Vakatekivu 46 - Vakavakadewa Makawa

Sa vakacegui Jekope na Kalou, ka sa lako sobu ki Ijipita ko koya 1-7. A kawa i Isireli era sa lako ki Ijipita, 8-27. Sa la'ki veitata kei tamana ko Josefa; ka vakarautaki ira na veitacini me ra lako vei Fero, 28-34.

¹ A sa lako ko Isireli kei na nona kecega, ka yaco ki Pieri-sepa, a sa vakacabora nai soro vua na Kalou i Aisake na tamana.

² A sa vosa vei Isireli na Kalou, e na raivotu e na bogi, ka kaya, I Jekope, i Jekope! A sa kaya ko koya, Koi au saka oqo.

³ A sa kaya, Koi au na Kalou, na Kalou i tamamu: kakua ni ko rere ni lako sobu ki Ijipita; ni'u na vakamatanitulevutaki iko maikina.

⁴ Au na lako sobu kei iko ki Ijipita; ia ka'u na kauti iko cake tale vakaidina: ia ena tabaka na matamu ko Josefa e na ligana.

⁵ A sa cavu tu mai Pieri-sepa ko Jekope: ia ko ira na luve i Isireli, era sa kauti Jekope na tamadra, kei na nodra lalai, kei na watidra, e na veiqiqi-ni-tamata ka vakatala ko Fero me kauti koya.

⁶ A ra sa kauta na nodra manumanu, kei na nodra i yau, era a rawata e na vanua ko Kenani, a ra sa lako ki Ijipita, ko Jekope, kei ira kece vata kaya na nona kawa:

⁷ a luvena tagane, kei na makubuna tagane; na luvena yalewa, kei ira na makubuna yalewa, kei na nona kawa kecega, sa kauta vata kaya ki Ijipita.

⁸ Ia oqo na yacadra na luve i Isireli era sa lako ki Ijipita, ko Jekope kei na luvena: ko Rupeni, na ulumatua i Jekope.

⁹ Ia na luve i Rupeni eratou tagane; ko Enoke, kei Palu, kei Esironi, kei Kamai.

¹⁰ Ia na luve i Simioni eratou tagane; ko Jimueli, kei Jamini, kei Oati, kei Jakini, kei Soari, kei Saula, na luvena e dua na yalewa ni Kenani.

¹¹ Ia na luve i Livai eratou tagane; ko Kerisoni, ko Koaca, kei Mirari.

¹² Ia na luve i Juta eratou tagane; ko Eri, kei Onani, kei Sela, kei Feresi, kei Sera; ia ko Eri kei Onani erau a mate e na vanua ko Kenani: ia na luve i Feresi erau tagane; ko Esironi, kei Emuli.

¹³ Ia na luve i Isakari eratou tagane; ko Tola, kei Fuva, kei Jopi, kei Simironi.

¹⁴ Ia na luve i Sepuloni eratou tagane; ko Sereti, kei Eloni, kei Jalieli.

¹⁵ Ko ira na tagane oqo na luve i Lia, ka vakasucuma vei Jekope mai Petani-erama, kei Taina na luvena yalewa: ko ira vata na luvena tagane kei na luvena yalewa, era lewe tolusagavulu ka tolu.

¹⁶ Ia na luve i Kata eratou tagane; ko Sifioni, ko Aki, ko Suni, kei Esiponi, ko Eri, kei Eroti, kei Areli.

¹⁷ Ia na luve i Aseri eratou tagane; ko Imina, kei Isiva, kei Isivi, kei Piria, kei Sera na ganedratou: ia na luve i Piria erau tagane, ko Eperi, kei Malikieli.

¹⁸ Ko ira na tagane oqo na luve i Silipa, ko koya ka solia ko Lepani vei Lia na luvena yalewa: ia ko ira oqo sa vakasucuma ko koya vei Jekope, era lewe tinikaono.

¹⁹ Na luve i Rejeli, na wati i Jekope: ko Josefa kei Penijamini.

²⁰ Ia na luve i Josefa sa sucu e na vanua ko Ijipita, ko Manasa kei Ifireimi, koi rau ka vakasucuma ko Asenaca na luve i Poti-fera na bete mai Oni.

²¹ Ia na luve i Penijamini eratou tagane; ko Pela, kei Pekeri, kei Asipeli, ko Kira, kei Neamani, ko Ei, kei Rosi, ko Mupimi, kei Upimi, kei Ariti.

²² Ko ira na tagane oqo era luve i Rejeli, ko ira sa vakasucuma vei Jekope: a tamata kecega era lewe tinikava.

²³ Ia na luve i Tani ka tagane, ko Usimi.

²⁴ Ia na luve i Nafitalai eratou tagane; ko Jasieli, kei Kuni, kei Jeseri, kei Silemi.

²⁵ Ko ira na tagane oqo na luve i Pila, ko koya ka solia ko Lepani vei Rejeli na luvena yalewa; a sa vakasucumi ira oqo ko koya vei Jekope: ko iratou kecega era lewe vitu.

²⁶ Ko ira na tamata kecega ka lako vata kei Jekope ki Ijipita, ka ra taka maivua, era lewe onosagavulu ka ono, ia ka sa vo na watidra na luve i Jekope.

²⁷ Ia sa lewe rua na luve i Josefa, erau sa sucu mai Ijipita. Ko ira kece na tamata e na mataqali i Jekope era lako ki Ijipita, era lewe vitusagavulu.

²⁸ A sa talai Juta me liutaki koya vei Josefa, me kauti koya ki Koseni; a ra sa yaco ki na vanua ko Koseni.

²⁹ A sa vakarautaka na nona qiqi vakaturaga ko Josefa, ka lako cake me veitavaki kei Isireli na tamana, mai Koseni; a sa vakaraitaki koya vua: a sa mokota na domona, a sa tagi vakadede kina.

³⁰ A sa kaya vei Josefa ko Isireli, Me'u qai mate, ni'u sa raica tale na matamu, ka ni ko sa bula tiko.

³¹ A sa kaya ko Josefa vei ira na veitacini, kei na mataqali i tamana, Au na lako cake, ka tukuna vei Fero, ka kaya vua, Ko ira na veitacini, kei na mataqali i tamaqu, ka tiko mai na vanua ko Kenani, era sa lako mai vei au;

³² ka ra sai vakatawa ni sipi na tamata; ni ra sa tamata dauvakana manumanu; a ra sa kauta mai na nodra sipi kei na nodra pulumokau, kei na nodra ka kecega.

³³ Ia ni sa kacivi kemudou ko Fero, ka vaka, A cava dou sa daukitaka?

³⁴ dou qai kaya, Keitou na nomuni tamata keitou sa dauvakana manumanu, ni keitou a gone ka yacova na gauna oqo, koi keitou, ko ira talega na neitou qase: mo dou tiko kina mai na vanua ko Koseni; ni ra sa ka vakasisila vei ira na kai Ijipita na tamata kecega sa dauvakana sipi.