Vakatakila 9 - Vakavakadewa Makawa

Ai kalima ni davui, kei na ka ca sa liu, 1-12. Ai kaono ni davui, kei ka na ca sa muri, 13-21.

¹ A sa uvuca nai kalima ni agilose, ia ka'u a raica e dua na kalokalo sa lutu mai lomalagi ki vuravura: a sa soli vua nai dola kei bulubulu e sega ni vakabotona.

² A sa dolava ko koya nai bulubulu e sega ni vakabotona; a sa kuvu cake na kubou mai bulu, me vaka na kubou ni lovo levu; a sa butobuto na mata-ni-siga, kei na macawa, e na vuku ni kubou sa kuvu cake mai bulu.

³ A sa lako tani mai na kubou na vodre me tiko e vuravura: a sa soli vei ira na kaukauwa, me vaka na nodra kaukauwa na batibasaga kei vuravura.

⁴ A sa vakaroti vei ira me ra kakua ni vakacacana na co e vuravura, se dua na ka karakarawa, se dua na kau; ko ira ga na tamata sa sega ni volai e na yadredra nai vakatakilakila ni Kalou.

⁵ A sa soli vei ira me ra kakua ni vakamatei ira, ka me ra vakararawataki ira ga ka vula lima: ia na nodra rarawa e vaka na rarawa ni sa katia na tamata na batibasaga.

⁶ E na siga oqori era na domomate ko ira na tamata, ia ena sega ni yacovi ira: era na gadreva me ra mate, ia ena dro tani maivei ira na mate.

⁷ Ia na kedrai rairai na vodre sa vaka na ose sa vakarau me laki valu: ia sa toka e uludra na ka sa vaka nai sala koula, ia na matadra sa vaka na mata ni tamata.

⁸ Ia na drau ni uludra sa vaka na drau ni ulu ni yalewa, ia na batidra sa vaka na batidra na laioni.

⁹ Ia nai sasabai ni lomaseredra, sa vaka nai sasabai kaukamea ni seredra; ia na cakucaroba ni tabadra sa vaka na vadugu ni qiqi-ni-valu, kei na ose e vuqa ni ra sa cici ki nai valu.

¹⁰ Ia na buidra sa vaka na bui ni batibasaga, a sa tiko e buidra na batidra: a ra sa rawata kina me vakararawataki ira na tamata ka vula lima.

¹¹ Ia sa dua na nodra tui, na agilose ni bulubulu e sega ni vakabotona, a yacana e na vosa vaka-Iperiu ko Apatoni, ia na yacana e na vosa va-Kirisi ko Apolioni.

¹² Sa dua na ka ca sa oti; ia ka raica, sa rua tale na ka ca sa bera ni lako mai.

¹³ IA sa uvuca nai kaono ni agilose, ia ka'u sa rogoca e dua na vosa mai na tutuna momoto vava ni cabocabo-ni-soro koula sa tu e na mata ni Kalou,

¹⁴ sa kaya vua nai kaono ni agilose sa taura na davui, Sereki iratou na agilose e lewe va, eratou sa vesu tu mai na uciwai levu ko Uferetisi.

¹⁵ A sa sereki ko iratou na agilose e lewe va, a ratou sa vakarau me dua na nodratou aua, ka dua na nodratou siga, ka dua na vula, ka dua na yabaki, me ratou vakamatea nai katolu ni wase ni tamata.

¹⁶ Ia na kedrai wiliwili nai valu sa rua na drau na milioni era sa vodo ose: ia ka'u a rogoca na kedrai wiliwili.

¹⁷ Ia ka'u a raici ira na ose vakaoqo e na raivotu, kei ira sa vodo tiko kina, ai sasabai ni lomaseredra na bukawaqa, kei na vatu damudamu, kei na sulifure: ia na ulu ni ose e vaka na ulu ni laioni; a sa lako tani mai na gusudra na bukawaqa kei na kubou kei na sulifure.

¹⁸ A ra sa vakamatei ko ira nai katolu ni wase ni tamata, e na ka ca tolutolu oqo, e na bukawaqa, kei na kubou, kei na sulifure, sa lako mai na gusudra.

¹⁹ Ni sa tu na nodra kaukauwa e na gusudra, kei na buidra: ni sa vaka na gata na buidra, a ra sa vakaulu, a ra sa kitaka kina na ka ca.

²⁰ Ia ko ira na tamata sa vo era sa sega ni vakamatei e na mate ca oqo, era sa sega ni veivutunitaka na cakacaka ni ligadra, me ra kua ni vakarokoroko ki na tevoro eso, kei na matakau koula, kei na siliva, kei na parasa, kei na vatu, kei na kau: oqori sa sega ni rai rawa, se rogo rawa, se lako voli:

²¹ era sa sega talega ni veivutunitaka na nodra daulaba, se na nodra cakacaka vakatevoro, se na nodra dauyalewa, se na nodra daubutako.