Vakatekivu 45 - Vakavakadewa Makawa

Sa vakatakilai koya vei ira na veitacini ko Josefa, ka veivosaki kei ira, 1-15. Era sa talai me kauti tamadra mai, kei na nodra lewe-ni-vale kecega, 16-24. A marau i Jekope ni sa rogo mai ko Josefa, 25-28.

¹ Sa qai sega ni kinoci koya rawa tiko ko Josefa e na matadra era tu vata kaya; a sa kaci, Me ra lako tani vei au ki tuba na tamata kecega. A sa sega e dua sa tiko vata kaya, ni sa tukuni koya ko Josefa vei ira na veitacini.

² A sa tabalaka na tagi ko koya: a ra sa rogoca na kai Ijipita, ka sa rogoca na lewe-ni-vale i Fero.

³ A sa kaya ko Josefa vei ira na veitacini, Koi au ko Josefa; Sa bula dina tiko ko tamaqu? A ra sa sega ni vosa rawa vua na tuakana; ni ra sa taqaya e matana.

⁴ A sa kaya vei ira na veitacini ko Josefa, Dou toro mada mai vei au. A ra sa toro vua: A sa kaya ko koya, koi au ko Josefa na tacimudou, ko koya dou a volitaka ki Ijipita:

⁵ ia oqo, mo dou kakua ni rarawa, se veicudruvi vakai kemudou, ni dou a volitaki au ki ke: ni sa talai au na Kalou me'u liutaki kemudou, me ia na veivakabulai:

⁶ ni sa qai yabaki rua, sa dausiga kina na vanua; a sa vo e lima na yabaki, ena sega kina na laulau se na tamusuki sila:

⁷ A sa talai au na Kalou me'u liutaki kemudou, me maroroi na nomudou kawa e vuravura, ka me vakabulai kemudou e na veivakabulai levu:

⁸ ia oqo, dou sa sega ni talai au mai ki ke, na Kalou ga: a sa qisi au ko koya me'u tama i Fero, ka me'u turaga vei ira kecega na nona lewe-ni-vale, ka lewa e na vanua taucoko ko Ijipita.

⁹ Dou kusarawa, ka lako cake vei tamaqu, ka kaya vua, Sa vosa vakaoqo ko Josefa na luvemu, Sa qisi au na Kalou me'u turaga mai Ijipita taucoko; mo lako sobu mai vei au, mo kakua ni berabera:

¹⁰ ia ko na tiko mai na vanua ko Koseni, mo voleka kina vei au, ko iko, kei ira na luvemu, kei na mokubumu, kei na nomu qele ni sipi, kei na nomu qele ni pulumokau, kei na nomu ka kecega:

¹¹ ka'u na vakani iko maikea, de ko dravudravua mai, kei na nomu lewe-ni-vale, kei na nomu ka kecega; ni sa vo e lima na yabaki ni dausiga.

¹² Ka raica, sa kunea na matamudou, kei na mata i Penijamini na taciqu, ni sa gusuqu ga sa vosa vei kemudou:

¹³ ia dou tukuna vua na tamaqu na noqu lagilagi kecega e Ijipita, kei na ka kecega dou sa raica; ia dou kusarawa, ka kauta sobu mai ki ke na tamaqu.

¹⁴ A sa mokoti Penijamini na tacina, ka tagi; a sa tagi talega ko Penijamini.

¹⁵ A sa reguci ira na tuakana kecega, ka tagicaki ira; ka sa oti, era sa qai veivosaki kaya na veituakani.

¹⁶ A sa rogo ki na vale i Fero na kenai rogorogo, ka sa kainaki, Era sa lako mai na tuakai i Josefa: a sa vinaka vei Fero, kei ira na nona tamata.

¹⁷ A sa kaya vei Josefa ko Fero, Mo kaya vei ira na wekamu, Mo dou kitaka oqo: dou vakavodoka na ka ki na nomudou manumanu, ka lako ki na vanua ko Kenani;

¹⁸ ka kauti koya na tamamudou, kei na nomudou lewe ni veivale, ka lako mai vei au: ka'u na solia vei kemudou na vinaka ni vanua ko Ijipita, ia dou na kania na kena vinaka ni vanua:

¹⁹ sa qai tau vei kemudou nai vakaro, dou cakava ga; dou kauta vei kemudou eso na qiqi-ni-tamata mai na vanua ko Ijipita, e na vukudra na nomudou lalai, kei na watimudou, ka kauti koya mai na tamamudou, ka lako mai:

²⁰ Ia dou kakua ni nanuma na nomudou i yaya; ni na nomudou na ka vinaka ni vanua taucoko ko Ijipita.

²¹ A ra kitaka vakakina na luve i Isireli: a sa solia vei ira eso na qiqi-ni-tamata ko Josefa, me vaka na vosa i Fero, ka solia vei ira nai vaqa ni gaunisala.

²² Sa solia ko koya vei ira kecega na tamata yadua nai sulu me rauta vakarua; ia sa solia ko koya vei Penijamini e tolu na drau na tiki ni siliva, kei nai sulu me rauta vakalima.

²³ Ia vei tamana sa vakauta na ka oqo; e tini na asa sa colata eso na ka vinaka mai Ijipita, ka tini na asa yalewa sa colata na sila kei na madrai kei na kakana me kei tamana e gaunisala.

²⁴ A sa talai ira yani na veitacini, a ra sa lako: a sa kaya vei ira ko koya, Dou kakua ni veicudruvi e na gaunisala.

²⁵ A ra sa lako cake mai Ijipita, ka yaco ki na vanua ko Kenani kivei Jekope na tamadra,

²⁶ ka tukuna vua, ka vaka, Sa bula tiko ko Josefa, a sa lewa ko koya na vanua taucoko ko Ijipita. A sa luvu na lomana, ni sa sega ni vakadinati ira.

²⁷ A ra sa tukuna vua na vosa kecega i Josefa, ka vosataka vei ira: ia ni sa raica ko koya na veiqiqi-ni-tamata sa vakatala ko Josefa me kauti koya, sa qai bula tale mai na yalo i Jekope na tamadra:

²⁸ a sa kaya ko Isireli, Sa levu; sa bula tiko ko Josefa na luvequ: au na la'ki raici koya ni'u sa bula tiko.