Vosavakaibalebale 15 - Vakavakadewa Makawa

¹ A vosa vakayalovinaka sai vakamalumu ni cudru: Ia na vosa vakararawa sa vakatubura na cudru.

² A yamena na vuku sa vakayagataka na ka era kila: Ia mai na gusudra na lialia sa tovure tu na ka lialia.

³ Sa tiko ga na mata i Jiova e na veiyasana kecega, Ka sa vakaraici ira tiko na ca kei ira na vinaka.

⁴ Sa kau ni bula na yame dauveivakabulai: Ia ni sa tu kina na ka vakatani, sa mavoa kina na yalo.

⁵ O koya sa lialia sa beca nai vakavuvuli i tamana: Ia ko koya sa vakabauta na vunau sa yalomatua.

⁶ Sa tu nai yau levu e na nona vale na yalododonu: Ia na nodra i yau nai valavala ca sa tu vata kei na rarawa.

⁷ A tebenigusudra na vuku sa kaburaka na vuku: Ia na lomadra na lialia sa sega ni vakakina.

⁸ Sa ka vakasisila vei Jiova na nodra i soro nai valavala ca: Ia na nodra masu na yalododonu sa vinakata ko koya.

⁹ Sa ka vakasisila vei Jiova na nonai valavala na tamata ca: Ia sa lomani koya sa muria na ka dodonu.

¹⁰ Ai vakavuvuli sa ka ca vua sa biuta na sala: Ko koya sa cata ni vunauci ena mate.

¹¹ Ko etesi kei na rusa sa tu ga e na mata i Jiova: Ena vaka talega kina ka vakalevu cake na lomadra na luve ni tamata?

¹² Na dauveivakalialiai sa sega ni vinakata ni vunauci: Ena sega talega ni via lako ko koya vei ira na vuku.

¹³ Ni sa marau na loma ni tamata, sa vinaka kina na matana: Ia ni sa rarawa na loma na, sa ramusu kina na yalo na.

¹⁴ Na lomana na yalomatua sa gu tiko me vuku: Ia na gusudra na lialia sa kania na ka lialia.

¹⁵ Sa ka ca na nodra siga kecega era rarawa tiko: Ia ko koya sa reki na lomana, sa kana magiti tikoga.

¹⁶ Sa vinaka na ka lailai sa tu vata kei na rerevaki Jiova, Ka ca nai yau levu sa tu vata kei na rarawa.

¹⁷ Sa vinaka me da kana rourou ka veilomani ga, Ka ca me da kana pulumokau uro ka veicati tiko.

¹⁸ A tamata daucudru sa dauvakatubura na veileti: Ia ko koya sa berabera ni cudru sa tarova na veileti.

¹⁹ A nona sala na vucesa sa vaka na bai soni: Ia na nodra sala na yalododonu sa caramaki tu.

²⁰ A gone vuku sa marau kina ko tamana: Ia na tamata lialia sa beci tinana.

²¹ Sa kani marau na lialia vei koya sa sega ni vakayalo: Ia na tamata lomavuku sa vakadodonutaka na nonai lakolako.

²² Ni sa sega na bose, sa sega ni yaco na ka e nanumi: Ia ni ra sa lewe vuqa na daubose, sa vakataudeitaki.

²³ Sa na marau na tamata e na vuku ni vosa ni gusuna: Ia na kena vinaka na vosa e na gauna e yaga kina!

²⁴ A nona sala ni bula na vuku sa koto ki cake, Me lako tani kina ko koya mai eli sa koto ki ra.

²⁵ Ena vakarusa ga ko Jiova na nona vale na viavialevu: Ia ena vakataudeitaka nai yalayala ni nona vanua na yada.

²⁶ A ka vakasisila vei Jiova na ka era nanuma ko ira nai valavala ca: Ia sa vosa kamikamica na nodra vosa na yalosavasava.

²⁷ E dauvakararawataka na nona vale ko koya na daukocokoco; Ia ko koya sa cata nai solisoli ena bula.

²⁸ A lomana na yalododonu sa daunanuma na ka me kaya: Ia mai na gusudra na tamata ca sa tovure tu na ka ca.

²⁹ Sa yawa tiko ko Jiova vei ira nai valavala ca: Ia na nodra masu na yalododonu ena rogoca ko koya.

³⁰ A rarama ni mata sa marau kina na loma ni tamata: Ia nai rogorogo vinaka sa uro kina na sui na,

³¹ A daliga sa dauvakarogoca na vunau ni bula Sa na dautiko vata kei ira na vuku.

³² O koya sa bese ni vunauci sa cata na yalona: Ia ko koya sa vakarorogo ki na vunau ena lomavuku mai.

³³ A rerevaki Jiova sai vakavuvuli vuku; A sa muri na vakarokorokotaki ka liu na yalomalumalumu.