Vakatekivu 4 - Vakavakadewa Makawa

Sa sucu ko Keni kei Epeli, 1,2. A nodraui soro, 3-7. Sa vakamatei Epeli ko Keni, 8. Sa tarogi koya ko Jiova, ka cudruva, 9-15. A kawa i Keni, 16-18. Sa veikaruani ko Lemeki, 19-24. Sa sucu ko Seci, 25,26.

¹ A rau sa veiyacovi ko Atama kei Ivi na watina; a sa kunekune ko koya, a sa vakasucumi Keni, a sa kaya, Au sa rawata e dua na tagane maivei Jiova.

² A sa vakasucu tale, ka vakasucumi Epeli na tacina. Ia ko Epeli sa dauvakana sipi; a sa daucaka were ko Keni.

³ Sa oti bogi vica, sa kauta mai ko Keni eso na vuata ni vanua mei madrali vei Jiova.

⁴ Ko Epeli talega, sa kauta mai eso na ulumatua ni nona sipi, ka so na kedra uro. A sa vakadonui Epeli ko Jiova, kei na nonai madrali:

⁵ ia ka sa sega ni vakadonui Keni ko koya, se na nonai madrali. A sa cudru vakalevu ko Keni, a sa rai dua tani na matana.

⁶ A sa kaya vei Keni ko Jiova, A cava ko sa cudru kina? Ka cava sa rai dua tani kina na matamu?

⁷ Kevaka ko sa caka vinaka, ko na sega li ni vinakati? Ia kevaka ko sa sega ni caka vinaka, sa koto nai valavala ca mai na katuba. Ia ena qaravi iko ko koya, ko na lewai koya talega.

⁸ A sa kaya vei Epeli na tacina ko Keni, Daru lako ki na were; ia ni rau a tiko e na were, sa qai tu cake ko Keni vei Epeli na tacina, ka vakamatei koya.

⁹ A sa kaya vei Keni ko Jiova, Sa evei na tacimu ko Epeli? A sa kaya ko koya, Au sa sega ni kila: koi au beka nai vakatawa i taciqu?

¹⁰ A sa kaya ko koya, A cava ko sa kitaka? a dra ni tacimu sa tagi vei au mai na qele:

¹¹ ia oqo, ko sa qai cudruvi e na vanua oqo, o koya sa gunuva na dra ni tacimu ko sa vakamatea:

¹² ni ko sa wereca na vanua, ena sega tiko ni bulabula me vua vei iko; ko na dauveidroyaki ka tiko sese e vuravura.

¹³ A sa kaya vei Jiova ko Keni, Ai sau ni noqui valavala ca sa levu sara, au sega ni vosota rawa:

¹⁴ raica, ko ni sa vakasevi au edaidai mai na vanua oqo; ka'u na vuni talega mai na matamuni; au na dauveidroyaki ka tiko sese e vuravura; ia, ena yaco, ko koya sa kunei au ena vakamatei au.

¹⁵ A sa kaya vua ko Jiova, O koya sa na vakamatei Keni, ena saumi vakavitu. A sa vakatakilakilataki Keni ko Jiova, me kakua ni mokuti koya e dua ni sa kunea.

¹⁶ A sa lako tani mai na mata i Jiova ko Keni, ka la'ki tiko ki na vanua ko Noti, vaka ki na tu-i-cake mai Iteni.

¹⁷ A sa veiyacovi tale kei na watina ko Keni; a sa kunekune ko koya, a sa vakasucumi Inoki: a sa tara e dua na koro ko koya, ka vakatoka na koro e na yaca ni luvena ko Inoki.

¹⁸ A sa sucu ko Irati na luve i Inoki: a sa sucu ko Meujeli na luve i Irati: a sa sucu ko Mecuseeli na luve i Meujeli: a sa sucu ko Lemeki na luve i Mecuseeli.

¹⁹ A sa vakawati ko Lemeki kei na le rua na yalewa: a yacana e dua ko Eta, a yacana nai karua ko Sila.

²⁰ A sa vakasucumi Jepali ko Eta: ko koya na tamadra era sa dautiko e na vale laca, kei ira era dauvakana manumanu e yavai va.

²¹ Ia na yaca i tacina ko Jupali: ko koya na tamadra kecega era dau ni api kei na kove.

²² Ko Sila talega, sa vakasucumi Tupali-keni, a nodra i vakavuvuli kecega na matai ni parasa kei na aironi: ia na gane i Tupali-keni ko Neama.

²³ A sa kaya ko Lemeki vei rau na watina, I Eta kei Sila, drau rogoca na noqu vosa; Koi kemudrau na wati i Lemeki, drau vakarorogo ki na ka ka'u sa kaya: Ni'u sa vakamatea e dua na tamata ka'u sa mavoa kina: Kei na cauravou ka'u sa lauti kina:

²⁴ Kevaka sa vakavitu na kenai sau e na vuku i Keni, Ena vakavitusagavulu ka vitu vakaidina e na vuku i Lemeki.

²⁵ A sa veiyacovi tale kei na watina ko Atama; a sa vakasucuma ko koya e dua na luvena tagane, a sa vakayacani koya ko Seci: ni sa kaya, Sa solia mai vei au na Kalou e dua na kawa mei sosomi kei Epeli, ka vakamatea ko Keni.

²⁶ A sa sucu e dua na luve i Seci ka tagane; a sa vakayacani koya ko Inosi: e na gauna ko ya, era qai vakatekivu kina na tamata me vakatokai ira e na yaca i Jiova.