Vakatekivu 7 - Vakavakadewa Makawa

Sa vodo ki waqa ko Noa, kei na nona mataqali, kei na manumanu eso, ka ra bula, ni sa waluvu ko vuravura.

¹ A sa kaya vei Noa ko Jiova, Mo vodo ki na waqa, ko iko kei na nomu lewe-ni-vale kecega; ni'u sa raici iko ni ko sa yalododonu e mataqu e nai tabatamata oqo.

² Mo kauta vata kei iko na manumanu e yavai va sa savasava me yavitu, mai na mataqali kecega, na ka tagane kei na ka yalewa; kei na manumanu e yavai va sa sega ni savasava me yarua, mai na mataqali kecega, na ka tagane kei na ka yalewa;

³ a manumanu vuka talega me yavitu, mai na mataqali kecega, na tagane kei na yalewa; me vakabulai na kedra kawa e vuravura:

⁴ ni sa vo walega e vitu na bogi, ka'u na qai vakatauca tiko na uca ki na vuravura me vasagavulu na siga ka vasagavulu na bogi; ia ka'u na vakawabokotaka e vuravura na ka bula kecega ka'u a bulia.

⁵ A sa kitaka ko Noa me vaka na ka kecega sa vakarota vua ko Jiova.

⁶ A sa ono na drau na yabaki i Noa, ni sa luvuci vuravura na waluvu.

⁷ A sa vodoka na waqa ko Noa, kei iratou vata kaya na luvena tagane, kei na watina, kei na watidratou na luvena, e na vuku ni waluvu.

⁸ A manumanu e yavai va sa savasava, kei na manumanu e yavai va sa sega ni savasava, kei na manumanu vuka, kei na ka kecega sa qasi voli e vuravura, e na nodra mataqali kecega,

⁹ era sa vodo yarua ki na waqa kivei Noa, na ka tagane kei na ka yalewa, me vaka ka vakarota vei Noa na Kalou.

¹⁰ Ia sa bogi vitu, sa qai yaco na waluvu ki vuravura.

¹¹ E na kena i kaono na drau ni yabaki ni bula i Noa, e na kenai karua ni vula, e na kenai katinikavitu ni siga ni vula, io, e na siga dina ko ya, sa basuki kina nai vurevure kecega ni wai titobu, a sa tadola nai sogo kei lomalagi.

¹² A sa tau tiko na uca ki vuravura ka siga vasagavulu ka bogi vasagavulu.

¹³ E na siga dina ko ya sa vodoka na waqa ko Noa, kei Semi, kei Ame, kei Jefeca, na luve i Noa, kei na wati i Noa, kei na watidratou na luvena tolutolu.

¹⁴ Ko iratou, kei na manumanu sa sega ni lasa kecega e na kedra mataqali, kei na manumanu e yavai va kecega e na kedra mataqali, kei na ka kecega sa qasi voli e vuravura e na kedra mataqali, kei na manumanu vuka kecega e na kedra mataqali, io, na manumanu vuka e na kedra mataqali kecega.

¹⁵ A ra sa vakavodoki vei Noa ki waqa me yarua e na mataqali manumanu kecega, sa tiko kina nai cegu ni bula.

¹⁶ Ia ko ira era sa vakavodoki kina sa dua na ka tagane ka dua na ka yalewa, e na mataqali manumanu kecega, me vaka ka vakarota vua eliu na Kalou: a sa sogolati koya ki loma ni waqa ko Jiova.

¹⁷ A sa bogi vasagavulu na waluvu e dela i vuravura; a sa vakalevutaki tiko na wai, a sa nawa na waqa, ka sa toro cake e dela i vuravura:

¹⁸ a sa gumatua na wai, ka sa tubu vakalevu e dela i vuravura; ka sa ciri voli na waqa e dela ni wai.

¹⁹ A sa gumatua vakalevu sara na wai e dela i vuravura; a sa dromu na veiulu-ni-vanua cecere kecega sa tiko e ruku i lomalagi.

²⁰ Sa gumatua na wai; ka sa lako cake ka tinikalima na kiupiti, na kena dromu na veiulu-ni-vanua.

²¹ A sa mate na manumanu kecega sa bula voli e vuravura, io na manumanu vuka, kei na manumanu e yavai va, kei na manumanu e sega ni lasa, kei na ka kecega sa qasi voli e vuravura, kei na tamata kecega:

²² sa mate na ka kecega sa tiko e ucuna nai cegu ni bula, io na ka kecega sa tiko e na vanua mamaca.

²³ Io, sa kawa boko na ka bula kecega sa tiko e dela ni vanua, na tamata, kei na manumanu e yavai va, kei na ka sa qasi voli, kei na manumanu vuka, io, sa kawa boko laivi mai vuravura: a sa vo duaduaga ko Noa, kei ira era tiko vata kaya e waqa.

²⁴ A sa gumatua tiko na wai e vuravura, ka bogi dua na drau ka limasagavulu.