Vakatekivu 41 - Vakavakadewa Makawa

Sa tadra vakarua ko Fero, 1-24. Sa vakaibalebaletaka ko Josefa, 25-36. Sa lesi ko Josefa me turaga mai Ijipita, 37-45. E vitu na yabaki ni sautu, 46-52. A veiyabaki dausiga, 53-57.

¹ Ia ni sa oti vinaka e rua na yabaki, sa qai tadra ko Fero: ka raica, sa tu mai na uciwai.

² Ka raica, sa lako cake mai na uciwai e vitu na pulumokau, sa rairai vinaka, ka sa yago vinaka na lewedra; a ra sa kana voli e veico:

³ ka raica, sa muri ira cake mai e vitu na pulumokau tani mai na uciwai, sa rairai ca, ka sa suivotu; a ra sa tu vata kei ira na pulumokau e na bati ni uciwai:

⁴ ia na pulumokau sa rairai ca ka suivotu, era sa kania na pulumokau e vitu sa rairai vinaka ka yago vinaka. A sa yadra mai ko Fero.

⁵ A sa moce ka tadra tale: ka raica, sa tubu cake e na dua na tolo ni sila e vitu na kena sola, sa lelevu, ka vinaka:

⁶ ka raica, sa vitu na sola ca, ka kana mate e na cagi mai na tu-i-cake, sa tubu emuri:

⁷ ia na sola e vitu sa ca sa tiloma na sola e vitu sa lelevu ka vinaka. A sa yadra mai ko Fero, ka raica, sa tadra ga.

⁸ Ia e na mataka sa kidroa na lomana: a sa talaki ka kacivi ira kece mai na daucaka-mana mai Ijipita, kei na tamata vuku kecega sa tiko kina: a sa tukuna vei ira ko Fero na nona tadra; a sa sega me vakaibalebaletaka rawa vei Fero.

⁹ Sa qai vosa vei Fero ko koya sa turaga vei ira sa daucaka mena, ka kaya, Au sa nanuma edaidai na noqu cala:

¹⁰ sa cudru ko Fero vei rau na nona tamata, ka biuti au me'u sogolati e nona vale na kapiteni ni valu i vakatawa, koi keirau kei na nodra turaga na dauvavavi:

¹¹ ia keirau a tadrataka e dua na tadra e na dua na bogi, koi au kei koya; keirau a tadra yadua me vaka nai balebale ni nona tadra:

¹² a sa tiko maikea e dua na cauravou, na Iperiu, a sa qarava na kapiteni ni valu i vakatawa ko koya; ia keirau a tukuna vua, a sa vakaibalebaletaka vei keirau na neirau tadra; sa vakaibalebaletaka vei keirau yadua me vaka na neirau tadra:

¹³ ia me vaka sa vakaibalebaletaka vei keirau, sa yaco vakakina; sa vakalesui au ko koya ki na noqu i tavi, ka sa vakalilici koya.

¹⁴ Sa qai talatala ko Fero me lako mai ko Josefa, a ra sa kauti koya vakusakusa mai na vale butobuto: a sa tasi koya, ka sulumaka nai sulu tani, ka lako kivei Fero.

¹⁵ A sa kaya vei Josefa ko Fero, Au sa tadrataka e dua na tadra, a sa sega me vakaibalebaletaka: ia ka'u sa rogoca ni ko sa rawata mo vakaibalebaletaka na tadra ko rogoca.

¹⁶ A sa vosa vei Fero ko Josefa, ka kaya, Sa sega vei au: ia na Kalou ga ena vosa vinaka vei Fero.

¹⁷ A sa kaya vei Josefa ko Fero, Na noqu tadra oqo, ka'u a tu mai na bati ni uciwai:

¹⁸ ka raica, sa lako cake mai na uciwai e vitu na pulumokau, sa yago vinaka, ka rairai vinaka; a ra sa kana voli e na veico:

¹⁹ ka raica, e vitu na pulumokau tani sa muri ira cake mai, sa suivotu, ka rairai ca sara, ka yali na lewedra; ka'u sa sega ni raica e dua sa ca vakakina e na vanua taucoko ko Ijipita:

²⁰ ia na pulumokau sa suivotu ka yago ca sa kania na pulumokau e vitu ka liu mai sa yago vinaka:

²¹ ia ni ra sa kania oti, sa dredre ni kilai ni ra kania; ni ra sa rairai tiko, me vaka eliu. Ka'u a qai yadra.

²² Ia ka'u a qai kunea e na noqu tadra, ka raica, sa tubu e vitu na sola ni sila e na dua na tolona, sa vuai vinaka ka lelevu:

²³ ka raica, sa tubu cake emuri e vitu na sola, sa malai ka lalai, e kana mate e na cagi mai na tu-i-cake:

²⁴ ia na sola sa lalai sa tiloma na sola vinaka e vitu: ia ka'u a tukuna na ka oqo vei ira na daucaka-mana; ka sa sega e dua sa vakamacalataka vei au.

²⁵ A sa kaya vei Fero ko Josefa, A tadra i Fero sa dua ga: sa tukuna vei Fero na Kalou na ka sa voleka ni cakava ko koya.

²⁶ A pulumokau vinaka e vitu sa yabaki e vitu; kei na sola vinaka e vitu sa yabaki e vitu: sa dua bauga na tadra:

²⁷ Ia na pulumokau e vitu sa suivotu ka yago ca sa muri ira cake mai, sa yabaki e vitu; kei na sola e vitu sa lala e kana mate e na cagi mai na tu-i-cake, ena yabaki dausiga e vitu.

²⁸ Oqo na ka ka'u sa kaya vei Fero: sa vakatakila vei Fero na ka sa voleka ni cakava na Kalou.

²⁹ Raica, ena lako mai e vitu na yabaki vakalewe sara e na vanua taucoko ko Ijipita:

³⁰ ia ena qai yaco emuri e vitu na yabaki dausiga; ia na sautu kece ena guileca e na vanua ko Ijipita; ni na kania na vanua na dausiga;

³¹ ia ena sega ni kilai na sautu e na vanua, e na vuku ni dausiga ko ya sa muri mai; ni na ka rerevaki sara.

³² Ia ni sa vakarua vei Fero na tadra, sa ka ni sa vakataudeitaka na Kalou, ia sa na sega ni dede ena qai vakayacora na Kalou.

³³ O koya oqo me qara mada ko Fero e dua na tamata yalomatua ka vuku, ka lesia me lewa na vanua ko Ijipita.

³⁴ Me lesia ko Fero eso na matanivanua me lewa na vanua, ka kumuna nai kalima e na vanua ko Ijipita e na veiyabaki vakalewe e vitu:

³⁵ Ia me ra kumuna vata na kakana kecega e na veiyabaki vinaka sa bera mai, ka binia na sila me lewa ko Fero, ka me ra maroroya talega na kakana e na veikoro.

³⁶ Ia na kakana ko ya ena maninitaki me kena na vanua e na veiyabaki dausiga e vitu, ena yaco e na vanua ko Ijipita; ka me kakua ni kawaboko na vanua e na dausiga.

³⁷ A sa vinaka vei Fero na ka oqo, ka vei ira kecega na nona tamata.

³⁸ A sa kaya vei ira na nona tamata ko Fero, Eda na kunea li e dua vakaoqo, a tamata sa tiko vua na yalo ni Kalou?

³⁹ A sa kaya vei Josefa ko Fero, Ni sa vakatakila vei iko na Kalou na ka kecega oqo, sa sega e dua sa yalomatua ka vuku me vakataki iko:

⁴⁰ ko na turaga e na noqu vale, ia ko ira na noqu tamata kecega era na vakarorogo ki na nomu vosa: e nai tikotiko-vakaturaga duaduaga ka'u na levu cake vei iko.

⁴¹ Sa kaya tale vei Josefa ko Fero, Raica, ka'u sa lesi iko mo lewa na vanua taucoko ko Ijipita.

⁴² A sa luvata na nona mama ko Fero mai na ligana, ka daramaka ki na liga i Josefa, ka vakaisulutaki koya e na lineni matailalai, ka vakataubena e na sinucodo koula;

⁴³ a sa vakavodoki koya ki nai karua ni nona qiqi vakaturaga a ra sa kacivaka voli e matana, Mai cuva mada: a sa lesi koya me lewa na vanua taucoko ko Ijipita.

⁴⁴ A sa kaya vei Josefa ko Fero, Koi au ko Fero, ia ena sega na tamata me yavalata na ligana se na yavana e na vanua taucoko ko Ijipita, kevaka ko sa sega ni lewa mada kina.

⁴⁵ A sa vakayacani Josefa ko Fero, me Savenaca-panea; a sa soli Asenaca vua me watina, ko koya na luve i Poti-fera na bete mai Oni. A sa lako voli yani ko Josefa ki na veiyasana kecega mai Ijipita.

⁴⁶ A sa tolusagavulu na yabaki i Josefa, ni sa tu e na mata i Fero na tui Ijipita. A sa lako tani e na mata i Fero ko Josefa, ka lako voli yani e na veiyasana kecega mai Ijipita.

⁴⁷ Ia e na yabaki vakalewe e vitu sa vua vinaka ka vakalevu sara na vanua.

⁴⁸ A sa kumuna vata na kakana kecega e na yabaki e vitu, sa tu e na vanua ko Ijipita, ka binia na kakana e na veikoro: na kakana ni veiwere sa volita e dua na koro, sa binia ko koya e na koro ko ya.

⁴⁹ A sa binia na sila ko Josefa me vaka na nuku mai matasawa, na ka levu sara, ka qai sega ni wilika tiko; ni sa sega ni wili rawa.

⁵⁰ A sa sucu e le rua na luve i Josefa erau tagane ni sa bera na veiyabaki ni dausiga, sa vakasucuma ko Asenaca, na luve i Poti-fera na bete mai Oni.

⁵¹ A sa vakatoka ko Josefa na yaca ni ulumatua ko Manasa; ka kaya, Ni sa vakayacora na Kalou me'u guilecava na noqu oca kecega, kei na lewe-ni-vale kece i tamaqu.

⁵² A sa vakayacana nai karua ko Ifireimi; ka kaya, Ni sa vakayacora na Kalou me'u vakaivakawa e na vanua ni noqu rarawa.

⁵³ A sa oti na yabaki vakalewe e vitu e na vanua ko Ijipita.

⁵⁴ A sa tekivu na veiyabaki dausiga, me vaka ka kaya ko Josefa: a sa kania na veivanua kecega na dausiga; ia sa tiko na kakana e na vanua taucoko ko Ijipita.

⁵⁵ Ia ni sa viakana sara na vanua taucoko ko Ijipita, era sa qai tagi vei Fero na tamata me soli kedra: a sa kaya vei ira na kai Ijipita kecega ko Fero, Dou lako vei Josefa; ia na ka sa kaya vei kemudou, dou cakava.

⁵⁶ A sa tiko na dausiga e na vanua taucoko: a sa dolava na lololo kecega ko Josefa, ka volitaki sila vei ira na kai Ijipita; a sa gumatua mai na dausiga e na vanua ko Ijipita.

⁵⁷ A sa lako mai ki Ijipita vei Josefa na lewe ni veivanua kecega me voli sila; ni sa gumatua na dausiga e na veivanua kecega.