Vakatakila 8 - Vakavakadewa Makawa

E lewe vitu na agilose sa taura na davui, a sa le va sa uvuca, 1-13.

¹ Ia ni sa cecega oti ko koya nai kavitu ni drega, sa vakanomodi ko lomalagi ka oti e dua na afanaua.

² Au sa raica na agilose e le vitu eratou sa tu e na mata ni Kalou; a sa soli vei iratou e vitu na davui.

³ A sa dua tani tale na agilose sa lako mai ka laki tu e na mata ni cabocabo-ni-soro, a sa taura na miqa koula; a sa soli vakalevu vua na ka boivinaka, me cabora vata kei na masumasu ni tamata yalosavasava kecega e nai cabocabo-ni-soro koula sa tu e na mata ni tikotiko-vakaturaga.

⁴ Ia sa kuvu cake vata na kubou ni ka boivinaka, kei na masumasu ni tamata yalosavasava, mai na ligana na agilose ki na mata ni Kalou.

⁵ A sa kauta na miqa na agilose, ka vakasinaita e na bukawaqa ni cabocabo-ni-soro, ka biuta ki vuravura: ka sa tubu na makudru ni vosa, kei na kurukuru, kei na livaliva, kei na tavuki ni vanua.

⁶ Ia ko iratou na agilose e le vitu, eratou sa taura na davui e vitu, eratou sa vakarautaki iratou me ratou uvuca.

⁷ O KOYA na kenai matai sa uvuca, ka sa qai muri mai na uca-cevata sa veiwaki vata kei na bukawaqa kei na dra, a sa biu ki vuravura: a sa vakamai kina nai katolu ni wase kei vuravura, kei nai katolu ni wase ni kau, a sa vakamai kecega na co drokadroka.

⁸ SA qai uvuca nai karua ni agilose, a sa vaka e dua na ulu-ni-vanua levu sa caudre tu e na bukawaqa; sa biu ki na wasawasa a sa vuki kina me dra nai katolu ni wase ni wasawasa;

⁹ a sa mate kina nai katolu ni wase ni ka kecega sa bula e na wasawasa; a sa vakarusai talega nai katolu ni wase ni veiwaqa.

¹⁰ SA qai uvuca nai katolu ni agilose, a sa dua na kalokalo levu sa lutu mai lomalagi, a sa caudre me vaka na cina, a sa lutu ki nai katolu ni wase ni veiuciwai, kei na veivurevure-ni-wai;

¹¹ ia na yaca ni kalokalo ko Gagaduvaduva; a sa gaga kina nai ka tolu ni wase ni wai; a sa le vuqa kina na tamata sa mate e na wai ni ra sa vakagagataki.

¹² A SA uvuca nai kava ni agilose, a sa yaviti kina nai katolu ni tiki ni mata-ni-siga, kei nai katolu ni tiki ni vula, kei nai katolu ni wase ni veikalokalo: ia nai katolu ni kena wase vei ira sa vakabutobutotaki a sa sega talega ni rarama nai katolu ni wase ni siga, ka sa vaka talega kina na bogi.

¹³ Ia ka'u a raica, ka rogoca e dua na ikeli sa vuka e na maliwa kei lomalagi, a sa kaya e na domo levu, E ca, e ca, e ca, vei ira sa tiko e vuravura, e na vuku ni domo ni nodratou davui na agilose e le tolu, o koya sa bera ni uvu!