Vakatekivu 21 - Vakavakadewa Makawa

Sa sucu ko Aisake, 1-8. Sa vakatalai tani ko Eka kei Isimeli, a sa voleka ni mate e na viagunu, a sa vakaraitaki na wai, 9-21. Sa ia na veiyalayalati kei Eparaama ko Apimeleki, 22-34.

¹ A sa talevi Sera ko Jiova me vaka ka kaya eliu, a sa cakacaka vei Sera ko Jiova me vaka na nona vosa.

² A sa kunekune ko Sera, ka vakasucuma vei Eparaama e dua na luvena tagane ni sa qase mai ko koya, e na gauna ka loku, ka sa vosa kina vua na Kalou.

³ Ia ko Eparaama sa vakayacana na luvena ko Aisake o koya ka vakasucuma ko Sera.

⁴ A sa cilivi Aisake na luvena ko Eparaama, ni sa qai bogi walu, me vaka ka vakarota vua na Kalou.

⁵ A sa dua na drau na yabaki i Eparaama, ni sa sucu na luvena ko Aisake.

⁶ A sa kaya ko Sera, Sa vakadredretaki au na Kalou; era na dredre vata kei au ko ira kece era na rogoca.

⁷ Sa kaya talega ko koya, Ko cei me kaya vei Eparaama eliu, ena vakasucuma na gone ko Sera? ni'u sa vakasucuma e dua na luvena tagane ni sa qase mai ko koya.

⁸ A sa tubu na gone, ka sa kali: a sa cakava e dua na magiti levu ko Eparaama e na siga ka kali kina ko Aisake.

⁹ Ia ko Sera sa raica na luvedrau ko Eka na yalewa ni Ijipita, kei Eparaama, ni sa veivakalialiai tiko.

¹⁰ A sa kaya kina vei Eparaama ko koya, Mo vakatala yani na yalewa bobula oqo kei na luvena: ni na sega ni taukei vata na luvena na yalewa bobula oqo kei na luvequ ko Aisake.

¹¹ A sa ka ni rarawa sara vei Eparaama na ka oqo, ka e na vuku ni luvena.

¹² A sa kaya vei Eparaama na Kalou, Me kakua ni ka ca vei iko e na vuku ni gone, e na vuku talega ni nomu yalewa bobula: na ka kecega sa kaya vei iko ko Sera, mo vakayacora; ni na vakatokai me nomu na kawa i Aisake ga:

¹³ ia ko koya talega na luvena na yalewa bobula ka'u na vakatubura me matanitu, ni sa nomu kawa.

¹⁴ A sa sou e na mataka ko Eparaama, ka kauta na kakana, kei na saqa wai, ka solia vei Eka, ka viritaka ki na usouso ni domona, kei na gone, ka vakatala yani: a sa lako yani ko koya, a sa lako sese voli mai na loma ni vanua mai Pieri-sepa.

¹⁵ A sa maca na saqa, a sa biuta na gone ko koya ki na dua na ruku ni kau:

¹⁶ a sa la'ki tiko me donuya, sa vakabeka na kena yawa sa vanataki e dua na gasau: ni sa kaya ko koya, Me'u kakua ni raica ni ciba na gone. A sa tiko donuya, a sa tabalaka na domona, ka tagi.

¹⁷ A sa rogoca na domo ni gone na Kalou; a sa kaci vei Eka na agilose ni Kalou mai lomalagi, a sa kaya vua, A cava sa manati iko, Eka? kakua ni rere; ni sa rogoca na Kalou na domo ni gone e na tikina sa koto kina:

¹⁸ mo tu cake, mo keveta cake na gone, ka taura e ligamu; ni'u na vakamatanitulevutaki koya.

¹⁹ A sa vakamatamatuataki koya na Kalou, a sa kunea e dua nai keli wai; a sa lako ko koya, ka vakasinaita na saqa e na wai, ka vagunuva na gone.

²⁰ A sa tiko kei na gone na Kalou; a sa tubu ko koya, ka tiko mai na loma ni vanua, ka yaco me tamata dauvanavana.

²¹ A sa tiko mai na lekutu mai Perana: a sa kauta vua ko tinana e dua me watina mai na vanua ko Ijipita.

²² Ia e na gauna ko ya, erau a vosa vei Eparaama ko Apimeleki, kei Fikoli na kapiteni ni nonai valu, ka rau kaya, Sa tiko vata kei iko na Kalou e na ka kecega ko sa cakava:

²³ o koya mo bubului eke vua na Kalou ni ko na sega ni valavala vakailasu vei au, se vua na luvequ, se vua na makubuqu: mo kitaka ga vei au, ki na vanua talega ko sa tiko vulagi kina, me vaka na loloma ka'u sa kitaka vei iko.

²⁴ A sa kaya ko Eparaama, Au na bubului vakakina.

²⁵ A sa vunauci Apimeleki ko Eparaama e na vuku ni keli wai, era kovea na tamata nei Apimeleki.

²⁶ A sa kaya ko Apimeleki, Au sa sega ni kila se ko cei sa kitaka na ka oqo: ia ko iko talega ko a sega ni mai tukuna vei au, ia ka'u a sega talega ni rogoca eliu au kila edaidai ga.

²⁷ A sa kauta na sipi kei na pulumokau ko Eparaama, ka solia vei Apimeleki; a rau a veiyalayalati koi rau.

²⁸ A sa kauta e vitu na lami yalewa ko Eparaama me tu vakai iratou.

²⁹ A sa kaya vei Eparaama ko Apimeleki, Sa vakaevei na lami yalewa e vitu oqo, ko sa kauta me tu vakai iratou?

³⁰ A sa kaya, Mo kauta mada vei au na lami yalewa e vitu, me noqu i vakadinadina, ni ka'u sa kelia nai keli-wai oqo.

³¹ O koya sa vakatokai kina na tikina ko ya ko Pieri-sepa; ni rau a bubului ruarua.

³² A rau sa ia na veiyalayalati mai Pieri-sepa: sa qai cavu tu ko Apimeleki, kei Fikoli na kapiteni ni nonai valu, a rau a lesu tale ki na vanua ko Filisitia.

³³ A sa tea mai Pieri-sepa e dua na kau ko Eparaama, ka masuta maikina na yaca i Jiova, na Kalou e Sega ni mudu.

³⁴ A sa vuqa na siga sa tiko kina ko Eparaama e na vanua ko Filisitia.