Vakatekivu 50 - Vakavakadewa Makawa

Era tagicaki Jekope, ka kauta ki Kenani me ra buluta, 1-14. Sa vakacegui ira na tuakana ko Josefa, ni ra sa rerevaki koya, 15-21. Ni sa vakarau mate ko Josefa, sa kaya me ra kauta na suina ki Kenani, 22-26.

¹ A sa mokota na tamana ko Josefa, ka tagicaka, ka reguca.

² A sa vakaroti ira na nona tamata era vuniwai ko Josefa, me ra vakasosoga na tamana e na ka boi vinaka: a ra sa vakasosogi Isireli ko ira na vuniwai.

³ A sa oti na kena bogi e vasagavulu; ni sa dau vakakina na nodra bogi era sa vakasosogi e na ka boi vinaka; a ra sa tagicaki koya na kai Ijipita, ka bogi vitusagavulu:

⁴ Ia ni sa oti na bogi era a tagicaki koya kina, sa qai vosa ko Josefa vei ira na lewe-ni-vale i Fero, ka kaya, Kevaka dou sa lomani au, dou vosa mada vei Fero, ka vaka,

⁵ Sa vakabubuluitaki au na tamaqu, ka vaka, Raica, ka'u na mate: mo buluti au e na noqu i bulubulu ka'u a kelia me noqu e na vanua mai Kenani. Oqo me'u lako cake kina me'u buluti tamaqu, ka'u na lesu tale mai.

⁶ A sa kaya ko Fero, Mo lako cake ka buluti tamamu, me vaka ka vakabubuluitaki iko kina.

⁷ A sa lako cake ko Josefa me buluti tamana: a ra sa lako vata kaya na tamata kecega i Fero, na qase e nona vale, kei ira kecega na qase e na vanua ko Ijipita,

⁸ kei ira kece na lewe-ni-vale i Josefa, kei ira na veitacini, kei na lewe-ni-vale i tamana: a nodra lalai ga, kei na nodra qele ni sipi, kei na nodra qele ni pulumokau, era sa biuta laivi e na vanua ko Koseni.

⁹ A ra sa lako cake kaya na qiqi-ni-tamata, kei ira sa vodo ose: a sa dua nai vavakoso levu sara.

¹⁰ A ra sa yacova na rara ni buturaki sila ka nei Atati, mai tai kadua ni Joritani, a ra sa tagi maikina e na tagi levu ka rarawa sara: a sa lewa ko koya me bogi vitu na nodra tagicaki na tamana.

¹¹ Ia ni ra sa raica ko ira na lewe ni vanua, na kai Kenani, na tagi mai na rara ni buturaki sila ka nei Atati, era sa kaya, Oqo sa dua na nodra tagi rarawa na kai Ijipita: o koya sa vakatokai kina na yacana ko Epeli-Misireimi, ko ya mai tai kadua mai Joritani.

¹² A ra sa kitaka vua ko ira na luvena me vaka ka vakarota vei ira ko koya:

¹³ a ra sa kauta ki na vanua ko Kenani, ka buluta e na qara-vatu e na tiki ni vanua ko Makipila, sa donui Mamire, ka volia ko Eparaama, kei na tiki ni vanua, me nonai bulubulu, vei Efironi, na Itaiti.

¹⁴ Ia ni sa buluti tamana, sa lesu ki Ijipita ko Josefa, ko koya, kei ira na veitacini, kei ira kecega era lako cake kaya ki na veibulu.

¹⁵ Ia ni ra sa raica na tuaka i Josefa sa mate na tamadra, era sa qai kaya, Ena cati keda beka ko Josefa, ka sauma sara na ka ca kecega eda a kitaka vua.

¹⁶ A ra sa tala e dua vei Josefa, me kaya, Ko koya na tamamu, ni sa bula tiko, sa vakarota, ka kaya,

¹⁷ Dou vosa vakaoqo vei Josefa, Au masuti iko, mo kakua mada ni sauma na nodra caka cala na tuakamu, kei na nodra i valavala ca; ni ra a caka ca vei iko: ia keitou sa qai masuti iko mo kakua ni sauma na neitou caka cala na tamata ni Kalou i tamamu. A sa tagi ko Josefa ni ra sa vosa vua.

¹⁸ A ra sa lako talega na tuakana, ka cuva vua; a ra sa kaya, Raica, koi keitou na nomuni tamata.

¹⁹ A sa kaya vei ira ko Josefa, Dou kakua ni rere: koi au li na Kalou?

²⁰ ia koi kemudou, dou a nanuma vakaca vei au; ia sa nakita na vinaka na Kalou, ka me vakayacora na veivakabulai ni tamata e lewe vuqa me vaka edaidai:

²¹ ia dou kakua ni rere: koi au, ka'u na vakani kemudou, kei ira na nomudou lalai. A sa vakacegui ira ka vosa vakayalololoma vei ira.

²² A sa tiko ga mai Ijipita ko Josefa, kei na mataqali i tamana; a sa bula ko Josefa ka dua na drau ka mani tini na yabaki.

²³ A sa raica na kawa i Ifireimi ko Josefa, ka yacova nai katolu ni tabatamata: a luve i Mekiri talega, na luve i Manasa, sa susuga ko Josefa.

²⁴ A sa kaya vei ira na veitacini ko Josefa, Koi au, ka'u sa mate: ia na Kalou, ena talevi kemudou vakaidina, ka kauti kemudou cake tani e na vanua oqo ki na vanua sa bubului kina ko koya kivei Eparaama, kei Aisake, kei Jekope.

²⁵ A sa vakabubuluitaki ira na luve i Isireli ko Josefa, ka kaya, Ena talevi kemudou vakaidina na Kalou, ia dou kauta cake tani eke na suiqu.

²⁶ A sa ciba ko Josefa, ni sa dua na drau ka tini na nona yabaki: a ra sa vakasosoga e na ka boi vinaka, ka kotora e loma ni dua na kato mai Ijipita.