Vakatekivu 18 - Vakavakadewa Makawa

E le tolu na agilose sa lako vei Eparaama, a sa caka kedratou ko koya, 1-8. Sa vakatitiqa ko Sera ni na dua na luvena, 9-15. Sa tukuni vei Eparaama na ka ena yacovi Sotoma, 16-22. Sa vakamamasu ko Eparaama, 23-33.

¹ A sa rairai vua ko Jiova e na kau eso mai Mamire: a sa tiko ko koya e na katuba ni vale laca ni sa katakata na siga:

² a sa ta cake ka rai voli, ka raica, sa tu voleka vua e lewe tolu na tamata: ia ni sa raici iratou, sa cici yani e na katuba ni vale laca me la'ki tavaki iratou, ka sa cuva vaka ki na qele,

³ a sa kaya, Kemuni na noqu Turaga, kevaka ka'u sa kune loloma e matamuni, mo ni kakua mada ni lako tani vua na nomuni tamata:

⁴ me kau mada mai e dua na wai lailai, mo dou vuya mada na yavamudou, ka vakacegu e na rugurugua ni kau:

⁵ ia ka'u na kauta mai e dua na tiki ni madrai, ia dou vakaceguya mada na lomamudou; sa oti dou na qai lako yani: ni sa ka oqo dou sa lako mai kina vei au na nomudou tamata. A ratou a kaya, Mo kitaka mada me vaka ko sa kaya.

⁶ A sa lako vakatotolo ki loma ni vale laca kivei Sera ko Eparaama, a sa kaya, Mo kusarawa mo vakarautaka e tolu nai vakarau madrai droka; mo natuka, ka tavuna eso na keki.

⁷ A sa cici ko Eparaama, ki na qele ni pulumokau ka kauta mai e dua na luve ni pulumokau sa malumu na lewena ka vinaka, ka solia vua e dua na cauravou; a sa kusarawa ko koya ni vakarautaka.

⁸ A sa kauta na pata, kei na wai-ni-sucu, kei na luve ni pulumokau sa vakabuta oti, a sa tauca vei iratou; a sa tu voleka vei iratou ko koya e ruku ni kau, a ratou a kana.

⁹ A ratou a kaya vua, Sa evei ko Sera na watimu? A sa kaya ko koya, Raica, sa tiko mai vale.

¹⁰ A sa kaya ko koya, Au na lesu vakaidina mai vei iko me vaka na kena gauna; ka raica, ena dua na luvena tagane ko Sera na watimu. A sa rogoca ko Sera mai na katuba ni vale laca, sa tu mai dakuna na agilose.

¹¹ A rau sa qase ruarua ko Eparaama kei Sera, sa vuqa na nodrau yabaki; sa mudu vei Sera nai valavala vakayalewa.

¹² A sa dredre lo ko Sera, ka kaya, Ni'u sa qase mai ka'u na marau beka, ka ni sa qase talega na noqu turaga?

¹³ A sa kaya vei Eparaama ko Jiova, A cava sa dredre kina ko Sera, ka vaka, Au na vakasucu vakaidina beka koi au, ni'u sa qase mai?

¹⁴ E dua beka na ka sa dredre vei Jiova? au na lesu mai vei iko e na gauna sa lokuci, me vaka na kena gauna, ia ena qai dua na luvena tagane ko Sera.

¹⁵ A sa cakitaka ko Sera, ka kaya, Au a sega ni dredre; ni sa rere ko koya. A sa kaya ko koya, E segai; ko a dredre ga.

¹⁶ A ratou sa cavu tu maikea na tamata, ka gole vaka ki Sotoma: a sa lako vata kei iratou ko Eparaama me la'ki talatala.

¹⁷ A sa kaya ko Jiova, Au na vunia li vei Eparaama na ka ka'u na cakava;

¹⁸ ni na yaco vakaidina ko Eparaama me matanitu levu ka kaukauwa, ena kalougata talega e na vukuna na veimatanitu kecega e vuravura?

¹⁹ ni'u sa kilai koya, ni na vakaroti ira na luvena kei na nona mataqali era na muri koya, era na vakabauta talega na sala i Jiova, me kitaka na ka dodonu, ka ia na lewa dodonu; me vakayacora kina vei Eparaama ko Jiova na ka ka vosa kina vua.

²⁰ Sa kaya talega ko Jiova, Ni sa ka levu nai tukutuku kei Sotoma kei Komora, a sa ka tani sara na nodraui valavala ca;

²¹ au na lako sobu mada, ka raica se ra sa cakava me vaka sara na kenai tukutuku, sa yacovi au; ia kevaka e segai, ka'u na qai kila.

²² Ia koi rau na tamata, erau a gole tani maikea, ka lako vaka ki Sotoma; ia ko Eparaama, sa tu ga e na mata i Jiova.

²³ A sa toro voleka vua ko Eparaama, ka kaya, Ko ni na vakarusa vata beka na yalododonu kei nai valavala ca?

²⁴ de sa lewe limasagavulu na yalododonu e loma ni koro ko ya: ko ni na vakarusa beka, ka sega ni vosota na koro ko ya e na vukudra na lewe limasagavulu era na kune kina

²⁵ me yawa mada vei kemuni mo cakacaka vakakoya, ka me vakamatea vata na yalododonu kei nai valavala ca: ka me sa tautauvata na yalododonu kei nai valavala ca, me yawa mada vei kemuni: ena sega li ni caka dodonu Ko Koya sa lewai vuravura kecega?

²⁶ A sa kaya ko Jiova, Kevaka ka'u sa kunea mai Sotoma e lewe limasagavulu na tamata yalododonu e loma ni koro, au na qai vosota na koro taucoko e na vukudra.

²⁷ A sa vosa ko Eparaama, ka kaya, Raica, ka'u sa doudou mada ni vosa vei kemuni na Turaga, koi au na kuvu ni soso kei na dravusa:

²⁸ De sa na lewe vasagavulu ka lima ga na yalododonu: ko na vakarusa beka na koro taucoko ni sa yali e lewe lima? A sa kaya ko koya, Kevaka ka'u sa kunea kina e lewe vasagavulu ka lima, ka'u na sega ni vakarusa.

²⁹ A sa vosa tale vua ko koya, ka kaya, De sa kune kina e lewe vasagavulu. A sa kaya ko koya, Au na sega ni kitaka e na vukudra na lewe vasagavulu.

³⁰ A sa kaya ko koya, Mo ni kakua mada ni cudru kemuni na Turaga, ka me'u vosa mada: De sa kune kina e lewe tolusagavulu. A sa kaya ko koya, Au na sega ni kitaka, kevaka ka'u sa kunea kina e lewe tolusagavulu.

³¹ A sa kaya ko koya, Raica, ka'u sa doudou mada ni vosa vei kemuni na Turaga: De sa kune kina e lewe ruasagavulu. A sa kaya ko koya, Au na sega ni vakarusa e na vukudra na lewe ruasagavulu.

³² A sa kaya ko koya, Mo ni kakua mada ni cudru kemuni na Turaga, ka me'u vosa tale vakadua ga: De sa kune kina e lewe tini. A sa kaya ko koya, Au na sega ni vakarusa e na vukudra na lewe tini.

³³ A sa lako yani ko Jiova, ni rau sa veivosaki oti kei Eparaama: a sa lesu tale ki na nona tikina ko Eparaama.