Vosavakaibalebale 11 - Vakavakadewa Makawa

¹ Ai vakarau lasu sa ka vakasisila vei Jiova: Ia nai vakabibi dodonu na ka e vinakata ko koya.

² Ni sa tubu mai na viavialevu, sa qai tubu talega na madua: Ia sa tu vei ira na yalomalumalumu na vuku.

³ A nodra lomadina na yalododonu ena tuberi ira: Ia na nodra yaloveve na talaidredre ena vakarusai ira.

⁴ Sa sega ni yaga nai yau e na siga ni cudru: Ia nai valavala dodonu sa ia na veivakabulai mai na mate.

⁵ A nona yalododonu na lomadina ena vakadodonutaki kina na nona sala: Ia na nona ca na tamata ca ena bale kina ko koya.

⁶ A nodra caka dodonu na yalododonu na ka era na vakabulai kina: Ia na nodra caka ca na tamata be era na rawai kina.

⁷ Ni sa mate na tamata ca sa yali na ka e nuitaka: Kei na ka era nuitaka ko ira sa sega ni yalododonu ena yali ga.

⁸ Sa dauvakabulai mai na ka rarawa na yalododonu, Ka sa yaco na tamata ca me kenai sosomi.

⁹ Na gusuna na dauveivakaisini sa ca kina na kai nona: Ia na nodra vuku na yalododonu, era sa vakabulai kina.

¹⁰ Sa reki na koro ni ra sa yaco ko ira na yalododonu: Ia ni ra sa rusa na tamata ca, sa ia na kaikaila.

¹¹ Ni ra sa ia na vosa ni veivakalougatataki na yalododonu, sa vue na totoka ni koro: Ia e na gusu ni tamata ca sa vukici kina.

¹² Sa beca na kai nona ko koya sa sega ni vuku: Ia na tamata yalomatua sa na tiko lo.

¹³ Ko koya sa lako voli ka daukakase sa tukuna tiko na ka e vuni tu: Ia ko koya sa yalodina e sega ni dautukuna na ka.

¹⁴ Ni sa sega na bose vuku, ena ca na tamata: Ia sa na yaco na tiko vinaka ni sa lewe vuqa na daubose.

¹⁵ Ena kune ka rarawa ko koya sa ia na veiyalayalati mei sosomi ni kai tani: Ia ko koya sa cata ni ia na veiyalayalati sa na yalodei.

¹⁶ Na yalewa yalovinaka sa rogo vinaka tiko: Kei na tagane kaukauwa era sa taura tiko nai yau.

¹⁷ A tamata yalololoma sa caka vinaka ki na yalona: Ia sa vakararawataka na yagona dina ko koya na lomaqa.

¹⁸ Na tamata ca sa daucakacaka vakailasu: Ia vei koya sa kaburaka nai valavala dodonu ena dua dina kina na kenai sau vinaka.

¹⁹ Me vaka sa rawa na bula e nai valavala dodonu: Sa vakakina ko koya sa cicimuria na ca, ena mate kina ko koya.

²⁰ Era ka vakasisila vei Jiova ko ira na yaloveve: Ia sa rekitaki ira sa dodonu na nodra i valavala.

²¹ Ke ra veitauri liga ko ira sai valavala ca, era na sega ni dro bula rawa kina: Ia na nodra kawa na yalododonu era na vakabulai.

²² Me vaka na mama koula e na ucu ni vuaka, Sa vakakina na yalewa matavinaka sa sega ni yalomatua.

²³ Sa ka vinaka duaduaga na ka era gadreva ko ira na yalododonu: Ia na ka era nuitaka ko ira nai valavala ca na cudru.

²⁴ Sa dua sa duibiubuita, ka sa tubu ga me levu; Sa dua talega sa maninitaka na ka ni sa sega ni dodonu, ka sa tubu ga kina na dravudravua.

²⁵ A daulomasoli ena vakamamautaki: Ia ko koya sa vagunuva na tani ena vagunuvi talega ko koya.

²⁶ O koya sa maninitaka na sila, era na rukaki koya na tamata: Ia na vosaveivakalougatataki ena tauca na ulu i koya sa volitaka.

²⁷ O koya sa gumatua ni caka vinaka ena kune loloma: Ia ko koya sa gu ni caka ca, ena yaco vua.

²⁸ O koya sa vakararavi e na nonai yau ena bale: Ia na yalododonu era na bulabula me vaka na taba ni kau.

²⁹ O koya sa vakararawataka na nona vale, sa na taukena na cagi: Ko koya talega sa lialia ena qaravi koya na lomavuku.

³⁰ A ka sa vuataka ko koya na yalododonu sa dua na kau ni bula, Ko koya talega sa rawa na yalo sa vuku.

³¹ Raica, ko ira na yalododonu era na saumi e vuravura: Ka na vakalevu cake ko koya na dautalaidredre kei nai valavala ca.