Vakatekivu 35 - Vakavakadewa Makawa

Sa lako ki Peceli ko Jekope me soro, 1-7. Sa mate ko Tepora, 8. Sa vosavakalougatataki Jekope tale ko Jiova, 9-15. Sa mate ko Repeka, 16-20. Ko ira na luve i Jekope, 23-26. Sa mate ko Aisake, 27-29.

¹ A sa kaya vei Jekope na Kalou, Cavu tu, ka mo lako cake ki Peceli, ka tiko maikea: ka cakava maikea e dua nai cabocabo-ni-soro vua na Kalou, ko koya ka rairai vei iko ni ko a drotaka na mata i Iso na tuakamu.

² A sa kaya ko Jekope vei ira na nona lewe-ni-vale, kei ira kecega era tiko kaya, Dou biuta tani na kalou ni kai tani sa tiko kei kemudou, dou savasava talega, ka vakaisulu e nai sulu tani:

³ ia tou yavala mada, tou lako cake ki Peceli; ka'u na cakava maikea e dua nai cabocabo-ni-soro vua na Kalou, ko koya ka rogoci au e na siga ka'u a rarawa kina, ka tiko kei au e na sala ka'u a lako kina.

⁴ A ra sa solia vei Jekope na kalou kecega ni kai tani sa tu e ligadra, kei na sau sa tu e daligadra; a sa vunia ko Jekope e ruku ni oki ka tu mai Sikemi.

⁵ A ra sa lako tu yani: a sa kania na veikoro sa voliti ira na rere vua na Kalou, a ra sega kina ni vakasavi ira na luve i Jekope.

⁶ A sa lako mai ko Jekope ki Lusa, mai na vanua ko Kenani, [ko ya ko Peceli,] ko koya kei ira kece na tamata era tiko vata kaya.

⁷ A sa cakava kina e dua nai cabocabo-ni-soro, ka vakayacana na yasana ko ya ko Eli-Peceli: ni sa rairai vua maikea na Kalou, ni sa dro tani ko koya mai vua na tuakana.

⁸ A sa ciba ko Tepora nai mei i Repeka, a sa bulu ki ra, ki cake ko Peceli, e na ruku ni dua na oki: a sa vakatokai na yacana ko Aloni-pakuci.

⁹ A sa rairai tale na Kalou kivei Jekope, ni sa lako mai Petani-erama, a sa vosavakalougatataki koya.

¹⁰ A sa kaya vua na Kalou, Ko Jekope na yacamu; ia ena sega ni vakatokai tiko na yacamu ko Jekope, ko Isireli ga na yacamu: a sa vakatoka na yacana ko Isireli.

¹¹ Sa kaya talega vua na Kalou, Koi au na Kalou Kaukauwa: mo tubu, ka mo lewe vuqa mai; e dua na matanitu, io na matanitu e vuqa, ena tubu maivei iko, ka na lako mai na tolomu na turaga lelevu;

¹² a vanua talega ka'u a solia vei Eparaama kei Aisake, au na solia vei iko; vei ira talega na nomu kawa, ka'u na solia na vanua ko ya.

¹³ A sa lako cake maivua na Kalou, mai na tikina ka vosa kina vua.

¹⁴ A sa vakaduria na duru ko Jekope e na tikina ka vosa kina vua ko koya, io na duru vatu: a sa livia ki delana nai madrali liviraki, sa livia talega ki delana na waiwai:

¹⁵ a sa vakatoka ko Jekope na yaca ni yasana ka vosa kina vua na Kalou ko Peceli.

¹⁶ A ra sa lako tu yani mai Peceli; a ra sa bera tiko ni yaco ki Efiraca: a sa vakasucu ko Rejeli, a sa rarawa vakalevu ni vakasucu.

¹⁷ Ia ni sa taratara tiko ka rarawa vakalevu, sa kaya vua ko koya na vu-ni-kalou, Kakua ni rere; ena dua tale na luvemu tagane oqo.

¹⁸ A sa yaco ni sa lako na yalona, [ka ni sa ciba ko koya,] sa vakayacani koya ko Peni-oni: ia ko tamana sa vakatokai koya ko Penijamini.

¹⁹ A sa ciba ko Rejeli, a sa bulu e na sala ki Efiraca, [ko ya ko Pecileema].

²⁰ A sa vakaduria e dua na duru ko Jekope, e na nonai bulubulu: ko ya na duru ni bulubulu i Rejeli, ka yacova na gauna oqo.

²¹ A sa lako tu yani ko Isireli, ka sa sivia na vale cecere mai Eteri ka birika kina na nona vale laca.

²² A sa yaco ni sa tiko ko Isireli e na vanua ko ya, sa lako ko Rupeni ka moceri Pila na watina lailai i tamana: a sa rogoca ko Isireli. Ia ko ira na luve i Jekope era tagane sa le tinikarua:

²³ Na luve i Lia; ko Rupeni, na ulumatua i Jekope, kei Simioni, kei Livai, kei Juta, kei Isakari, kei Sepuloni:

²⁴ ia na luve i Rejeli; ko Josefa, kei Penijamini:

²⁵ kei na luve i Pila, na vada i Rejeli; ko Tani, kei Nafitalai:

²⁶ kei na luve i Silipa, na vada i Lia; ko Kata, kei Aseri: ko ira oqo na luve i Jekope sa sucu mai Petani-erama.

²⁷ A sa lako mai ko Jekope kivei Aisake na tamana mai Mamire, ki na koro i Aripa, [ko ya ko Epironi,] ka dautiko vulagi kina ko Eparaama kei Aisake.

²⁸ Ia na gauna i Aisake e dua na drau ka walusagavulu na yabaki.

²⁹ A sa ciba ko Aisake, ka mate yani, a sa toki yani kivei ira na kai nona, ni sa qase ka vuqa na nona yabaki: a rau sa buluti koya na luvena ko Iso kei Jekope.