Vakatekivu 29 - Vakavakadewa Makawa

Sa yaco ki nai keli-wai mai Karana ko Jekope, 1-8. Sa qai lako mai ko Rejeli, a sa vukea ko Jekope, 9-12, ka qai lako ki na vale i Lepani, 13,14. Sa musuki Rejeli me watina, 15-20. Sa vakaisini Jekope ko Lepani, ka soli Lia vua, 21-26. Sa qaravi Lepani tale me nona ko Rejeli, 28-30. Sa vakasucu ko Lia, 31-35.

¹ Sa qai lako tu yani ko Jekope, ka yacova na nodra vanua ko ira mai na tu-i-cake.

² A sa rai yani, ka raica, sa dua nai keli-wai e na tiki ni vanua ko ya, ka raica, sa tolu na qele ni sipi sa koto voleka kina; ni ra sa dauvagunuva na qele ni sipi mai nai keli-wai ko ya: a sa sogo na gusu ni keli-wai e na dua na vatu levu.

³ A sa dausoqoni vata ki kea na qele ni sipi kecega: a ra sa dauvaqiqica tani na vatu mai na gusu ni keli-wai, ka vagunuva na sipi, a qai vakasuka tale na vatu ki na kena tikina ki na gusu ni keli-wai.

⁴ A sa kaya vei ira ko Jekope, Kemudou maivei, na wekaqu? A ra sa kaya, Koi keitou mai Karana.

⁵ A sa kaya vei ira, Dou sa kilai Lepani na luve i Neori, se segai? A ra sa kaya, Keitou sa kila.

⁶ A sa kaya vei ira, Sa bula vinaka, se segai? A ra sa kaya, Sa bula vinaka; ka raica, sa lako tiko mai ko Rejeli na luvena yalewa kei na sipi.

⁷ A sa kaya ko koya, Raica, sa siga levu toka, ka sa bera na gauna me soqoni vata kina na manumanu: dou vagunuva mada na sipi, ka la'ki vakania.

⁸ A ra sa kaya, E dredre, me sa soqoni vata kece mada na qele ni sipi, ka vaqiqici tani na vatu mai na gusu ni keli-wai; keitou qai vagunuva na sipi.

⁹ Ni sa veivosaki tiko kei ira, sa lako mai ko Rejeli kei na sipi nei tamana: ni sa dauvakatawa ko koya.

¹⁰ Ia ni sa kunei Rejeli ko Jekope, ko koya na luve i Lepani na gane i tinana, kei na sipi nei Lepani na gane i tinana, sa qai toro ko Jekope, ka vaqiqica na vatu mai na gusu ni keli-wai, ka vagunuva na qele ni sipi nei Lepani na gane i tinana.

¹¹ A sa reguci Rejeli ko Jekope, ka tabalaka na domona, ka tagi:

¹² a sa tukuna vei Rejeli ko Jekope ni sa taci i tamana, ka ni sa luve i Repeka: a sa cici yani ko koya, ka tukuna vei tamana.

¹³ Ia ni sa rogoca ko Lepani nai tukutuku kei Jekope na luve i ganena, sa qai cici yani me la'ki veitata kaya, a sa mokota, ka reguca, ka kauti koya ki na nona vale. A sa mani tukuna vei Lepani na ka kecega oqo.

¹⁴ A sa kaya vua ko Lepani, E dina ko sa suiqu ka lewequ. A sa tiko kaya ka vula dua.

¹⁵ A sa kaya vei Jekope ko Lepani, E dodonu li mo qaravi au walega ni ko sa wekaqu? mo tukuna vei au se cava me kemui voli.

¹⁶ A sa le rua na luvena yalewa ko Lepani: a yacana ka qase ko Lia, ia sa yacana ka gone ko Rejeli;

¹⁷ sa mata malumalumu ko Lia; ia ko Rejeli, sa yago vinaka, ka matavinaka.

¹⁸ A sa lomani Rejeli ko Jekope; a sa kaya, Au na qaravi iko ka yabaki vitu me noqu ko Rejeli na luvemu ka gone.

¹⁹ A sa kaya ko Lepani, E vinaka me'u solia vei iko, ka ca me'u solia vua e dua na tamata tani: tiko mada vei au.

²⁰ A sa qaravi koya ko Jekope ka yabaki vitu me nona ko Rejeli; a sa vaka sa bogi vica walega vua e na vuku ni nona loloma vua.

²¹ A sa kaya vei Lepani ko Jekope, Mo solia mada na watiqu, ni sa oti na noqu cakacaka, ka me'u la'ki curu vua.

²² A sa vakasoqoni ira vata ko Lepani na tamata kecega e na yasana ko ya, ka cakava e dua na magiti.

²³ Ia e na yakavi, sa tuberi Lia na luvena, ka kauta vua; a rau sa veiyacovi kaya.

²⁴ A sa soli Silipa na nona vada ko Lepani kivei Lia na luvena, me nona vada.

²⁵ Ia e na mataka, raica, sai koya ko Lia: a sa kaya ko koya vei Lepani, A cava oqo ko sa cakava vei au? au a sega li ni qaravi iko me watiqu ko Rejeli? a cava ko sa qai vakaisini au kina?

²⁶ A sa kaya ko Lepani, E sega ni kenai valavala e na neimami vanua, me soli koya eliu na gone, ka soli koya emuri na qase:

²⁷ mo vakaotia mada na kena wiki, keitou na qai soli koya talega oqo vei iko, e na vuku ni nomu cakacaka vei au ka yabaki vitu tale.

²⁸ A sa kitaka vakakina, ko Jekope, ka vakaotia na kena wiki: ka sa soli Rejeli na luvena ko koya vua me watina.

²⁹ A sa soli Pila na nona vada ko Lepani kivei Rejeli na luvena, me nona vada.

³⁰ A sa curu talega vei Rejeli ko Jekope, a sa lomani Rejeli ga ka cati Lia, a sa qaravi koya ka vitu tale na yabaki.

³¹ A sa raica ko Jiova ni sa cati ko Lia, a sa vakarawarawataka vua me vakasucu: ia sa yava ga ko Rejeli.

³² A sa kunekune ko Lia, a sa vakasucuma na luvena tagane, a sa vakayacani koya ko Rupeni: ni sa kaya, Sa kunea dina ko Jiova na noqu rarawa: o koya oqo sa na qai lomani au na watiqu.

³³ A sa kunekune tale, ka vakasucuma na gonetagane; a sa kaya, Ni sa rogoca ko Jiova ni'u a cati, sa solia kina vei au na gone tagane talega oqo: a sa vakayacani koya ko Simioni.

³⁴ A sa kunekune tale, ka vakasucuma na gonetagane; a sa kaya, Sa na qai vakabiti vei au na watiqu, ni'u sa vakasucuma e le tolu na luvena tagane: ka sa vakayacani koya kina ko Livai.

³⁵ A sa kunekune tale, a sa vakasucuma na gonetagane; a sa kaya, Au na qai ia na vakavinavinaka vei Jiova: a sa vakayacani koya kina ko Juta: a sa qai cegu ni vakasucu.