Vakatakila 19 - Vakavakadewa Makawa

Era sa vakavinavinaka na kai lomalagi ni sa ca ko Papiloni, ni sa vakarau vinaka talega na wati ni Lami, 1-10. Era sa kacivi na manumanu vuka me ra kani ira na meca ni Kalou, 11-21.

¹ Sa oti na veika oqo, ka'u a rogoca na domodra na lewe vuqa mai lomalagi, era sa kaya, Aleluya: A bula, kei na vakavinavinaka, kei na vakarokoroko, kei na kaukauwa, me ia vua na noda Kalou:

² ni sa dina ka dodonu na nona lewa: ni sa lewai koya na yalewa ka dautagane vakalevu, o koya sa vakadukadukalitaki vuravura e na nona dautagane, a sa sauma vei koya na kedra dra na nona tamata.

³ A ra sa qai kaya tale, Aleluya. A sa kuvu cake na kena kubou me sega ni mudu.

⁴ A sa cuva sobu na qase e lewe ruasagavulu ka va, kei na ka bula e le va, a ra sa vakarokoroko vua na Kalou o koya sa tiko e nai tikotiko-vakaturaga, ka kaya, Emeni; Aleluya.

⁵ A sa dua na vosa sa lako mai nai tikotiko-vakaturaga, sa kaya, Vakavinavinaka ki na noda Kalou, oi kemudou kecega na nona tamata, kei kemudou sa rerevaki koya, se dou tamata lalai se dou turaga.

⁶ Au sa rogoca na ka e vaka na domo ni lewe vuqa, ka vaka na domo ni wai e vuqa, ka vaka na domo ni kurukuru levu, sa kaya, Aleluya: sa lewa na Turaga na Kalou Kaukauwa sara.

⁷ Tou marau ka reki, ka ia na vakarokoroko vei koya; ni sa yaco na vakawati ni Lami, a sa vakarautaki koya vakai koya na watina-yalewa.

⁸ A sa soli vua me vakaisulu e na lineni matailalai, sa savasava ka lumilumisa: ia na lineni matailalai na nodra i valavala dodonu na tamata yalosavasava.

⁹ A sa kaya vei au ko koya, Mo vola, Sa kalougata ko ira era sa kacivi ki nai vakayakavi ni vakawati ni Lami. A sa kaya vei au ko koya, Oqo gona na vosa dina ni Kalou.

¹⁰ Ia ka'u a cuva ki yavana me'u vakarokoroko vei koya. A sa kaya vei au ko koya, Raica, mo kakua: oi au na nomu i tokani, ka dua vei ira na wekamu era sa taura tiko nai tukutuku kei Jisu; vakarokoroko vua na Kalou: ia nai tukutuku kei Jisu na yalo ni parofisai.

¹¹ Ia ka'u a raici lomalagi ni sa dola tu, ka raica sa dua na ose vulavula; o koya sa vodo kina sa vakatokai ko Dodonu ka Dina, a sa lewa vakadodonu ko koya ka kitaka nai valu.

¹² A matana e vaka na yameyame ni buka, sa toka e na uluna nai sala-vakaturaga e vuqa; a sa volai na yacana, ia sa sega na tamata e kila, o koya duaduaga.

¹³ A sa vakaisulu e nai sulu sa kureitaki kina na dra; a sa vakatokai na yacana Na Vosa ni Kalou.

¹⁴ Ia ko ira na matai valu mai lomalagi era sa muri koya, ni ra sa vodo e na veiose vulavula, a ra sa vakaisulu e na lineni matailalai, e vulavula ka savasava.

¹⁵ A sa dara mai na gusuna e dua nai seleiwau gata, me yaviti ira kina na veimatanitu ko koya: ia ena lewai ira e nai titoko kaukamea: a sa sikaraka ko koya nai keli-ni-waini ni cudru waqawaqa ni Kalou Kaukauwa.

¹⁶ Ia na yacana sa volai e na nonai sulu kei na sagana talega, A NODRA TUI NA TUI, KEI NA NODRA TURAGA NA TURAGA.

¹⁷ Ia ka'u a raica e dua na agilose sa tu e na mata-ni-siga; a sa kaci e na domo levu ko koya, ka kaya vei ira kecega na manumanu era vuka e na maliwa kei lomalagi, Dou vakasoqoni kemudou vata mai ki nai vakayakavi ni Kalou levu:

¹⁸ mo dou kania na lewedra na tui, kei na lewedra na turaga ni valu, kei na lewedra na tamata qaqa, kei na lewedra na ose, kei ira era sa vodo kina, kei na lewedra kecega, se rai taukei se ra bobula, se ra tamata lalai se ra turaga.

¹⁹ Ia ka'u a raica na manumanu, kei ira na tui kei vuravura, kei na nodra i valu, era sa soqoni vata mai me ra veivala kaya sa vodo e na ose, kei ira na nonai valu.

²⁰ A sa tauri na manumanu, ka sa tauri vata kaya na parofita vakailasu, o koya sa kitaka na cakacaka mana e matana, o koya sa daulari ira kina era sa volai e nai vakatakilakila ni manumanu, kei ira era sa vakarokoroko ki na nona matakau. Oi rau ruarua oqo erau sa biu bulabula ki na drano bukawaqa sa caudre e na sulifure.

²¹ Ia ko ira na kena vo era sa vakamatei e nai seleiwau i koya sa vodo e na ose, ai seleiwau sa dara mai na gusuna: ia ko ira kecega na manumanu vuka era sa mamau e na lewedra.