Vakatekivu 42 - Vakavakadewa Makawa

Sa lako ki Ijipita na tuakai Josefa me voli kakana, 1-28. Era tukutuku vei Jekope, 29-34. Sa rarawa ko Jekope e na vuku ni luvena sa yali, 35-38.

¹ Ni sa kila ko Jekope sa tiko na sila mai Ijipita, sa kaya ko Jekope vei ira na luvena, A cava dou sa veiraici tu kina?

² Sa kaya talega ko koya, Raica, ka'u sa rogoca sa tiko na sila mai Ijipita; dou lako sobu kina, ka volia na keda maikea: me da bula ga ka sega ni mate.

³ A ra sa lako sobu na tuakai Josefa e le tini, me voli sila mai Ijipita.

⁴ Ia ko Penijamini, na taci i Josefa, sa sega ni tala vata kei na tuakana ko Jekope; ni sa kaya ko koya, De yacovi koya e dua na ca.

⁵ A ra sa la'ki volivoli vata na luve i Isireli kei ira na tani eso: ni sa dausiga na vanua ko Kenani.

⁶ Ia ko Josefa sa lewa na vanua, ia sai koya ga sa volitaki sila vei ira kecega na lewe ni vanua: a ra sa lako mai na tuakai Josefa, ka cuva vua ki na qele.

⁷ A sa raici ira na tuakana ko Josefa, a sa kilai ira, ka sa vakalecalecavi koya vei ira, ka vosa vakaukauwa vei ira; ka kaya vei ira, Dou sa lako maivei? A ra sa kaya, Mai na vanua ko Kenani, me voli kakana.

⁸ A sa kilai ira na tuakana ko Josefa, a ra sa sega ni kilai koya.

⁹ A sa nanuma ko Josefa na tadra ka tadrataki ira kina ko koya, a sa kaya vei ira, Kemudou sa mai yamata; dou sa lako mai mo dou raica na kena sega ni vakarau tu ni vanua.

¹⁰ A ra sa kaya vua, E segai, noqu turaga; keitou sa lako ga mai na nomuni tamata me voli kakana ga:

¹¹ koi keitou kece na luvena e le dua ga na tamata; keitou sa dina; keitou sega ni yamata na nomuni tamata.

¹² A sa kaya vei ira ko koya, E segai; dou sa lako ga mai mo dou raica na kena sega ni vakarau tu ni vanua.

¹³ A ra sa kaya, A nomuni tamata, keitou lewe tinikarua na veitacini; keitou na luvena e le dua na tamata mai na vanua ko Kenani: ka raica, ko koya sa gone sa tiko edaidai kei na tama i keitou, ka dua sa yali.

¹⁴ A sa kaya vei ira ko Josefa, Sai koya ga ka'u a vosa kina vei kemudou, Kemudou sa mai yamata:

¹⁵ na ka ga oqo ena kilai kina na nomudou dina; Me vaka sa bula ko Fero, dou na sega ni lako tani eke, kevaka sa sega ni lako mai ki ke na tacimudou sa gone:

¹⁶ Dou tala mada e dua vei kemudou, me kauta mai na tacimudou, ia koi kemudou, dou na vesu, me kilai kina se dina na nomudou vosa, se segai: ia kevaka e segai, me vaka sa bula ko Fero, sa qai macala dou sa mai yamata.

¹⁷ A sa biuti ira vata me ra vakatawai mada bogi tolu.

¹⁸ Ia e na bogi tolu, sa qai kaya vei ira ko Josefa, Dou kitaka na ka oqo, mo dou bula kina; au sa rerevaka na Kalou:

¹⁹ Kevaka dou sa dina, me dua vei kemudou na veitacini me vesuki tiko e na vale dou sa sogolati kina: ia koi kemudou, dou la'ki kauta na sila ni ra dausiga na nomudou lewe ni veivale:

²⁰ ia dou kauta ga mai vei au na tacimudou sa gone; ena qai vakadinadinataki na nomudou vosa, ia dou na sega ni mate. A ra sa kitaka vakakina.

²¹ A ra sa veikayaka vakai ira, Eda sa cala vakaidina e na vuku ni tacida, ni da a raica na rarawa ni yalona, ni sa vakamasuti keda, ia eda a sega ni vakarogoci koya; o koya oqo sa yacovi keda kina na rarawa oqo.

²² A sa vosa vei ira ko Rupeni, ka kaya, Au a sega beka ni vosa vei kemudou, ka kaya, Dou kakua ni caka ca vua na gone? ia dou a sega ni rogoca: raica, sa tarogi talega kina na kena dra.

²³ A ra sa sega ni kila ni sa macala vei Josefa; ni sa tiko vei ira na tamata sa lave vosa vua.

²⁴ A sa lako tani vei ira ko koya, ka tagi; a sa lesu vei ira, ka veivosaki kei ira, a sa kauti Simioni, ka vesuka e matadra.

²⁵ A sa vakarota ko Josefa me vakasinaiti na nodra taga e na sila, ka me vakasukai na nonai lavo na tamata yadua ki na nona taga, ka me soli vei ira nai vaqa ni gaunisala: a sa cakava vakaoqo vei ira ko koya.

²⁶ A ra sa vakavodoka na nodra sila ki na nodra asa, ka lako tani maikea.

²⁷ Ia e dua sa sereka na nona taga e na bure me vakania na nona asa, a sa kunea na nonai lavo; ka raica, sa tiko e na gusu ni nona taga.

²⁸ A sa kaya vei ira na veitacini, A noqu i lavo sa vakasukai; ka sa tiko e na gusu ni noqu taga. A sa waicala na yalodra, a ra sa rere vata, ka kaya, A ka cava oqo sa cakava vei keda na Kalou?

²⁹ A ra sa lako mai vei Jekope na tamadra ki na vanua ko Kenani, ka tukuna vua na ka kecega ka yacovi ira: ka kaya,

³⁰ Ko koya na tamata sa turaga ni vanua, sa vosa vakaukauwa vei keitou, ka kaya ni keitou sa vakaraica vakaca na vanua:

³¹ ia keitou a kaya vua, Keitou sa dina; keitou sa sega ni yamata:

³² koi keitou na veitacini e lewe tinikarua, na luvena na tama i keitou: e dua sa yali, ia ko koya ka gone sa tiko edaidai kei na tama i keitou, e na vanua ko Kenani.

³³ A sa kaya vei keitou na tamata, ko koya sa turaga ni vanua, A ka oqo ka'u na kila kina ni dou sa dina; dou laiva e dua vei kemudou na veitacini me tiko kei au, ia koi kemudou, dou kauta na kedra na nomudou lewe ni veivale era dausiga, dou qai lako:

³⁴ ia dou kauti koya mai na tacimudou sa gone: au na qai kila ni dou sa sega ni yamata, ni dou sa dina ga: au na qai solia vei kemudou na tacimudou, ia dou na qai mai dauveivoli e na vanua.

³⁵ Ia ni ra sa vakalalataka na nodra taga, raica, sa tiko na nonai oloolo lavo na tamata yadua e na nona taga: ia ni ra sa raica kei tamadra nai oloolo lavo, era sa rere.

³⁶ A sa kaya vei ira ko Jekope na tamadra, Dou sa vakayalia vei au na luvequ: sa yali ko Josefa, ka sa yali ko Simioni, ia dou na kauti Penijamini talega: sa luvuca na lomaqu na ka kecega oqo.

³⁷ A sa vosa vei tamana ko Rupeni, ka kaya, Mo vakamatei rau na luvequ, kevaka ka'u sa sega ni kauti koya tale mai vei iko: mo laiva vei au, ka'u na kauti koya tale mai vei iko.

³⁸ A sa kaya ko koya, Ena sega ni lako sobu kei kemudou na luvequ; ni sa mate na tuakana, a sa vo duaduaga ko koya: kevaka sa yacovi koya na ca e na sala dou sa lako kina, dou na qai vakayacora e na rarawa na uluqu sa sika ki nai bulubulu.