Vakatekivu 5 - Vakavakadewa Makawa

Ai tukutuku ni nodra yabaki na qase ka yacova na waluvu, 1-32; ai tukutuku kei Inoki, 21-24.

¹ Oqo nai vola ni kawa i Atama. E na siga sa bulia kina na tamata na Kalou, sa buli koya me ucuya na Kalou;

² sa buli rau me dua na tagane ka dua na yalewa; a sa vosavakalougatataki rau, ka vakatoka na yacadrau na Tamata, e na siga sa buli rau kina.

³ A sa bula ko Atama ka dua na drau ka tolusagavulu na yabaki, a sa qai sucu e dua na luvena tagane a sa ucui koya ka sai tovo vata kaya, a sa vakayacani koya ko Seci;

⁴ ia ni sa sucu ko Seci, sa bula tiko ko Atama, ka walu na drau na yabaki: a sa sucu eso tale na luvena tagane kei na luvena yalewa:

⁵ ia na yabaki kecega ka bula kina ko Atama, sa ciwa na drau ka tolusagavulu na yabaki: a sa qai mate.

⁶ A sa bula ko Seci ka dua na drau ka lima na yabaki, a sa qai sucu na luvena ko Inosi:

⁷ ia ni sa sucu ko Inosi, sa bula tiko ko Seci, ka walu na drau ka vitu na yabaki, a sa sucu eso tale na luvena tagane kei na luvena yalewa:

⁸ ia na yabaki kecega ka bula kina ko Seci sa ciwa na drau ka tinikarua na yabaki: a sa qai mate.

⁹ A sa bula ko Inosi ka yabaki ciwasagavulu, a sa qai sucu na luvena ko Keinana:

¹⁰ ia ni sa sucu ko Keinana, sa bula tiko ko Inosi, ka yabaki walu na drau ka tinikalima, a sa sucu na luvena tagane kei na luvena yalewa:

¹¹ ia na yabaki kecega sa bula kina ko Inosi sa ciwa na drau ka lima na yabaki: a sa qai mate.

¹² A sa bula ko Keinana ka yabaki vitusagavulu, a sa qai sucu na luvena ko Meelelieli:

¹³ ia ni sa sucu ko Meelelieli, sa bula tiko ko Keinana, ka yabaki walu na drau ka vasagavulu, a sa sucu eso tale na luvena tagane kei na luvena yalewa:

¹⁴ ia na yabaki kecega sa bula kina ko Keinana sa ciwa na drau ka tini na yabaki: a sa qai mate.

¹⁵ A sa bula ko Meelelieli ka yabaki onosagavulu ka lima, a sa qai sucu ko Jereti na luvena:

¹⁶ ia ni sa sucu ko Jereti, sa bula tiko ko Meelelieli, ka yabaki walu na drau ka tolusagavulu, a sa sucu eso tale na luvena tagane kei na luvena yalewa:

¹⁷ ia na yabaki kecega sa bula kina ko Meelelieli sa walu na drau ka ciwasagavulu ka lima na yabaki: a sa qai mate.

¹⁸ A sa bula ko Jereti ka yabaki dua na drau ka onosagavulu ka rua, ka sa qai sucu ko Inoki na luvena:

¹⁹ ia ni sa sucu ko Inoki, sa bula tiko ko Jereti ka yabaki walu na drau, a sa sucu eso tale na luvena tagane kei na luvena yalewa:

²⁰ ia na yabaki kecega sa bula kina ko Jereti sa ciwa na drau ka onosagavulu ka rua na yabaki; a sa qai mate.

²¹ A sa bula ko Inoki ka yabaki onosagavulu ka lima, ka sa qai sucu ko Mecusela na luvena:

²² ka rau sa daulako vata kei na Kalou ko Inoki, ni sa sucu ko Mecusela, ka yabaki tolu na drau, a sa sucu eso tale na luvena tagane kei na luvena yalewa:

²³ ia na yabaki kecega sa bula kina ko Inoki sa tolu na drau ka onosagavulu ka lima na yabaki:

²⁴ ka rau sa daulako vata kei na Kalou ko Inoki: a sa yali eke: ka ni sa kauti koya tani na Kalou.

²⁵ A sa bula ko Mecusela ka dua na drau ka walusagavulu ka vitu na yabaki, a sa qai sucu ko Lemeki na luvena:

²⁶ ia ni sa sucu ko Lemeki, sa bula tiko ko Mecusela, ka yabaki vitu na drau ka walusagavulu ka rua, a sa sucu eso tale na luvena tagane kei na luvena yalewa:

²⁷ ia na yabaki kecega sa bula kina ko Mecusela sa ciwa na drau ka onosagavulu ka ciwa na yabaki: a sa qai mate.

²⁸ A sa bula ko Lemeki ka yabaki dua na drau ka walusagavulu ka rua, a sa sucu e dua na luvena tagane:

²⁹ a sa vakayacani koya ko Noa, ni sa kaya, O koya oqo ena vakalecataki keda e na noda oca kei na cakacaka ni ligada, e na vuku ni qele sa cudruva ko Jiova.

³⁰ Ia ni sa sucu ko Noa, sa bula tiko emuri ko Lemeki, ka lima na drau ka ciwasagavulu ka lima na yabaki, ka sa sucu eso tale na luvena tagane kei na luvena yalewa:

³¹ ia na yabaki kecega sa bula kina ko Lemeki sa vitu na drau ka vitusagavulu ka vitu na yabaki: a sa qai mate.

³² A sa lima na drau na yabaki i Noa, a sa sucu na luvena ko Semi, kei Ame, kei Jefeca.