Vakatakila 7 - Vakavakadewa Makawa

Sa volai ko ira eso e na veiyavusa i Isireli, kei ira era lewe vuqa mai na veivanua: sa tukuni ira ko koya era sa tu e na mata ni tikotiko ni Kalou, 1-17.

¹ Ia ni sa oti na veika oqo ka'u a raica na agilose e le va eratou sa tu e na tutu i vuravura e va, ka taura na cagi e va kei vuravura, me kakua ni liwa ki vuravura na cagi, se ki na wasawasa, se ki na dua na kau.

² Ia ka'u a raica e dua tani tale na agilose sa lako mai na tu-i-cake, a sa tu vua na vatu ni drega nei koya na Kalou bula; a sa kaci e na domo levu ko koya vei iratou na agilose e le va, o iratou sa soli kina me ratou vakacacani vuravura kei na wasawasa,

³ ka kaya, Tei kakua mada ni vakacacani vuravura, se na wasawasa, se na kau, ka malua me keitou vola mada na yadredra na tamata ni noda Kalou.

⁴ Au a rogoca na kedrai wiliwili era sa volai: sa le dua na drau ka vasagavulu ka va talega na udolu, sa volai vei ira kecega na nodra veiyavusa na luve i Isireli.

⁵ Vei ira na yavusa i Juta sa volai e le tinikarua na udolu. Vei ira na yavusa i Rupeni sa volai e le tinikarua na udolu. Vei ira na yavusa i Kata sa volai e le tinikarua na udolu.

⁶ Vei ira na yavusa i Aseri sa volai e le tinikarua na udolu. Vei ira na yavusa i Nafitalai sa volai e le tinikarua na udolu. Vei ira na yavusa i Manasa sa volai e le tinikarua na udolu.

⁷ Vei ira na yavusa i Simioni sa volai e le tinikarua na udolu. Vei ira na yavusa i Livai sa volai e le tinikarua na udolu. Vei ira na yavusa i Isaka sa volai e le tinikarua na udolu.

⁸ Vei ira na yavusa i Sepuloni sa volai e le tinikarua na udolu. Vei ira na yavusa i Josefa sa volai e le tinikarua na udolu. Vei ira na yavusa i Penijamini sa volai e le tinikarua na udolu.

⁹ Sa oti oqo ka'u sa vakaraica, ka raica, sa dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga, kei na mata ni Lami, era vakaisulu e nai sulu vulavula, ka taura nai viu e na ligadra;

¹⁰ a ra sa kaci e na domo levu, ka kaya, A vu ni bula na noda Kalou, o koya sa tiko e nai tikotiko-vakaturaga, vua na Lami talega.

¹¹ O ira kecega na agilose era sa wavu tu ka vakavolivolita nai tikotiko-vakaturaga, kei ira na qase kei na ka bula e le va, ka cuva vakatoboicu e na mata ni tikotiko-vakaturaga, ka vakarokoroko vua na Kalou,

¹² ka kaya, Emeni: Na vakamolimoli, kei nai ukuuku, kei na vuku, kei na vakavinavinaka, kei na vakarokoroko, kei na kaukauwa, kei na qaqa, me nona ga na noda Kalou ka sega ni mudu. Emeni.

¹³ Sa qai vosa e dua na qase, ka tarogi au, O cei beka ko ira oqo sa vakaisulu e nai sulu vulavula? ka ra lako beka maivei?

¹⁴ Au sa qai kaya vua, O iko, saka, ko sa kila. A sa kaya vei au ko koya, O ira oqo era sa lako mai na veivakararawataki levu, ia era sa sava nodra i sulu, ka vakavulavulataka e na dra ni Lami.

¹⁵ O koya era sa tiko kina e na mata ni tikotiko ni Kalou, a ra sa qaravi koya e na siga kei na bogi e nona vale-ni-lotu; ia ena tiko vata kei ira ko koya sa tiko e nai tikotiko-vakaturaga.

¹⁶ Era na sega tale ni viakana, se viagunu tale; ena sega ni kati ira na siga, se dua tani na katakata.

¹⁷ Ni na vakani ira na Lami sa tiko e na loma ni tikotiko-vakaturaga, ka na tuberi ira ki nai vurevure ni wai bula: ia ena tavoya kecega na Kalou na wai ni mata mai na matadra.