Vakatekivu 22 - Vakavakadewa Makawa

Sa kaya vei Eparaama ko Jiova me vakacabora na luvena, 1,2. A sa vakabauta ko Eparaama; a sa tarova na Kalou; a sa qai vakacabora na sipi mei sosomi ni luvena, 3-14. Sa vosavakalougatataki Eparaama na Kalou, 15-19. A kawa ni tuaka i Eparaama, 20-24.

¹ Sa oti na ka oqori, sa qai vakatovolei Eparaama na Kalou, a sa kaya vua, I Eparaama. A sa kaya ko koya, Koi au, noqu Turaga

² A sa kaya ko koya, Mo kauta mada na luvemu, na luvemu e dua bauga, ko Aisake ko sa lomana, ka lako ki na vanua mai Moraia; ka vakacabori koya kina mei soro kama e na dua na ulu-ni-vanua ka'u na vakatakila vei iko.

³ A sa sou e na mataka ko Eparaama, ka vauca nai vodovodo ki na nona asa, ka kauta vata kaya e le rua na nona cauravou, kei Aisake na luvena, ka taya na buka ni soro kama, ka ia, ka lako vaka ki na yasana ka vosa kina vua na Kalou.

⁴ Ia e na kenai katolu ni siga sa ta cake ko Eparaama, ka raica na yasana ni sa vakayawa tu.

⁵ A sa kaya ko Eparaama vei rau na nona cauravou, Drau tikotiko ga eke kei na asa; ia keirau na lako kei na gone ki na yasana ko ya me soro, ka lako tale mai vei kemudrau.

⁶ A sa kauta na buka ni soro kama ko Eparaama, ka tauca vei Aisake na luvena; a sa kauta e ligana na buka sa waqa, kei nai sele: e rau a lako vata ruarua.

⁷ A sa vosa vei Eparaama na tamana ko Aisake, ka kaya, I ratu. A sa kaya, Sa vakaevei, na luvequ. A sa kaya ko Aisake, Sa tu na buka kei na buka sa waqa; ia sa evei mada na lami mei soro kama?

⁸ A sa kaya ko Eparaama, Na luvequ, ena vakarautaka na Kalou e dua na nona lami mei soro kama. A rau a lako vata ruarua tiko.

⁹ A rau a yaco ki na tikina ka vosa kina vua na Kalou; a sa cakava maikina nai cabocabo-ni-soro ko Eparaama, a sa tuva na buka; a sa vesuki Aisake na luvena, ka vakotora ki nai cabocabo-ni-soro e na dela ni buka.

¹⁰ A sa dodoka na ligana ko Eparaama, ka taura nai sele, ka me vakamatea na luvena.

¹¹ A sa kaci vua mai lomalagi ko koya na Agilose i Jiova, a sa kaya, I Eparaama, i Eparaama! A sa kaya, Koi au ga noqu Turaga.

¹² A sa kaya ko koya, Mo kakua ni dodoka na ligamu vua na gone, ia mo kakua ni kitaka vua e dua na ka: ni'u sa qai kila ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga.

¹³ A sa ta cake ko Eparaama, ka rai voli, ka raica, sa tiko mai dakuna e dua na sipi tagane sa tacori e na kau na kenai leu; a sa la'ki taura mai na sipi tagane ko Eparaama, ka vakacabora mei soro kama mei sosomi kei luvena.

¹⁴ A sa vakatoka na yaca ni tikina ko ya ko Eparaama ko Jiova jaire: me vaka sa kainaki ka yacova na siga oqo, Mai na ulu-ni-vanua ena vakarautaka ko Jiova.

¹⁵ A sa kaci vakarua vei Eparaama mai lomalagi ko koya na Agilose i Jiova,

¹⁶ ka kaya, Sa vaka ko Jiova, Au sa bubului ki na yacaqu; ni ko sa cakava na ka oqo, ka sa sega ni bureitaka na luvemu, na luvemu e dua bauga;

¹⁷ au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi, kei na nuku mai matasawa; ia ena taukena na matamata-ni-koro ni nodra meca ko ira na nomu:

¹⁸ ena kalougata talega na veimatanitu kecega e vuravura e na nomu kawa; ni ko a vakarorogo ki domoqu.

¹⁹ A sa lesu tale vei rau na nona cauravou ko Eparaama; a ratou sa cavu tu ka lako vata ki Pieri-sepa: a sa tiko mai Pieri-sepa ko Eparaama.

²⁰ Sa oti na ka oqo sa tukuni vei Eparaama, ka vaka, Raica, ko Milika, sa vakasucu gone talega era luvei Neori na tuakamu;

²¹ ko Usa na nona ulumatua, kei Pusa na tacina, kei Kemueli na tama i Erami,

²² kei Kiseti, kei Eso, kei Pilitasa, kei Jetilafi, kei Pecueli:

²³ ia sa luve i Pecueli ko Repeka: ko iratou na lewe walu oqo sa vakasucuma ko Milika, na tamadratou ko Neori na tuaka i Eparaama.

²⁴ A watina lailai talega, na yacana ko Reuma, sa vakasucumi Tipa, kei Keama, kei Teasi, kei Meeka.