Vakatakila 5 - Vakavakadewa Makawa

Sa raica ko Joni e dua nai vola sa dregati tu, a sa sega e dua e tevuka rawa, sa qai cecega ka tevuka na Lami, a ra sa vakavinavinaka vua na kai lomalagi, 1-14.

¹ Au a qai raici koya sa tiko e nai tikotiko-vakaturaga ka taura nai vola na ligana i matau, ko ya sa volai eloma e dakuna talega, sa dregati tu e na drega e vitu.

² Au a raica na agilose kaukauwa talega, o koya sa kaci e na domo levu, ka kaya, O cei sa yaga me tevuka nai vola, ka cecega na kena drega?

³ A sa sega e dua mai lomalagi, se e vuravura, se e ruku i vuravura, sa rawata me tevuka nai vola, se rai kina.

⁴ Ia ka'u a tagi vakalevu, ni sa sega ni kune e dua e yaga me tevuka nai vola, se rai kina.

⁵ Sa qai kaya vei au e dua na qase, Mo kakua ni tagi: raica, sa gumatua na Laioni ni yavusa i Juta, na Waka i Tevita, me tevuka nai vola me cecega talega na kena drega e vitu.

⁶ Au a qai raica e loma ni tikotiko-vakaturaga kei na kedratou maliwa na ka bula e lewe va, kei na kedratou maliwa na qase, e dua na Lami sa vaka sa qai vakamatei, e vitu na nonai leu e uluna, ka vitu na matana, o iratou ga oqo na Yalo ni Kalou e lewe vitu eratou sa talai ki vuravura taucoko.

⁷ A sa lako mai ko koya ka kauta nai vola mai na liga i matau i koya sa tiko e nai tikotiko-vakaturaga.

⁸ Ni sa kauta nai vola ko koya, sa cuva sobu e na mata ni Lami ko iratou na ka bula e le va, kei ira na qase e le ruasagavulu ka va era tauyadua na api, kei na veibilo koula sa sinai e na ka boi vinaka, oqori na nodra masu na tamata yalosavasava.

⁹ Era sa meketaka na meke vou, ka kaya, Oi kemuni sa yaga me kauta nai vola, me cecega talega na kena drega: ni kemuni a vakamatei, ka voli keimami e na nomuni dra maivei ira kecega na veimataqali, kei na duivosavosa, kei na veimatanitu, kei na veivanua, me keimami nona na Kalou:

¹⁰ ia kemuni sa lesi keimami me keimami tui, me keimami bete talega, vua na neimami Kalou; ia keimami na lewa tiko e vuravura.

¹¹ Au a qai raica, ia ka'u a rogoca na domo ni agilose e lewe vuqa, o ira era sa vakavolivolita nai tikotiko-vakaturaga, kei iratou na ka bula kei ira na qase: ia na kedrai wiliwili sa oba vakatini na udolu, ka vuqa tale na udolu;

¹² era sa kaya e na domo levu, Sa yaga na Lami ka vakamatei, me soli vua na kaukauwa, kei nai yau, kei na vuku, kei na qaqa, kei na veidokadokai, kei na vakarokoroko, kei na vakavinavinaka.

¹³ Ia kau a rogoca na ka bula kece mai lomalagi, kei vuravura, kei na ruku i vuravura, kei na wasawasa, kei na ka kecega sa tu kina, ni ra kaya, Me ia vua sa tiko e nai tikotiko-vakaturaga, vei koya talega na Lami, na vakavinavinaka, kei na vakarokoroko, kei nai ukuuku, kei na kaukauwa, ka sega ni mudu.

¹⁴ Ka ratou sa vakaemeni ko iratou na ka bula e le va. A ra sa cuva sobu ko ira na qase e lewe ruasagavulu ka va, ka vakarokoroko vei koya sa bula tikoga ka tawa mudu.