Vakatekivu 25 - Vakavakadewa Makawa

A kawa i Eparaama ni sa watina ko Ketura, 1-4. Sa vola na nonai yau, a sa mate, 5-10. A kawa i Isimeli, 12-18. Sa sucu ko Jekope kei Iso, 19-26. Sa volitaka na nonai tutu vakaulumatua ko Iso, 29-34.

¹ A sa la'ki vakawati tale ko Eparaama, ia na yaca ni yalewa ko Ketura:

² a sa luvedrau ko Simirani, kei Jokisani, kei Mitani, kei Mitiani, kei Isipaki, kei Sua.

³ Ia na luve i Jokisani ko Sipa, kei Titana. Ia na luve i Titana, era tagane, ko Asuri, kei Letusi, kei Leumi.

⁴ Ia na luve i Mitiani era tagane, ko Ifa, kei Iferi, kei Enoke, kei Apaita, kei Elitea. Ko ira kece oqo na luve i Ketura.

⁵ A sa solia ko Eparaama na nona ka kecega vei Aisake.

⁶ Ia vei ira na luvedratou na watina lalai, sa solia eso na ka ni loloma ko Eparaama, ni sa bula tiko ka talai ira tani maivei Aisake na luvena, vaka ki na tu-i-cake, ki na vanua vaka isiti.

⁷ Ia na yabaki ni bula i Eparaama, ka bula kina ko koya, sa dua na drau ka vitusagavulu ka lima na yabaki.

⁸ Sa qai ciba ko Eparaama, ka mate yani, ni sa qase vinaka mai, ia sa tamata qase, ka yabaki vuqa sara; a sa toki yani vei ira na kai nona.

⁹ Ia koi rau na luvena ko Aisake kei Isimeli, erau a buluta e na qara-vatu mai Makipila, e nona tiki ni vanua ko Efironi na luve i Soari na Itaiti, sa donui Mamire;

¹⁰ na tiki ni vanua ka volia ko Eparaama maivei ira na Itaiti: erau sa bulu kina ko Eparaama kei Sera na watina.

¹¹ Ia ni sa mate ko Eparaama, sa vakalougatataki Aisake na luvena na Kalou: a sa tiko ko Aisake mai nai keli-wai ko Leai-roi.

¹² Ia oqo na kawa i Isimeli, na luvedrau ko Eparaama kei Eka, na yalewa ni Ijipita, na vada i Sera:

¹³ ia na yacadra na luve i Isimeli, era tagane, na yacadra me vaka na nodra veimataqali: na ulumatua i Isimeli, ko Nepeioci, kei Kitari, kei Atipieli, kei Mipisami,

¹⁴ kei Misima, kei Tuma, kei Masa,

¹⁵ ko Etari, kei Tima, ko Jeturi, ko Nefisi, kei Ketema:

¹⁶ ko ira oqo na luve i Isimeli, kei na yacadra me vaka na nodra veikoro, kei na nodra i tikotiko; e le tinikarua na turaga me vaka na nodra veivanua.

¹⁷ Ia na yabaki ni bula i Isimeli, e dua na drau ka tolusagavulu ka vitu na yabaki: a sa ciba ko koya, ka mate yani, ka sa toki yani vei ira na kai nona.

¹⁸ A ra sa taukena na vanua mai Avila ka kauta ki Suri, ko ya sa donui Ijipita, e na sala vaka ki Asiria: ka sa tiko ko koya me donui ira na wekana kecega.

¹⁹ Ia oqo na kawa i Aisake, na luve i Eparaama: sa sucu na luve i Eparaama ko Aisake:

²⁰ ia sa vasagavulu na yabaki i Aisake, ni sa vakawati kei Repeka, na luve i Pecueli na kai Siria mai Petani-erama, na gane i Lepani na kai Siria.

²¹ A sa vakamasuti Jiova ko Aisake e na vuku ni watina, ni sa yava: a sa rogoci koya ko Jiova, a sa kunekune ko Repeka na watina.

²² A rau sa veivala na gone e ketena: a sa kaya ko koya, Kevaka sai koya, a cava ka'u sa vaka kina oqo? A sa la'ki tarogi Jiova.

²³ A sa kaya vua ko Jiova, E rua na matanitu sa tiko e ketemu, Ia e rua na vanua mai na ketemu, erau na tawasei; Ia ena kaukauwa e dua na vanua ka malumalumu na vanua kadua; Ia ko koya sa qase ena qaravi koya sa gone.

²⁴ Ia ni sa yaco na siga me vakasucu kina, raica, sa drua e ketena.

²⁵ A sa sucu mai nai kadua ka sa damudamu taucoko, sa vaka e dua nai sulu vutivuti; a ra sa vakayacani koya ko Iso:

²⁶ a sa oti, sa qai sucu mai na tacina, a sa taura tu na bukubuku-ni-yava i Iso na ligana; a sa vakayacani ko Jekope: a sa onosagavulu na yabaki i Aisake ni rau sa sucu.

²⁷ A rau sa tubu na gone: a sa yaco me kena dau ni tobo manumanu e yavai va ko Iso, a tamata daulasa mai veikau; ia ko Jekope na tamata dautiko malua, ka sa tiko e na vale laca.

²⁸ A sa lomani Iso ko Aisake, ka ni sa daukania na manumanu sa toboka; ia ko Repeka sa lomani Jekope.

²⁹ A sa vakasasaqa rourou ko Jekope: a sa lako mai veikau ko Iso, a sa viakana;

³⁰ a sa kaya vei Jekope ko Iso, Mo vakani au mada e na rourou damudamu ko ya; ni'u sa viakana: o koya sa vakatokai kina na yacana ko Itomi Damudamu.

³¹ A sa kaya ko Jekope, Mo volitaka vei au edaidai na nomu i tutu ni ulumatua.

³² A sa kaya ko Iso, Raica, ka'u sa vakarau mate; ka cava na kena yaga vei au na noqu i tutu ni ulumatua?

³³ A sa kaya vua ko Jekope, Mo bubului kina vei au edaidai: a sa bubului kina vua; a sa volitaka na nona i tutu ni ulumatua vei Jekope.

³⁴ A sa solia vei Iso ko Jekope na madrai, kei na rourou; a sa kana ka gunu, ka cavu tu, ka lako yani. Ia sa beca ko Iso na nonai tutu ni ulumatua.