Vosavakaibalebale 10 - Vakavakadewa Makawa

¹ A vosa vakaibalebale i Solomoni. A gone vuku sa vu ni reki vei tamana: Ia na gone lialia sa vu ni rarawa vei tinana.

² Ai yau ni ca sa sega ni yaga: Ia na caka dodonu sa ka ni veivakabulai mai na mate.

³ Ko Jiova ena sega ni laiva na yalona na yalododonu me viakana: Ia sa biuta tani na nodra i yau na tamata ca.

⁴ Sa na dravudravua mai ko koya sa kuku ce: Ia ko koya sa kuku matua sa na vutuniyau kina.

⁵ Ko koya sa kumuna e na vula i katakata sa gone vuku: Ia ko koya sa daumoce e na vula i mago sa gone e veivakamaduataki.

⁶ A vosa ni veivakalougatataki sa na tau ki na uluna na yalododonu: Ia na gusudra na tamata ca ena tabonaki e nai valavala kaukauwa.

⁷ A kedrai nanumi na yalododonu sa ka ni veivakalougatataki: Ia na yacadra nai valavala ca ena rusa ga.

⁸ Ko koya sa lomavuku ena vakabauta na vunau: Ia na lialia dauvosa ena bale ga.

⁹ Ko koya sa lako vakadodonu sa lako doudou: Ia ko koya sa vakavevetaka na nonai lakolako ena kilai.

¹⁰ Ko koya sa katariva e na matana sa vakayaco ka rarawa: Ia na lialia dauvosa ena bale ga.

¹¹ A gusuna na yalododonu sa dua na mata-ni-wai bula: Ia na gusudra na tamata ca ena tabonaki e nai valavala kaukauwa.

¹² A veicati sa ka e tubu kina na veileti: Ia sa ubia nai valavala ca kecega na loloma.

¹³ E na tebenigusuna na yalomatua sa kune kina na vuku: Ia ena tau na kuita ki na dakuna na yalowai.

¹⁴ Era kuria tiko na vuku ko ira na yalomatua: Ia na gusuna na lialia sa volekata na rusa.

¹⁵ A nonai yau na vutuniyau sa nona koro kaukauwa: A nodra dravudravua na dravudravua sai koya era ca kina.

¹⁶ A nona cakacaka na yalododonu sa ka ni bula. A vu ni nona oca na tamata ca nai valavala ca.

¹⁷ Sa lakova na sala ni bula ko koya sa vakabauta nai vakavuvuli: Ia ko koya sa bese ni vunauci sa lako sese tiko.

¹⁸ Ko koya sa vunia na veicati e na tebenigusu lasu, Kei koya sa cavuta na kakase, erau sa tamata lialia.

¹⁹ Ni sa levu na vosa ena sega ni yali na ka ca: Ia ko koya sa tarova na tebenigusuna sa vuku.

²⁰ Na yamena na yalododonu sa siliva talei: Ia na lomadra na tamata ca sa sega so ni yaga.

²¹ Sa vakani ira na lewe vuqa na tebenigusu ni yalododonu: Ia ko ira na lialia era mate ga ni sa sega vei ira na vuku.

²² Na veivakalougatataki maivei Jiova sa ia na veivakavutuniyautaki, Ka sa sega ni kuria ko koya e na ka rarawa.

²³ Sa vaka na qito vua na lialia me kitaka na ka ca: Ia na tamata yalomatua sa taukena na vuku.

²⁴ Ena yaco ga vua na tamata ca na ka sa rerevaka ko koya: Ia ena soli vua na yalododonu na ka e gadreva.

²⁵ Ni sa lako tani yani na covulaca, sa qai yali vata talega na tamata ca: Ia sa nei koya na yalododonu na yavu e sega ni oti.

²⁶ Me vaka na wai wiwi ki na batida, kei na kubou ki na matada, Sa vakakina na vucesa vei ira sa talai koya.

²⁷ A rerevaki Jiova sa vakaikuritaki kina na siga: Ia na nodra gauna nai valavala ca ena vakalekalekataki.

²⁸ A ka era nuitaka na yalododonu era na rekitaka: Ia na ka era nuitaka nai valavala ca ena sega ni yaco.

²⁹ A sala i Jiova sa vu ni kaukauwa vei ira na yalododonu: Ia na rusa ga ena yaco vei ira na daucaka ca.

³⁰ Ena sega sara ni yavalati na yalododonu: Ia ko ira nai valavala ca era na sega ni vakatawai vuravura.

³¹ A gusuna na yalododonu sa dautubura na ka vuku: Ia na yame sa vosa vakatani ena seledruti laivi.

³² A tebenigusuna na yalododonu sa kila na ka e vinaka: Ia na gusudra nai valavala ca sa vosataka na ka vakatani.