Vakatekivu 3 - Vakavakadewa Makawa

Sa veretaki Ivi na gata, ka rawai koya, 1-7. Sa tarogi rau kina ko Jiova, 8-13. Sa cudruvi na gata, 14. Sa yalataki nai Vakabula, 15. Sa cudruvi na yalewa, 16. Sa cudruvi ko Atama, 17-19. A nodraui sulu, 21. Sa rau vakasevi mai Iteni, 22-24.

¹ Ia sa lawaki na gata ka lialia na manumanu kecega ni vanua ka bulia na Kalou ko Jiova. A sa kaya ko koya vua na yalewa, Oi, sa kaya bagi na Kalou mo drau kakua ni kania na vua ni kau kecega e na were?

² A sa kaya na yalewa ki na gata, Sa tara me keirau kania na vua ni veikau e na were:

³ ia na vua ni kau ga sa tu e loma ni were, sa kaya kina na Kalou, Drau kakua ni kania, drau kakua talega ni tara, de drau mate.

⁴ A sa kaya vua na yalewa na gata, Drau na sega dina ni mate:

⁵ ni sa kila na Kalou e na siga drau na kana kina ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.

⁶ Ia ni sa kunea na yalewa sa yaga na kau me kakana, a sa ka e via raica na matada, ka sa kau me da gadreva me da vuku kina, sa qai tauca na vuana, ka kania; ka solia talega vua na watina erau tiko kaya, a sa kania talega ko koya.

⁷ A sa qai yadra na matadrau, a rau sa kila ni rau sa luvawale: a rau sa cula vata na drau ni lolo, ka cakava na nodrau liku.

⁸ A rau a rogoca na domo ni Kalou ko Jiova ni sa lako voli e na were, ni sa mudremudre na siga: a rau sa vunitaki rau e loma ni veikau ni were, ko Atama kei na watina mai na mata ni Kalou ko Jiova.

⁹ A sa kaci vei Atama na Kalou ko Jiova, a sa kaya vua, Sa tiko evei ko iko?

¹⁰ A sa kaya ko koya, Ka'u a rogoca na domomuni e na were, ia ka'u a qai rere, ni'u a luvawale; ka'u a qai vunitaki au.

¹¹ A sa kaya, Ko cei sa tukuna vei iko ni ko sa luvawale? Ko sa kana beka mai na kau ka'u a vakarota vei iko mo kakua ni kana kina?

¹² A sa kaya ko Atama, Na yalewa, ko ni a solia me keirau tiko kaya, ko koya ga sa solia vei au na vua ni kau, ka'u a qai kania.

¹³ A sa kaya na Kalou ko Jiova vua na yalewa, A cava na ka oqo ko sa kitaka? A sa kaya na yalewa, Sa vosa vaqaseqase vei au na gata ka'u a qai kania.

¹⁴ A sa kaya na Kalou ko Jiova ki na gata, Ni ko a kitaka na ka oqo, ko na cudruvi vakalevu vei ira na manumanu e yavai va, vei ira talega na manumanu tawa lasa kecega ni vanua: ko na dolo ga e ketemu, ko na kania talega na kuvu ni soso, e na veisiga kecega ni nomu bula:

¹⁵ ia ka'u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubuku-ni-yavana.

¹⁶ Sa kaya vua na yalewa ko koya, Au na vakalevutaka vakalevu na nomu rarawa ni ko sa kunekune: ko na daurarawa ni ko sa vakasucu gone; ia ko na qaravi koya na watimu, ena lewai iko talega ko koya.

¹⁷ A sa kaya vei Atama, Ni ko a vakarorogo ki na vosa ni watimu, ka sa kania na vua ni kau ka'u a vakarota vei iko, ka kaya, Mo kakua ni kania: sa cudruvi na qele e na vukumu; ko na kana maikina e na rarawa e na veisiga kece ni nomu bula;

¹⁸ ena vakatubura talega vei iko na kau votovotoa kei na soni; ia ko na kania na co ni vanua:

¹⁹ e na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.

²⁰ Ia ko Atama, sa vakatoka na yaca ni watina ko Ivi [Sa bula]; ni sa tinadra na tamata kecega sa bula.

²¹ Ia na Kalou ko Jiova, sa cakava vei Atama kei na watina nai sulu kuli ni manumanu, a sa vakaisulutaki rau.

²² A sa kaya na Kalou ko Jiova, Raica, sa yaco na tamata me vaka e dua vei kedatou, me kila na ka vinaka kei na ka ca: ia oqo, de sa dodoka na ligana ka taura talega na vua ni kau ni bula, ka kania, ka bula tawa mudu kina:

²³ sa qai vakatalai koya tani kina na Kalou ko Jiova mai na were ko Iteni, ka me wereca na qele ka buli maikina ko koya.

²⁴ A sa vakaseva kina na tamata ko koya: a sa lesi rau na Jerupi me tiko mai na were ko Iteni e na yasana ki na tu-i-cake, kei na yameyame ni bukawaqa e vaka nai seleiwau, sa veigoleyaki tiko, me vakatawa na sala ki na kau ni bula.