Vakatekivu 47 - Vakavakadewa Makawa

Sa kauta eso na tuakana vei Fero ko Josefa, ka sa lomani ira ko Fero, 1-6. Sa qai kauti tamana vei Fero, 7-10. Sa vakatikori ira e na yasana vinaka ko Josefa, 11,12. A lewa i Josefa e na yabaki dausiga, 13-26. Sa malumalumu ko Jekope, 27-31.

¹ A sa lako ko Josefa ka tukuna vei Fero, ka kaya, Ko tamaqu, kei ira na veitacini, kei na nodra qele ni sipi, kei na nodra qele ni pulumokau, kei na nodra ka kecega, sa lako mai na vanua ko Kenani; ka ra sa tiko mai na vanua ko Koseni.

² A sa kauta e lewe lima vei ira na veitacini, me ratou tu e na mata i Fero.

³ A sa kaya ko Fero vei iratou na veitacini, A cava dou sa daukitaka? A ratou sa kaya vei Fero, a nomuni tamata sa dauvakana sipi, koi keitou, ko ira talega na neitou qase.

⁴ Eratou sa kaya talega vei Fero, Keitou sa lako mai me keitou tiko vulagi e na vanua oqo: ni sa sega na kedra na neitou sipi na nomuni tamata; ni sa ka levu na dausiga e na vanua ko Kenani: ia keitou sa kerekere me keitou tiko mada na nomuni tamata e na vanua ko Koseni.

⁵ A sa kaya vei Josefa ko Fero, Era sa lako mai vei iko na tamamu kei na veitacini:

⁶ sa tiko e matamu na vanua ko Ijipita: e na vanua vinaka mo vakatikora na tamamu kei na veitacini; me ra tiko e na yasana ko Koseni: ia kevaka ko sa kila eso vei ira e tamata gumatua, mo lesi iratou me ratou lewa na noqu manumanu.

⁷ A sa kauti Jekope na tamana ko Josefa, me tu e na mata i Fero: a sa vosavakalougatataki Fero ko Jekope.

⁸ A sa kaya vei Jekope ko Fero, E vica na yabaki ni nomu bula?

⁹ A sa kaya vei Fero ko Jekope, A yabaki ni noqu tiko vulagi voli sa dua na drau ka tolusagavulu na yabaki: sa vica ga ka ca na yabaki ni noqu bula, a sa sega ni yacova na yabaki ni nodra bula na noqu qase e na gauna ni nodra tiko vulagi.

¹⁰ A sa vosavakalougatataki Fero ko Jekope, ka lako tani e na mata i Fero.

¹¹ Ia sa vakatikora na tamana kei na veitacini ko Josefa, ka solia vei ira me rai taukei e na vanua ko Ijipita, io e na vanua ka vinaka cake, e na yasana ko Ramisese, me vaka ka vakarota ko Fero.

¹² A sa vakania na tamana kei na veitacini, kei na mataqali kecega i tamana, ko Josefa, e na kakana me rauta na nodra yavusa yadua.

¹³ A sa sega na kakana e na vanua taucoko ko ya: ni sa ka levu sara na dausiga, a sa malumalumu na vanua ko Ijipita kei na vanua ko Kenani, e na vuku ni dausiga.

¹⁴ A sa kumuna vata ko Josefa nai lavo kecega sa kune e na vanua ko Ijipita, kei na vanua ko Kenani, na kenai sau ni sila era volia: a sa kauta nai lavo ko Josefa ki na vale i Fero.

¹⁵ Ia ni sa oti nai lavo e na vanua ko Ijipita, kei na vanua ko Kenani, era sa qai lako kecega mai vei Josefa na kai Ijipita, ka ra kaya, Mo ni solia vei keimami na kakana: a cava me keimami mate kina e matamuni, ni sa qai oti nai lavo?

¹⁶ A sa kaya ko Josefa, Dou solia na nomudou manumanu; ia kau na solia vei kemudou me kenai sau ni nomudou manumanu ke sa oti nai lavo.

¹⁷ A ra sa kauta mai vei Josefa na nodra manumanu: a sa solia vei ira na kakana ko Josefa mei voli ni ose, kei na qele ni sipi, kei na qele ni pulumokau, kei na asa: a sa vakani ira e na kakana e na yabaki ko ya me kenai voli ni nodra manumanu kecega.

¹⁸ Ia ni sa oti na yabaki ko ya, era sa lako mai vei koya e na kenai karua ni yabaki, a ra sa kaya vua, Keimami na sega ni vunia vua na neimami turaga, ni sa oti na neimami lavo; a sa nona na neimami turaga na neimami qele ni manumanu; sa sega na ka sa vo e mata ni neimami turaga, a yago i keimami ga, kei na neimami vanua:

¹⁹ me keimami mate vakacava e matamuni, koi keimami, kei na neimami vanua? mo ni voli keimami kei na neimami vanua e na kakana, keimami na qai nona tamata ko Fero, ena nona talega na neimami vanua; ia mo ni solia na sila me keimami tea, me keimami bula, ka kua ni mate, ka me kakua ni lala na vanua.

²⁰ A sa volia ko Josefa na vanua taucoko ko Ijipita me nei Fero; ni ra sa volitaka na kai Ijipita na tamata yadua na nona were, ni sa ka levu tiko vei ira na dausiga: ka sa qai nei Fero na vanua.

²¹ Ia ko ira na tamata, sa tokitaki ira ko koya ki na veikoro, mai nai yalayala kei Ijipita e dua, ka yacova na kenai kadua.

²² A nodra vanua ga na bete sa sega ni volia ko koya; ni sa vota ko Fero e dua na kedrai votavota na bete, a ra sa kania tiko nai votavota ka vota vei ira ko Fero: o koya era sega ni volitaka kina na nodra vanua.

²³ A sa kaya vei ira na tamata ko Josefa, Raica, au sa voli kemudou edaidai, kei na nomudou vanua, me nei Fero: raica, au sa solia vei kemudou na sila me tei, dou na tea kina na vanua.

²⁴ Ia ni sa vua, dou na solia na kenai kalima vei Fero; ia ena nomudou e va, me tei kina na veiwere, me kemudou kakana talega, kei na kedra na nomudou lewe ni veivale, kei na kedra na nomudou lalai.

²⁵ A ra sa kaya, Ko ni sa qai vakabulai keimami: me keimami kune loloma mada e mata ni neimami turaga, keimami na qai tamata i Fero.

²⁶ A sa vakatura oqo ko Josefa me kenai lesilesi tiko e na vanua ko Ijipita, ka yacova na gauna oqo, ka me nei Fero na kenai kalima; ia na nodra vanua duaduaga na bete, sa sega ni yaco me nei Fero.

²⁷ A sa tiko ko Isireli e na vanua ko Ijipita, e na yasana ko Koseni; a ra sai taukei kina, ka ra tubu, ka lewe vuqa sara mai.

²⁸ A sa bula ko Jekope ka yabaki tinikavitu e na vanua ko Ijipita: ia na yabaki kecega sa bula kina ko Jekope sa dua na drau ka vasagavulu ka vitu na yabaki.

²⁹ A sa toro mai na gauna me mate kina ko Isireli: a sa kacivi Josefa na luvena, a sa kaya vua, Kevaka ka'u sa kune loloma e matamu, mo daramaka mada na ligamu ki ruku ni sagaqu, ka mo cakacaka vakayalololoma ka vakayalodina vei au; mo kakua mada ni buluti au e Ijipita:

³⁰ ia ni'u sa moce vata kei ira na noqu qase, mo kauti au tani e Ijipita, ka buluti au e na nodra i bulubulu. A sa kaya ko koya, Au na cakava me vaka na nomu vosa.

³¹ A sa kaya ko koya, Mo bubului kina vei au. A sa bubului kina vua. A sa cuva ko Isireli e na ulu ni mocemoce.