Vakatekivu 26 - Vakavakadewa Makawa

Sa tiko ko Aisake mai Kira e na dausiga, 1-5. Sa vunitaki watina ko Aisake, 6-11. Sa tubu me tamata yaco ko Aisake, 12-25. Sa la'ki veiyalayalati kaya ko Apimeleki, 26-33. Sa vakawati ko Iso, 34,35.

¹ A sa dausiga na vanua, ka dua tani nai matai ni dausiga ka yaco e na gauna i Eparaama. A sa lako ko Aisake kivei Apimeleki na tui ni kai Filisitia, ki Kira.

² A sa rairai vua ko Jiova, ka kaya, Mo kakua ni lako sobu ki Ijipita; mo tikotiko ga e na vanua ka'u a vosa kina vei iko:

³ mo tiko vulagi ga e na vanua oqo, ia ka'u na tiko vata kei iko, ka vakalougatataki iko: ni'u na solia vei iko, kei ira na nomu kawa, na veivanua kecega oqo; ia ka'u na vakataudeitaka na noqu bubului vei Eparaama na tamamu:

⁴ ia ka'u na vakalewevuqataka na nomu kawa me ra vaka na kalokalo kei lomalagi, ka solia talega na veivanua kecega oqo vei ira na nomu kawa; ena kalougata talega na veimatanitu kecega e vuravura e na nomu kawa;

⁵ ni sa vakarorogo ki na noqu vosa ko Eparaama, ka vakabauta na ka ka'u a lesia, na noqu i vakaro, na noqu i lesilesi, kei na noqu lewa.

⁶ A sa tiko ga mai Kira ko Aisake:

⁷ ia ko ira na tamata e na yasana ko ya, era taroga e na vuku ni watina: a sa kaya ko koya, A ganequ ko koya; ni sa rere ni kaya, A watiqu; ni sa kaya, De ra vakamatei au na tamata e na yasana ko ya e na vuku i Repeka, ni sa matavinaka ko koya.

⁸ Ia ni sa tiko vakadede maikea ko koya, sa iro yani e na katuba ko Apimeleki na tui ni kai Filisitia, a sa raici Aisake ni rau sa veiqitori kei Repeka na watina.

⁹ A sa kacivi Aisake ko Apimeleki, ka kaya, Raica, sa dina ga sa watimu: ia ka cava ko a kaya kina, sa ganemu ko koya? A sa kaya vua ko Aisake, E na vuku ni'u a kaya, De'u mate e na vukuna.

¹⁰ A sa kaya ko Apimeleki, A cava mada na ka oqo ko sa mai kitaka vei keimami? e rawarawa me veimoceri loa kei na watimu e dua vei ira na tamata, ia ko sa qai vakavuna vei keimami nai valavala ca.

¹¹ A sa vakaroti ira kecega na tamata ko Apimeleki, ka vaka, Ko koya sa tara na tamata oqo, se na watina, ena vakamatei vakaidina.

¹² A sa kabukaburaka e na vanua ko ya ko Aisake, ka kumuna na kena vakadrau e na yabaki ko ya: ka sa vakalougatataki koya ko Jiova:

¹³ a sa tubu me tamata yaco na tamata oqo, a sa lako cake ka tubu tiko me vutuniyau sara:

¹⁴ ni sa taukena na qele ni sipi, ka taukena na qele ni pulumokau, a sa le vuqa na nona tamata. A ra sa vuvutaki koya na kai Filisitia.

¹⁵ Ia nai keli-wai kecega era kelia na tamata nei tamana, e na gauna i Eparaama na tamana, era sa vakasosoga e na qele ko ira na kai Filisitia.

¹⁶ A sa kaya vei Aisake ko Apimeleki, Mo lako tani vei keimami; ni ko sa kaukauwa sara, a sa malumalumu koi keimami.

¹⁷ A sa lako tani maikea ko Aisake, ka birika na nona veivale laca e na buca mai Kira, a sa tiko maikea.

¹⁸ A sa kelia tale ko Aisake nai keli-wai, sa keli eliu e na gauna i Eparaama na tamana; ni ra sa vakasosoga na kai Filisitia ni sa mate ko Eparaama: a sa vakayacana e na yaca ka vakatoka kina eliu ko tamana.

¹⁹ A ra sa kelikeli e na buca na tamata nei Aisake, ka sa rawa kina e dua nai keli-wai vure.

²⁰ A sa veileti ko ira nai vakatawa ni manumanu mai Kira kei ira nai vakatawa ni manumanu i Aisake, a ra sa kaya, Sa neitou na wai: a sa vakatoka ko koya na yaca ni keli-wai ko Eseki; e na vuku ni ra sa veileti kaya.

²¹ A ra sa kelia e dua tale nai keli-wai, a ra sa veileti talega kina; a sa vakayacana ko koya ko Sitina.

²² A sa toki maikea, ka kelia e dua tale nai keli-wai; a ra sa sega ni veileti kina; a sa vakayacana ko koya ko Riopoci; ni sa kaya, Sa qai vakalalagataki keda ko Jiova, ia eda na qai tubu e na vanua oqo.

²³ A sa lako cake maikea ki Pieri-sepa.

²⁴ A sa rairai vua ko Jiova e na bogi ko ya, ka kaya, Koi au na Kalou i Eparaama na tamamu; kakua ni rere, ni'u sa tiko vata kei iko, ia ka'u na vakalougatataki iko, ka vakalewevuqataka na nomu kawa, e na vuku i Eparaama na noqu tamata.

²⁵ A sa cakava maikea e dua nai cabocabo-ni-soro, ka masuta na yaca i Jiova, a sa birika maikea na nona vale laca: a ra sa kelia maikea e dua nai keli-wai na tamata i Aisake.

²⁶ A sa lako vua ko Apimeleki mai Kira kei Ausaci e dua na nonai tokani, kei Fikoli na kapiteni ni nonai valu.

²⁷ A sa kaya vei iratou ko Aisake, A cava dou sa lako mai kina vei au, ni dou sa cati au, ka talai au tani vei kemudou?

²⁸ A ratou sa kaya, Keitou a kunea vakaidina ni sa tiko kei kemuni ko Jiova: ia keitou a kaya, Me dua mada na bubului vei kedatou, io vei keitou kei kemuni, me keitou ia talega na veiyalayalati kei kemuni;

²⁹ ka mo ni kakua ni vakacacani keitou, me vaka keitou a sega ni vakacacani kemuni, ni keitou sa sega ni cakava vei kemuni e dua na ka ca, na ka vinaka ga, ka sa talai kemuni yani e na vakacegu: ia koi kemuni, ko sa kalougata vei Jiova.

³⁰ A sa caka magiti vei iratou ko koya, a ratou sa kana ka gunu.

³¹ A ratou sa sou e na mataka, ka bubului vakai iratou: a sa talatala vei iratou ko Aisake, a ratou sa lako tani vua e na vakacegu.

³² Ia e na siga dina ko ya, era sa lako mai na tamata nei Aisake, ka tukutuku vua e na vuku ni keli-wai era sa kelia, ka vaka, Keitou sa kunea na wai.

³³ A sa vakayacana ko koya ko Sepa: o koya sa vakatokai kina na yaca ni koro ko ya ko Pieri-sepa ka yacova na gauna oqo.

³⁴ Ia ni sa vasagavulu na yabaki i Iso, sa vakawati kei Jutici, ko koya na luve i Pieri vei ira na Itaiti, kei Pasemaca na luve i Eloni vei ira na Itaiti:

³⁵ ia koi rau oqo sa rarawa kina na loma i Aisake kei Repeka.