Vakatekivu 39 - Vakavakadewa Makawa

Sa tamata yaco mai Ijipita ko Josefa, 1-6. Sa dauveretaki koya na nona marama, ka qai lasutaki koya, 7-18. Sa cudruvi koya na nona turaga, ka biuta ki na vale ni veivesu, 19,20. Ia sa tiko kaya ko Jiova, 21-23.

¹ A sa kau sobu ki Ijipita ko Josefa; ia ko Potifa, na matanivanua i Fero, ka kapiteni ni valu i vakatawa, a kai Ijipita, sa voli koya maivei ira na luve i Isimeli, era sa kauti koya sobu kina.

² A sa tiko kei Josefa ko Jiova, a sa tamata yaco ko koya; a sa tiko e na vale ni nona turaga na kai Ijipita.

³ A sa raica na nona turaga ni sa tiko vata kaya ko Jiova, ka vakayacora ko Jiova na ka kecega sa cakava ko koya:

⁴ A sa lomani Josefa, a sa qaravi koya ko Josefa; a sa lesi koya me lewa e nona vale, ka solia ki na ligana na ka kecega sa tu vua.

⁵ Ia mai na siga sa lesi koya kina me lewa e nona vale, kei na nona ka kecega, sa vakalougatataka na nona vale na kai Ijipita ko Jiova e na vuku i Josefa; ia sa vakalougatataka ko Jiova na nona ka kecega e vale, kei na were.

⁶ A sa laiva na nona ka kecega me lewa ko Josefa; ka sega ni kila e dua na ka sa tu vua, na kakana ga sa kania ko koya. A sa yago vinaka ka matavinaka ko Josefa.

⁷ Sa oti na ka oqo, sa dauraici Josefa na wati ni nona turaga; ka kaya, Me daru moce vata.

⁸ A sa bese ko koya, ka kaya vua na wati ni nona turaga, Raica, sa sega ni kila na noqu turaga na ka sa tu vei au e vale, ka sa solia me'u lewa na nona ka kecega;

⁹ sa sega e dua e vale oqo me levu cake vei au, a sa sega e dua na ka sa bureitaka vei au, ko iko duaduaga, ni ko sa watina: au na qai cakava rawa vakaevei na ka ca vakaidina oqo, kai valavala ca vua na Kalou?

¹⁰ Ia ni sa vosa tikoga vei Josefa e na veisiga kecega, sa sega ga ni rogoci koya ko koya, me moce vata kaya, se me rau tiko vata kaya.

¹¹ Ia sa dua na siga, sa curu ki vale ko Josefa me kitaka na nonai tavi, ka sega ni tiko kina e dua vei ira na lewe-ni-vale.

¹² A sa taura ga na nonai sulu, ka kaya, Me daru moce vata: a sa laiva na nonai sulu ki ligana ko Josefa, ka dro, ka curu yani ki tuba.

¹³ Ia ni sa raica ko koya sa biuta tu vua na nonai sulu, ka dro tani,

¹⁴ sa qai kaci vei ira na nona lewe-ni-vale, a sa vosa vei ira, ka kaya, Raica, sa kauta mai vei keda ko koya e dua na Iperiu me vakalialiai keda; sa curu mai vei au me keirau moce vata kaya, ia ka'u a kaci e na domo levu:

¹⁵ ia ni sa rogoca ko koya ni'u a tabalaka na domoqu, ka kaci, sa qai laiva vei au na nonai sulu, ka dro, ka curu yani ki tuba.

¹⁶ A sa taura tiko ko koya na nonai sulu, ka me tale mada mai ki vale na nona turaga.

¹⁷ A sa tukutuku vua ko koya vakaoqo, Ko koya na Iperiu, na tamata ko a kauta mai vei keda, sa curu mai vei au me vakalialiai au:

¹⁸ a sa yaco ni'u a tabalaka na domoqu, ka kaci, sa qai laiva vei au na nonai sulu, ka dro ki tuba.

¹⁹ Ia ni sa rogoca na nona turaga na vosa ni watina, ni sa kaya, Sa kitaki au vakaoqo na nomu tamata; sa qai cudru vakalevu.

²⁰ A sa tauri Josefa na nona turaga, ka biuta ki na vale ni veivesu, na vale era vesu kina ko ira ka vesuka na tui: a sa tiko ga kina ko koya.

²¹ Ia sa tiko vata kei Josefa ko Jiova, ka vakayacora vua na loloma, ka vagolea na yalo ni vakatawa ni vale ni veivesu me lomani koya.

²² Ia ko koya nai vakatawa ni vale ni veivesu sa lesi Josefa me lewa na tamata kecega sa vesu tiko e na vale ni veivesu; ia sa vakatau vua na ka kecega era cakava kina.

²³ Ai vakatawa ni vale ni veivesu sa sega ni vakaraica e dua na ka sa lewa ko koya, ni sa tiko vata kaya ko Jiova; ka sa vakayacora ko Jiova na ka sa cakava ko koya.