Vosavakaibalebale 13 - Vakavakadewa Makawa

¹ A gone vuku sa rogoca nai vakavuvuli i tamana: Ia ko koya na dauveivakalialiai sa sega ni rogoca ni sa vunauci.

² Ena kania na ka vinaka na tamata e na vua ni gusu na: Ia na yalodra na dautalaidredre ena kana ka ni valavala kaukauwa.

³ O koya sa qarauna na gusuna sa maroroya na nona bula: Ena rusa ga ko koya sa dalaga sara na tebenigusuna.

⁴ Sa garogaro na lomana na vucesa, ka sega na ka e rawata: Ia na lomana na dautara ka ena vakamamautaki.

⁵ Sa cata ni vosa lasu na yalododonu: Ia na tamata ca sa ka vakasisila, ka sa vakamaduataki

⁶ A nonai valavala dodonu na tamata dodonu sa maroroi koya e na sala: Ia na nona caka ca na tamata ca sa vukici koya.

⁷ E dua sa vakavutuniyautaki koya, ka sa sega na nona ka; Sa dua tani sa vakadravudravuataki koya, ka sa levu tu ga na nonai yau.

⁸ Sai voli ni nona bula na tamata na nonai yau; Ia sa sega ni vakarogoca ni sa vunauci, ko koya na dravudravua.

⁹ A nodra rarama na yalododonu sa reki: Ia na nodra cina na tamata ca ena bokoci ga.

¹⁰ A yaloviavialevu ga sa tubu kina na veileti: Ia ko ira sa vakavulici vinaka sa nodra ga na vuku.

¹¹ Ai yau sa rawa wale tu ena vakalailaitaki: Ia ko koya sa rawata e na dautara ka ena vakalevutaki.

¹² Ni vakaberaberataki na ka sa nuitaki tiko sa dau oca kina na yaloda: Ia sa kau ni bula ni sa rawa tu na ka e domoni.

¹³ O koya sa beca na vosa ena rusa: Ia ko koya sa rerevaka nai vakaro ena vakacegui kina.

¹⁴ A vunau ni tamata vuku sai vurevure ni bula Me lako tani kina mai nai cori ni mate.

¹⁵ A vuku dina sa vinakati kina na tamata: Ia na nodra sala na dautalaidredre sa sukusukura.

¹⁶ Ko ira kece na yaloqaseqase era dauivalavala vakavuku: Ia na lialia sa vakavotuya na nona lialia.

¹⁷ Ai talaki ca sa lutu ki na ca: Ia nai talaki lomadina sa ia na veivakabulai.

¹⁸ A dausiga kei na madua ena nona na tamata sa bese ni vakavulici: Ia ko koya sa muria na vunau ena dokai.

¹⁹ A ka e domoni ka sa rawa tu sa ka kamikamica ki na yalo da, Ia ko ira na lialia era sa cata sara na lesu tani mai na ca.

²⁰ Ena vuku mai ko koya sa malele vata kei ira na vuku: Ia ko koya era veitokani vata kei na lialia ena rusa.

²¹ A ka ca ga ena muri ira na tamata ca: Ia ena soli ga na ka vinaka vei ira na yalododonu.

²² A tamata vinaka sa tataunaka na ka me ra taukena ko ira na makubuna: Ka sa maninitaki me nona na yalododonu nai yau ni tamata i valavala ca.

²³ Sa levu na kakana e na nona cuki were na dravudravua: Ia sa so na ka sa vakacataki ni sa sega ni lewai vakadodonu.

²⁴ O koya sa sega ni vakanakuitataka na luvena sa cati koya: Ia ko koya sa lomani koya sa vakanakuitataka ni sa gone.

²⁵ Sa kana na yalododonu me mamau kina ko koya: Ia na ketedra na tamata ca ena viakana ga.