Vakatekivu 33 - Vakavakadewa Makawa

Erau sa veitata ko Jekope kei Iso, a rau sa veilomani, 1-15. Sa lesu ki nona vanua ko Iso, 16. Sa yaco ki Sikemi ko Jekope, ka voli vanua kina, 18-20.

¹ A sa ta cake ko Jekope, a sa rai yani, ka raica, sa lako mai ko Iso, kei ira vata kaya na tamata e lewe va na drau. A sa wasei iratou na gone kivei Lia, kei Rejeli, vei rau talega na vada.

² A sa lesi rau na vada kei iratou na luvedrau me ratou liu, kei Lia kei na luvena me tarava, kei Rejeli kei Josefa me muri sara.

³ A sa liu sara vei ira ko koya, ka cuva vakavitu ki na qele, a sa toro vua na tuakana.

⁴ A sa cici ko Iso me veitata kaya, a sa mokota, ka baleta na domona, ka reguca: a rau sa tagi.

⁵ A sa ta cake, ka kunei iratou na yalewa kei na gone; a sa kaya, Ko cei ko ira oqo era tiko kei iko? A sa kaya, Na gone sa solia e na loloma na Kalou vua na nomuni tamata.

⁶ Erau sa qai toro mai na vada, koi rau, kei iratou na luvedrau, a ratou sa cuva:

⁷ ko Lia talega kei iratou na luvena, eratou sa toro mai, ka cuva: a sa oti, sa qai toro mai ko Josefa kei Rejeli, a rau sa cuva.

⁸ A sa kaya ko koya, A cava na kenai balebale ni vavakoso kecega oqo ka'u a veitata kaya? A sa kaya ko Jekope, A ka me'u kune loloma kina vua na noqu turaga.

⁹ A sa kaya ko Iso, Sa levu na noqu ka, na taciqu; me tiko ga kei iko na nomu ka.

¹⁰ A sa kaya ko Jekope, Me kakua mada, kevaka ko sa yalo vinaka vei au mo taura mada vei au na noqu ka ni loloma: ni sa vaka na noqu raica na mata ni Kalou na noqu raica na matamuni, ka ni ko sa yalovinaka vei au:

¹¹ Mo ni kauta mada na noqu ka ni loloma sa kau vei kemuni oqo; ni sa loloma vei au na Kalou, ia ka'u sa rawata na ka kecega. A sa cikevi koya; a sa qai kauta.

¹² A sa kaya ko Iso, Daru yavala mada me daru lako, ia ka'u na liutaki iko.

¹³ A sa kaya vua ko Jekope, Ko ni sa kila na noqu turaga ni ra sa malumalumu na gone, a sa vakaluveni na sipi kei na pulumokau sa tiko kei au; ni ra na mate kece talega na manumanu, kevaka era na kau vakayawa e na dua na siga:

¹⁴ ni lako mada yani na noqu turaga mo liutaki au na nomu tamata; ia koi au, ka'u na lako vakamalua me vaka era rawata na manumanu sa liu tiko, kei ira na gone, me'u yaco mada ki Sia vua na noqu turaga.

¹⁵ A sa kaya ko Iso, Me'u lesia mada eso na tamata era tiko vei au, me lako vata kei iko. A sa kaya ko koya, Mei cavai oqori? me'u kune loloma mada vua na noqu turaga.

¹⁶ A sa lesu ko Iso e na siga ko ya, e na sala ki Sia.

¹⁷ A sa lako voli yani ki Sukoci ko Jekope, a sa tara e dua na nona vale, a sa cakava eso na vale ni manumanu e na taba ni kau: o koya sa vakatokai kina na yaca ni yasana ko ya ko Sukoci.

¹⁸ A sa yaco e na vakacegu ko Jekope, ki na koro ko Sikemi, mai na vanua ko Kenani, ni sa lako mai Petani-erama ko koya; a sa birika na nona vale laca, ka me donuya na koro.

¹⁹ A sa volia e dua na tiki ni vanua, maivei ira na luve i Amori, na tama i Sikemi, e na yasana ka birika kina na nona vale laca, ka sa dua na drau nai lavo na kenai voli.

²⁰ A sa cakava maikea e dua nai cabocabo-ni-soro, a sa vakayacana ko Eli-eloe-Isireli.