Vakatakila 22 - Vakavakadewa Makawa

Sa tukuni na uciwai ni bula, kei na kau ni bula, kei na rarama ni koro ni Kalou, 1-5. Sa tarovi Joni na agilose me kakua ni vakarokoroko vua, 8,9. Eso tale na ka sa tukuni, sa qai tinia nai vola ko koya, 10-21.

¹ Sa qai vakatakila mai vei au ko koya na uciwai ni bula, sa makare sese sara me vaka na karisitala na kena wai, sa drodro mai nai tikotiko-vakaturaga ni Kalou kei na Lami.

² E na loma ni kena sala, kei na batina ruarua talega, sa tei kina na kau ni bula, a sa vuataka na vuana e na veivula e tinikarua ka sa duidui na vuana: ia na drau ni kau oqo sa medra wai ni bula na lewe ni veivanua.

³ Ia era na sega tale ni cudruvi kina: ena tu ga kina nai tikotiko-vakaturaga ni Kalou kei na Lami: ka na qaravi koya ko ira na nona tamata:

⁴ era na raica na matana, ka na volai e na yadredra na yacana.

⁵ Ka na sega kina na bogi; ena sega talega ni yaga vei ira na cina, se na rarama ni siga; ni sa vakararamataki ira na Turaga na Kalou; ia era na vakaturaga tiko ka sega ni mudu.

⁶ A SA kaya vei au ko koya, A vosa oqo sa mana ka dina: ia na Turaga na nodra Kalou na yalo ni parofita sa tala na nona agilose me vakatakila vei ira na nonai talatala na ka sa voleka ni caka.

⁷ Ka raica, au sa lako kusarawa mai: sa kalougata ko koya sa taura matua na vosa ni parofisai e nai vola oqo.

⁸ Ia koi au ko Joni au a raica ka rogoca na veika oqo. Ia ni'u a rogoca, ka raica, au a cuva sobu ki na yavana na agilose sa vakatakila mai vei au na veika oqo me'u vakarokoroko.

⁹ Sa qai kaya vei au ko koya, Raica mo kakua ga: ni daru sai talatala vata, kei ira talega na wekamu na parofita, kei ira era sa taura na vosa ni vola oqo: mo vakarokoroko vua na Kalou.

¹⁰ A sa kaya vei au ko koya, Kakua ni dregata na vosa ni parofisai ni vola oqo: ni sa voleka na kena gauna.

¹¹ O koya sa tawa dodonu, me tawa dodonu tikoga: kei koya sa dukadukali, me dukadukali tikoga: kei koya sa dodonu, me dodonu tikoga: kei koya sa yalosavasava, me yalosavasava tikoga.

¹² Ka raica, au sa lako kusarawa mai; a sa tu ga vei au na ka, me'u solia vei ira na tamata yadua me vaka na nonai valavala.

¹³ Oi au na Alifa kei na Omeka, na kenai vakatekivu kei na kenai vakataotioti, na kenai liuliu kei na kenai murimuri.

¹⁴ Sa kalougata na tamata era sa sava na nodra i sulu, me ra kania vakaitaukei na kau ni bula, me ra curu e na matamata-ni-koro ki loma ni koro.

¹⁵ Sa tu e taudaku ko ira na koli, kei ira era sa daukitaka na ka vakatevoro, kei ira na dauyalewa, kei ira na daulaba, kei ira era sa daumasu ki na veimatakau, kei ira kece era sa vinakata na lasu ka kitaka tiko.

¹⁶ Oi au ko Jisu ka'u sa tala na noqu agilose me vakatakila na veika oqo vei kemudou e na veisoqosoqo lewe ni lotu. Oi au na kena vu kei na kawa nei Tevita, kei na kalokalo i vola siga e serau tu.

¹⁷ A sa kaya na Yalo Tabu, kei koya talega na watina-yalewa, Lako mai. Me kaya talega ko koya sa rogoca, Lako mai. Ia me lako mai ko koya sa viagunu. O koya sa vinakata, me mai gunuva walega na wai ni bula.

¹⁸ Au sa vakatakila vei ira na tamata kecega era sa rogoca na vosa ni parofisai ni vola oqo, Kevaka e dua na tamata ena vakaikuritaka na veika oqo, ena vakaikuritaka vei koya na Kalou na mate ca sa volai tu e nai vola oqo;

¹⁹ ia kevaka sa dua na tamata sa kauta tani eso na vosa mai nai vola ni parofisai oqo, ena kauta tani na Kalou na nonai votavota mai na kau ni bula, mai na koro savasava, ka mai na veika talega sa volai tu e nai vola oqo.

²⁰ Sa kaya ko koya sa vakatakila na veika oqo, E dina ka'u sa lako kusarawa mai. Emeni. Ni lako mai, Turaga Jisu.

²¹ Me nomudou kecega na loloma ni noda Turaga ko Jisu Karisito. Emeni. AI TINITINI NI VOLA NI VEIYALAYALATI VOU.