Vakatekivu 23 - Vakavakadewa Makawa

A mate i Sera, 1,2. Sa volia ko Eparaama e dua na tiki ni vanua mei bulubulu, a sa buluti Sera, 3-20.

¹ Ia ko Sera, sa dua na drau ka ruasagavulu ka vitu na nona yabaki: oqo na veiyabaki ni bula i Sera.

² Sa ciba ko Sera mai Kiriaci-aripa, (ko ya ko Ipironi,) e na vanua ko Kenani: a sa lako mai ko Eparaama me yasovaki Sera, ka tagicaki koya.

³ A sa tu cake ko Eparaama mai vua na nona ka mate koto, ka vosa vei ira na luve i Eci, ka kaya,

⁴ Koi au na kai tani ka sa tiko vakavulagi vei kemudou: dou solia mai me noqu e dua na tiki ni vanua mei bulubulu vei kemudou, me'u buluta kina na noqu mate me yali kina e mataqu.

⁵ A ra sa vosa vei Eparaama na luve i Eci, ka kaya vua,

⁶ Mo ni rogoci keitou mada, noqu turaga: Koi kemuni na turaga sa vaka na kalou e na keimami maliwa: e na neimami bulubulu digitaki mo ni buluta nomuni mate: sa sega e dua na tamata me bureitaka vei kemuni na nonai bulubulu, ka mo ni buluta ga na nomuni mate.

⁷ A sa tu cake ko Eparaama, ka cuva vei ira na lewe ni vanua, io vei ira na luve i Eci;

⁸ a sa veivosaki kei ira, ka kaya, Kevaka sa lomamudou me'u buluta na noqu mate me yali e mataqu, dou rogoci au mada, ka vakamasuti Efironi na luve i Soari e na vukuqu,

⁹ me solia vei au na nona qara-vatu mai Makipila, sa tu yani mai nai yalayala ni nona veiwere: ia me solia mada me noqu, ka me'u solia vua na kenai voli dodonu e nai lavo, ka me noqu tiki ni vanua mei bulubulu e na kemudou maliwa.

¹⁰ A sa tiko e na kedra maliwa na Itaiti ko Efironi. A sa vosa vei Eparaama ko Efironi na Itaiti, ni ra rogoca tiko na Itaiti kecega, io ko ira kecega era curu ki na matamata ni nona koro a sa kaya,

¹¹ Me kakua mada noqu turaga, mo ni rogoci au ga: a tiki ni vanua ko ya, ka'u sa solia vei kemuni, kei na qara-vatu sa tiko kina, ka'u sa solia vei kemuni, e na mata ni luvedra na noqu mataqali, ka'u sa solia vei kemuni: ni buluta mada na nomuni mate.

¹² A sa cuva sobu e matadra na lewe ni vanua ko Eparaama;

¹³ a sa vosa vei Efironi ni ra rogoca tiko na lewe ni vanua, ka kaya, Kevaka sa vinaka vei kemuni, mo ni rogoci au mada: au na solia nai lavo mei voli ni tiki ni vanua; mo ni taura mada, ka'u na qai buluta kina na noqu mate.

¹⁴ A sa vosa vei Eparaama ko Efironi, ka kaya vua,

¹⁵ Mo ni rogoci au mada, noqu turaga: a tiki ni vanua ko ya, sa rauta e va na drau na sikeli siliva; a cava oqo vei kedaru? ni buluta ga na nomuni mate.

¹⁶ A sa vakarorogo vei Efironi ko Eparaama; a sa vakarautaka na siliva ko Eparaama me nei Efironi, ka cavuta ko koya ni ra rogoca na Itaiti, e va na drau na sikeli siliva, nai lavo sa taurivaki vei ira na tamata dauveivoli.

¹⁷ Ia na tiki ni vanua nei Efironi mai Makipila, sa donui Mamire, na tiki ni vanua, kei na qara-vatu sa tiko kina, kei na kau kecega e na tiki ni vanua ko ya, sa volita na kena veiyasana kecega, sa vakataudeitaki

¹⁸ vei Eparaama me nona, e matadra na Itaiti, e na kedra maliwa kecega era curuma na nona matamata ni koro.

¹⁹ Sa oti na ka oqo, sa qai buluti Sera na watina ko Eparaama e na qara-vatu e na tiki ni vanua mai Makipila, sa donui Mamire: (ko ya ko Epironi) mai na vanua ko Kenani.

²⁰ Ia na tiki ni vanua, kei na qara-vatu sa tiko kina, sa vakataudeitaki vei Eparaama, me nona vanua ni bulubulu maivei ira na Itaiti.