Vei Taito 2 - Vakavakadewa Makawa

Sa vakavulici Taito ko koya e nai vakavuvuli kei nai valavala e dodonu, 1-8. Sa qai tukuna nai valavala e kilikili kei ira kecega era sa tamata lotu, 9-15.

¹ Ia ko iko, mo tukuna tiko na veika sa kilikili kei nai vakavuvuli dina:

² me ra yalomamakutu ko ira na qase, me ra yaloqaseqase, me ra yalomatua, me vinaka na nodra vakabauta, me ra lomasoli, me ra dauvosota.

³ O ira talega na yalewa qase, me ra dauia nai valavala sa kilikili kei ira era sa yalosavasava, me ra kakua ni dauveibeitaki vakailasu, me kakua ni daugunu waini, me ra dauvakatavulica na ka vinaka;

⁴ me ra vakayalomatuataki ira na yalewa era tamata bula, me ra lomani ira na watidra, me ra lomani ira na luvedra,

⁵ me ra lomavuku, me ra lomasavasava, me ra dautiko mai nodratou, me ra yalovinaka, me ra dautalairawarawa vei ira na watidra, me kakua kina ni vosavakacacataki na vosa ni Kalou.

⁶ Vakarota vei ira talega na cauravou me ra yalomatua.

⁷ Ia e na ka kecega mo sai vakarau e na cakacaka vinaka: me kakua ni cala na nomu i vakavuvuli, mo yaloqaseqase, mo yalosavasava;

⁸ mo vosa vakadodonu tiko oqori ena sega ni lewai me ca; me madua kina ko koya sa to tani, ni sa sega na ka ca me da beitaki kina.

⁹ Me ra talairawarawa vei ira na nodra turaga ko ira na tamata, me ra cakava na ka kecega sa vinaka vei ira; ka me ra kakua ni dauvosa tale:

¹⁰ ka me ra kakua sara ni butako, me ra vakatakilai ira ni ra sa lomadina, ka vinaka; me ra vakarogovinakataka nai vakavuvuli ni Kalou na nodai Vakabula e na ka kecega.

¹¹ Ni sa rairai na loloma ni Kalou, o koya sa vu ni bula vei ira kecega na tamata;

¹² a sa vakavulici keda, me da biuta nai valavala sa sega ni vakalotu, kei na gagadre ca vakavuravura, me da ia nai valavala yalomatua, ka yalododonu, ka vakalotu, e vuravura oqo;

¹³ ni da waraka na ka ni veivakalougatataki eda sa nuitaka, kei na nona rairai vakaiukuuku na Kalou levu na nodai Vakabula ko Jisu Karisito;

¹⁴ o koya ka soli koya e na vukuda, me voli keda mai nai valavala ca kecega, me vakasavasavataki keda vua me da nona tamata talei, ka lomakatakata e na cakacaka vinaka.

¹⁵ A veika oqo mo vosataka, ka vakarota, ka veivunauci vakabibi sara. Me kakua e dua me beci iko.