Vakatekivu 34 - Vakavakadewa Makawa

Sa vaqasei Taina ko Sikemi, ka kerea me watina, 1-12. Sa kaya ko ira na luve i Jekope me ra cilivi na kai Sikemi, 13-17. Sa vinakata ko ira, 18-24. Sa samuta na koro koi rau na luve i Jekope, 25-31.

¹ Ia ko Taina, e dua na goneyalewa, na luve i Lia, kei Jekope, sa lako voli yani me raici ira na goneyalewa ni vanua ko ya:

² A sa raica ko Sikemi na luve i Amori na Aivaiti, na turaga ni vanua ko ya, a sa kauta, ka moce vata kaya, ka vaqasea.

³ A sa vinakati Taina vakalevu na luve i Jekope, a sa lomani koya na goneyalewa, ka vosa vakayalololoma vua na goneyalewa.

⁴ A sa vosa vei Amori na tamana ko Sikemi, ka kaya, Mo segata mada na goneyalewa oqo me watiqu.

⁵ A sa rogoca ko Jekope ni sa vaqasei Taina na luvena ko koya: a ra sa tiko na luvena tagane kei na manumanu mai na veico; a sa tiko lo ko Jekope ka me ra tale mada mai.

⁶ A sa lako yani vei Jekope ko Amori na tama i Sikemi, me rau veivosaki kaya.

⁷ A ra sa lako mai na veico na luve i Jekope ni ra rogoca: a ra sa rarawa na tamata, ka cudru vakalevu, ka ni sa kitaka na ka lialia vei Isireli ko koya, ni sa mocera na luve i Jekope; a ka sa sega ni dodonu me caka.

⁸ A sa veivosaki kei ira ko Amori, ka kaya, Sa guta na nomuni goneyalewa na yalona na luvequ: au masuti kemuni mo ni musuka vua me watina:

⁹ ia me da veimusumusukitaki ira na luveda me ra vakawati, mo ni musuka na nomuni goneyalewa vei keimami, ka kauta na neimami goneyalewa vei kemuni:

¹⁰ ka mo ni tiko ga kei keimami: sa koto e matamuni na vanua; mo ni tiko ka veivoli kina, ka rawata kina nai yau.

¹¹ A sa kaya ko Sikemi vua na tama ni goneyalewa kei ira na ganena, Me'u kune loloma mada e matamuni, ia na ka kemuni sa cavuta ka'u na solia:

¹² me ka levu sara nai yau kei nai solisoli kemuni na cavuta vei au, ia ka'u na solia me vaka na ka kemuni na cavuta vei au: ia mo ni musuka ga na goneyalewa me watiqu.

¹³ Ia ko ira na luve i Jekope, era sa vosa vaqaseqase vei Sikemi kei Amori na tamana, ni sa vaqasei Taina na ganedra:

¹⁴ a ra sa kaya vei rau, E dredre ni keitou cakava na ka oqo, ka me musuka na gane i keitou ki na tamata sa sega ni cilivi; ni sa rogo ca vei keitou.

¹⁵ E na ka duaduaga oqo keitou na rogoci kemudrau: Kevaka kemuni na vakataki keitou, ka me cili na nomuni tagane kecega;

¹⁶ keitou na qai musuka na neitou goneyalewa vei kemuni, ka kauta na nomuni goneyalewa vei keitou, keitou na tiko talega kei kemuni, ia eda na dua vata ga:

¹⁷ ia kevaka kemuni na sega ni rogoci keitou, mo ni cili; keitou na qai kauti koya na neitou goneyalewa, ka lako.

¹⁸ A sa vinakata na nodra vosa ko Amori, kei Sikemi na luve i Amori.

¹⁹ A sa sega ni berabera na cauravou ni kitaka na ka ko ya, ka ni sa rekitaki koya na luve i Jekope: ka sa tamata yalovakaturaga vei ira kecega e na mataqali i tamana.

²⁰ A sa lako ko Amori kei Sikemi na luvena ki na nodrau matamata-ni-koro, ka vosa vei ira na lewe ni nodrau koro ka kaya,

²¹ Ko ira na tamata oqo era tiko malua ga kei keda; me ra tiko ga e na vanua, ka veivoli kina; ka raica, sa levu na vanua me rauti ira; me da vakawati mada kei na nodra goneyalewa, me da musuka talega na noda goneyalewa vei ira:

²² e na ka ga oqo era na rogoci keda na tamata, me tiko kei keda, me da tamata vata, kevaka sa cili na tagane kecega vei keda, me vaka era sa cilivi:

²³ Ena qai sega li ni noda na nodra manumanu, kei na nodra i yau, kei na nodra pulumokau kece? me da vakarorogo ga vei ira, era na qai tiko kei keda.

²⁴ A ra sa vakarorogo vei Amori kei Sikemi na luvena ko ira kecega era curu yani e na nona matamata-ni-koro; a sa cili kecega na tagane, io ko ira kecega era curu yani e na nona matamata-ni-koro.

²⁵ Ia e na kenai katolu ni siga, ni ra sa rara, erau sa taura yadua na nonai seleiwau e lewe rua vei ira na luve i Jekope, ko Simioni kei Livai, na gane i Taina, a rau sa lako vakadoudou ki na koro, ka vakamatei ira kecega na tagane.

²⁶ A rau sa vakamatei Amori kei Sikemi na luvena e nai seleiwau, ka kauti Taina yani mai na vale i Sikemi, ka lako yani.

²⁷ Era sa qai lako mai ki na moku ko ira na luve i Jekope, ka tokitaka nai yau ni koro, ni ra sa vaqasea na ganedra:

²⁸ Era sa kauta na nodra sipi, kei na nodra pulumokau, kei na nodra asa, kei na ka sa tiko e na koro, kei na ka sa tiko mai na were;

²⁹ kei na nodra i yau kecega, kei na nodra gone kecega, kei na nodra yalewa, era kauta vakabobula ka tokia, io, na ka kecega sa tiko e vale.

³⁰ A sa kaya ko Jekope kivei Simioni kei Livai, Drau sa vakararawataki au, ni drau sa vakaboicataki au vei ira na lewe ni vanua, e na kedra maliwa na kai Kenani kei na lewe ni Veikoro lalai: ia koi au, ka lewe lailai, ka ra na soqoni vata, ka mai vakamatei au; ia ka'u na rusa vata kei na noqu mataqali.

³¹ A rau sa kaya, E vinaka li ni kitaka ko koya na gane i keirau me vaka sa yalewa dautagane?