Vakatekivu 37 - Vakavakadewa Makawa

Sa lomani Josefa ko Jekope, a ra sa vuvutaki koya ko ira na tuakana, 3,4. Sa tadra ko Josefa, a sa cati kina, 5-11. Sa talai ko Josefa vei ira na tuakana, 12-17. Era sa bukia na kena vere, ka tarovi ira ko Rupeni, 18-22. Era biuta mada ki nai keli, ka qai volitaka emuri: ka taqaya ko Rupeni ni sa yali, 23-30. Sa kau nai sulu vei tamana, 31-35. Sa volitaki, 36.

¹ A sa tiko ko Jekope e na vanua ka tiko vulagi kina ko tamana, e na vanua ko Kenani.

² Oqo nai tukutuku kei Jekope: Sa tinikavitu na yabaki i Josefa, ka sa dauvakania na sipi kei ira vata na tuakana; a sa dautiko na gone kei rau na luve i Pila, kei rau na luve i Silipa, a watina lalai nei tamana: a sa daukauta mai kivei tamana ko Josefa na kedratou i rogorogo ca.

³ A sa levu na loloma i Isireli vei Josefa, ka lailai vei ira kecega na luvena, ni sa luvena ni sa qai qase mai: a sa cakava vei koya e dua na kote veivolavolai.

⁴ Ia sa raica na tuakana ni sa levu na nona loloma na tamadra vei koya, ka lailai vei ira kece na tuakana, ka ra sa qai cati koya, a ra sega ni vosa vinaka rawa vua.

⁵ A sa tadra ko Josefa, ka tukuna vei ira na tuakana: a ra qai cati koya vakalevu.

⁶ A sa kaya vei ira ko koya, Dou rogoca mada na noqu tadra:

⁷ raica, eda a vau sila tiko mai na were, ka sa tu cake na noqu i vau, ka wavu tu; ka sa tu vakavolivolita na nomudou i vau, ka rokova na noqu i vau.

⁸ A ra sa kaya vua ko ira na tuakana, Ko na lewa dina beka vei keitou? se ko na veitalia dina beka vei keitou? A ra sa cati koya vakalevu sara e na vuku ni nona tadra, kei na nona vosa.

⁹ A sa tadra tale ko koya, ka tukuna vei ira na tuakana, a sa kaya, Raica, ka'u sa tadra tale; sa rokovi au na mata-ni-siga, kei na vula, kei na kalokalo e tinikadua.

¹⁰ A sa tukuna vei tamana, vei ira talega na tuakana: a sa vunauca ko tamana, ka kaya vua, A tadra cava oqo ko sa tadrataka? ena lako beka mai koi au kei tinamu kei ira na tuakamu, ka cuva ki na qele kivei iko?

¹¹ A sa vuvutaki koya ko ira na tuakana; a sa nanuma tiko na vosa ko tamana.

¹² A ra sa lako na tuakana me vakania na sipi nei tamadra mai Sikemi.

¹³ A sa kaya vei Josefa ko Isireli, Era vakania na sipi mai Sikemi na tuakamu, ne? lako mai me'u talai iko vei ira. A sa kaya ko koya, Koi au ga oqo.

¹⁴ A sa kaya vua ko koya, Mo lako mada, mo raica se ra tiko vinaka na tuakamu, kei na qele ni sipi; ka kauta tale mai vei au na kenai tukutuku. A sa talai koya mai na buca mai Epironi, a sa lako yani ko koya ki Sikemi.

¹⁵ A sa kunei koya e dua na tamata, ni sa lako sese voli mai veikau: a sa tarogi koya na tamata, A cava ko sa vakasaqara voli?

¹⁶ A sa kaya, Au sa vakasaqarai ira na tuakaqu: mo tukuna mada vei au na yasana era vakania kina na sipi.

¹⁷ A sa kaya na tamata, Era sa lako tani eke: ni'u sa rogoci ira ni ra kaya, Tou lako yani ki Tocani. A sa muri ira na tuakana ko Josefa, ka vauci ira mai Tocani.

¹⁸ A ra sa kunei koya ni sa vakayawa tiko, ia ni sa bera ni voleka vei ira, era sa bukia na kena vere me ra vakamatea.

¹⁹ A ra sa veikayaka vakai ira, Raica, sa lako mai na dautadra ko ya:

²⁰ tou ia mada, tou vakamatea, ka biuta ki na dua nai keli: eda na qai tukuna vaka ne, Sa dua na manumanu ca sa kania: eda na qai raica se na yaco vakacava na nona tadra.

²¹ A sa rogoca ko Rupeni, ka vakabulai koya mai na ligadra; ni sa kaya, Tou kakua ni vakamatea.

²² Sa kaya talega vei ira ko Rupeni, Dou kakua ni vakadave dra, dou biuti koya ga ki nai keli oqo e na loma ni vanua, mo dou kakua ni yavita; ka me vakabulai koya mai na ligadra, ka vakasuka tale vei tamana.

²³ Ia ni sa tadu ko Josefa vei ira na tuakana, era sa luvata tani vei Josefa na nona kote veivolavolai, sa vakote kina ko koya;

²⁴ a ra sa kauti koya ka biuta ki nai keli: a sa di nai keli, sa sega kina na wai.

²⁵ A ra sa tiko sobu me ra kana: a ra sa ta cake, ka rai yani, ka raica, sa dua nai vavakoso vei ira na luve i Isimeli era sa lako mai Kiliati, kei na nodra kameli, era sa kauta na ka boi vinaka, kei na pami, kei na mura, era kauta sobu tiko ki Ijipita.

²⁶ A sa kaya ko Juta vei ira na veitacini, A cava na kena yaga, kevaka eda vakamatea na tacida, ka vunia na kena dra?

²⁷ tou ia mada ka volitaki koya kivei ira na luve i Isimeli, ia me da kakua ni yavita, ni sa tacida, ka lewe vata. A ra sa vinakata na veitacini.

²⁸ A sa lako voli yani eso na kai Mitiani, na tamata dauveivoli; a ra sa yavi Josefa cake mai nai keli, ka ra volitaki koya vei ira na luve i Isimeli, sa kenai voli e ruasagavulu na tiki ni siliva; a ra sa kauti Josefa ki Ijipita.

²⁹ A sa lesu ki nai keli ko Rupeni; ka raica, sa sega ni tiko e nai keli ko Josefa; sa qai dresulaka na nonai sulu,

³⁰ ka lesu vei ira na veitacini, ka kaya, Sa yali na gone; ia koi au, ka'u na lako beka kivei?

³¹ A ra sa kauta nai sulu i Josefa, ka vakamatea e dua na luve ni me, ka lomoca na kote e na dra;

³² a ra sa vakasuka na kote veivolavolai, ka kauta vei tamadra, a ra sa kaya, keitou sa kunea oqo: mo kila mada se na kote nei na luvemu, se segai.

³³ A sa kila ko koya, ka kaya, A kote nei na luvequ; sa kani koya e dua na manumanu ca; sa dina ga sa dresulaki ko Josefa.

³⁴ A sa dresulaka nonai sulu ko Jekope, ka vauca nai sulu taqarotu ki na tolona, ka tagicaka na luvena bogi vuqa.

³⁵ A ratou sa ia kece na luvena tagane kei na luvena yalewa kecega, me vakacegui koya; a sa bese ni vakacegui; a sa kaya, Au na lako sobu ki bulu ki na luvequ ka tagi tiko. A sa tagi tiko e na vukuna ko tamana.

³⁶ A ra sa volitaki koya na kai Mitiani ki Ijipita, kivei Potifa, na matanivanua i Fero, ka kapiteni ni valu i vakatawa.