Vakatakila 21 - Vakavakadewa Makawa

Sa tukuni na lomalagi vou, kei na vuravura vou, kei Jerusalemi vakalomalagi, kei na kenai valavala, kei na kena vinaka, 1-27.

¹ Ia ka'u a raica na lomalagi vou kei na vuravura vou; ni sa takali na lomalagi makawa kei na vuravura makawa; ia sa segai sara na wasawasa.

² Ia koi au ko Joni, au a raica na koro tabu, ko Jerusalemi vou, sa lako sobu mai vua na Kalou mai lomalagi, a sa ukucavu me vaka na goneyalewa sa ukucavu me lako vua na watina.

³ Ia ka'u a rogoca e dua na domo levu mai lomalagi, sa kaya, Raica, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou.

⁴ Ia na Kalou ena tavoya tani kecega na wai ni mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.

⁵ Sa qai vosa ko koya sa tiko e nai tikotiko-vakaturaga, Raica, au sa vakavouya na ka kecega. A sa kaya vei au ko koya, Vola mada: ni sa vosa mana oqo ka dina.

⁶ A sa kaya vei au ko koya, Sa caka oti. Oi au na Alifa kei na Omeka, na kenai vakatekivu kei na kenai vakataotioti. Au na solia walega vua sa viagunu, mai nai vurevure ni wai ni bula.

⁷ O koya sa gumatua ena rawata na ka kecega oqo. Au na nona Kalou koi au, ia ena luvequ ko koya.

⁸ Ia ko ira na daurere, kei ira e vakatitiqa, kei ira era vakasisila, kei ira na daulaba, kei ira na dauyalewa, kei ira era kila ka-vakatevoro, kei ira sa dausoro ki na veimatakau, kei ira na daulasu kecega, sa votai vei ira na nodra i votavota e na drano sa caudre kina na buka kei na sulifure: ia oqo nai karua ni mate.

⁹ Sa qai lako mai vei au e dua vei iratou na agilose e lewe vitu, eratou sa taura na bilo e vitu sa sinai e na mate ca ena muri sara mai, a sa vosa vei au, ka kaya, Lako mai ki ke, au na vakatakila vei iko na goneyalewa, na wati ni Lami.

¹⁰ A sa kauta na yaloqu ko koya ki na dua na ulu-ni-vanua levu ka cecere, a sa vakatakila vei au na koro levu, ko Jerusalemi savasava, sa lako sobu mai lomalagi mai vua na Kalou,

¹¹ a sa tu kina nai ukuuku ni Kalou: ia na kena rarama e vaka na vatu dredre sara, e vaka na vatu jasipa, e vakaraitayaloyalo me vaka na karisitala;

¹² ia na kena bai e levu ka cecere, a sa tinikarua na kena matamata-ni-koro, a sa lewe tinikarua na agilose sa tu e na matamata-ni-koro, a sa volai kina na yacadra, ia oqori na yacadra na nodra mataqali e tinikarua ni Isireli:

¹³ e tolu na matamata-ni-koro sa donuya na tu-i-cake; e tolu na matamata-ni-koro sa donuya na tokalau; e tolu na matamata-ni-koro sa donuya na ceva; e tolu na matamata-ni-koro sa donuya na ra.

¹⁴ Ia na kena yavu na bai ni koro sa tinikarua a sa tu kina na yacadra nai apositolo ni Lami e lewe tinikarua.

¹⁵ Ia sa taura e dua na gasau koula ko koya sa vosa vei au, me katuma kina na koro, kei na kena matamata-ni-koro, kei na kena bai.

¹⁶ Ia sa va na yasa ni koro, a kena balavu e tautauvata kei na kena raraba: a sa katuma na koro ko koya e na gasau, ka sa tinikarua na udolu na kena falogi. Ia sa tautauvata na kena balavu kei na kena raraba kei na kena cecere.

¹⁷ A sa katuma ko koya na kena bai, A kena kiupiti e dua na drau ka vasagavulu ka va, ia nai vakarau ni tamata, sai koya nai vakarau ni agilose.

¹⁸ Ia na kena bai sa jasipa; ia na koro sa koula dina sara ga, me vaka nai iloilo makare.

¹⁹ Ia na yavu ni bai ni koro sa vakaiukuukutaki e na veivatu talei kecega. Ai matai ni kena yavu na jasipa; ai karua, na safairi; ai katolu, na kalisetoni; ai kava, na emeralita;

²⁰ ai kalima, na satonikisa; ai kaono, na satiusa; ai kavitu, na karisolita; ai kawalu, na perili; ai kaciwa, na topasa; ai katini, na karisopiraso; ai katinikadua, na vatu karakarawa; ai katinikarua, na amecisita.

²¹ Ia na matamata-ni-koro sa caka e na mata-ni-civa e tinikarua: sa dua na mata-ni-civa sa caka kina na matamata-ni-koro yadua; a sala koula vinaka sara na sala ni koro, me vaka nai iloilo makare sara.

²² Ia sa sega na vale-ni-lotu ka'u a kunea kina: ni sa kena vale-ni-lotu na Kalou Kaukauwa kei na Lami.

²³ A sa sega ni yaga e na koro oqo na mata-ni-siga, se na vula, me cila kina: ia nai ukuuku ni Kalou sa vakararamataka, ka sa kena rarama na Lami.

²⁴ Ena lako voli e na kena rarama ko ira na lewe ni veimatanitu: o ira na tui kei vuravura era sa kauta mai na nodra i ukuuku me tu kina.

²⁵ Ia na kena veimatamata-ni-koro ena sega ni sogo e na siga; (ni na sega kina na bogi.)

²⁶ Ia era na kauta mai me tu kina nai ukuuku kei na vakarokoroko ni veimatanitu.

²⁷ Ka sa sega sara e dua na ka eda vakasisilataka ena curu kina, se dua e kitaka na ka ca, se daulasu: ko ira ga era sa volai e na nonai vola ni bula na Lami.