa vecea na kai nona. Ka sa tubera e na sala e sega ni vinaka:

³⁰ Sa bobo mada na matana me vakasama na ka vakatani: Ni sa yavala na tebenigusuna sa vakayacora na ca.

³¹ Ai sala vakaiukuuku na ulu sika, Ni sa kune e na sala ni valavala dodonu.

³² Sa vinaka cake ko koya sa berabera ni cudru ka ca na tamata qaqa; Ko koya talega sa lewa na yalona vei koya sa kaba e dua na koro.

³³ Sa ia na vakawiri madigi; Ia sa maivei Jiova duaduaga na kena lewa.