Vakatekivu 40 - Vakavakadewa Makawa

E le rua na tamata i Fero sa biu ki na vale ni veivesu, 1-4. Erau tadra, a sa vakatakila ko Josefa nai balebale ni nodrau tadra, 5-19. Sa yaco na ka sa tukuna vei rau ko Josefa, 20-23.

¹ Sa oti na ka oqo, erau sa vakacalaka vua na nodrau turaga na tui Ijipita, ko koya sa daucaka mena vua na tui Ijipita, kei koya sa dauvavavi.

² A sa cudru ko Fero vei rau na nona tamata turaga, na turaga vei ira sa daucaka mena, kei koya sa turaga vei ira sa dauvavavi.

³ A sa sogolati rau e nona vale ni veivesu na kapiteni ni valu i vakatawa, na tikina sa vesuki tu kina ko Josefa.

⁴ Ia na kapiteni ni valu i vakatawa sa lesi Josefa me vakatawai rau, a sa qaravi rau ko koya: a rau sa tikotiko ga kina.

⁵ A rau sa dui tadra koi rau ruarua, e na dua na bogi, na tamata yadua me vaka nai balebale ni nona tadra, ko koya ka daucaka mena, kei koya ka dauvavavi, vua na tui Ijipita, erau sa vesuki e na vale ni veivesu.

⁶ A sa lako vei rau e na mataka ko Josefa, ka raici rau, ka rau sa mataveveku:

⁷ a sa tarogi rau na tamata turaga i Fero eratou sa sogolati kaya tiko e na vale ni nona turaga, a sa kaya, A cava drau sa vakaveveku mata kina edaidai?

⁸ A rau a kaya vua, Keirau sa tadrataka na tadra, ka sa sega me vakaibalebaletaka. A sa kaya vei rau ko Josefa, Sa sega beka ni rawa vua na Kalou me vakaibalebaletaka na ka? drau tukuna mada mai vei au.

⁹ A sa tukuna vei Josefa na nona tadra ko koya ka turaga vei ira sa daucaka mena na tui, a sa kaya vua, E na noqu tadra, raica, sa tu e mataqu e dua na vaini;

¹⁰ a sa tolu na tabana: ia ni sa kubu mai, sa seraka na sena, ka vuataka na vua dreu na kenai soso:

¹¹ ia sa tu e ligaqu na bilo i Fero: ia ka'u a vetia na vua-ni-vaini, ka lobaka ki na bilo i Fero, ka'u a qai solia na bilo i Fero, ka'u a qai solia na bilo ki na liga i Fero.

¹² A sa kaya vua ko Josefa, Oqo na kenai balebale: A tabana e tolu sa bogi tolu:

¹³ sa vo ga na bogi tolu, ena qai vueta na ulumu ko Fero, ka vakalesui iko ki na nomu i tavi: ia ko na solia tale na bilo i Fero ki na ligana, me vaka nai valavala eliu ni ko a daucaka mena:

¹⁴ ia mo nanumi au ni ko na tiko vinaka, ka lomani au mada, ka tukuni au vei Fero, ka kauti au tani e na vale oqo:

¹⁵ ni sa dina ka'u a butakoci mai na nodra vanua na Iperiu; eke talega, sa sega na ka ka'u sa cakava, me ra biuti au kina ki na vale butobuto.

¹⁶ Ia ni sa kila na turaga ni vavavi ni sa vinaka na kenai balebale, sa kaya vei Josefa, Au a tadra talega ka raica, sa tolu na kato madrai vulavula e uluqu:

¹⁷ ia e na kato sa toka e cake sa tu na kakana kecega sa dauvavavi me kei Fero; a ra sa mai kania na manumanu vuka mai na kato, sa tu e uluqu.

¹⁸ A sa vosa ko Josefa, ka kaya, Oqo na kenai balebale: A kato e tolu sa bogi tolu:

¹⁹ sa vo ga na bogi tolu, ena qai vueta na ulumu mai delamu ko Fero, ka vakalilici iko e na kau, a ra na kania na lewemu na manumanu vuka.

²⁰ Ia e na kenai katolu ni siga, na siga ni sucu i Fero, sa cakava ko koya e dua na magiti vei ira kecega era qaravi koya: a sa vueta na ulu ni turaga vei ira sa daucaka mena, kei na ulu ni turaga vei ira sa dauvavavi.

²¹ A sa vakalesuya na turaga vei ira sa daucaka mena ki na nonai tavi; a sa solia tale ko koya na bilo ki na liga i Fero:

²² ia sa vakalilica na turaga vei ira sa dauvavavi: me vaka sa vakaibalebaletaka vei rau ko Josefa.

²³ Ia na turaga vei ira sa daucaka mena na tui sa sega ni nanumi Josefa, sa guilecavi koya ga.