Vakatakila 18 - Vakavakadewa Makawa

Sa bale ko Papiloni, a sa kaya na Kalou me lako tani kina ko ira na nona tamata me ra kakua ni ca vata kaya, 1-8. Sa tagicaki Papiloni ko ira na turaga kei vuravura, kei ira na tamata dauveivoli, 9-19. Sa reki ko ira na tamata ni Kalou ni sa qai qeavu sara, 20-24.

¹ Sa oti na veika oqo, ka'u a raica e dua tani tale na agilose sa lako sobu mai lomalagi, sa levu na nona kaukauwa; a sa rarama ko vuravura e na nonai ukuuku.

² A sa kaci e na domo levu sara ko koya, ka kaya, Sa bale ko Papiloni na koro levu, sa bale, a sa yaco me nodra i tikotiko na tevoro, kei na qara ni yalo velavela kecega, kei na qara ni manumanu vuka kecega sa tawa-savasava ka sevaki.

³ Ni ra sa bale na veivanua kecega ni ra gunuva na waini ni cudru ni nona dautagane, a ra sa veibutakoci kaya na tui kei vuravura, a ra sa vutuniyau na tamata dauveivoli e na vuku ni nona daugarogaro.

⁴ Ia ka'u a rogoca e dua tani tale na vosa mai lomalagi, sa kaya, Dou lako tani mai vua, oi kemudou na noqu tamata, mo dou kakua ni cala vata kaya, ka me kakua ni tauvi kemudou na nona mate ca.

⁵ Ni sa yacovi lomalagi na nonai valavala ca, a sa nanuma na nonai valavala ca na Kalou.

⁶ Cudruvi koya me vaka na nona cudruvi kemudou, ka cakava vakarua vua me vakarua me vaka na nonai valavala: ia na bilo sa vakasinaita ko koya, vakasinaita vakarua vua.

⁷ Me vaka na nona dokai koya, kei na nona daugarogaro, solia vakakina vua na yaluma kei na rarawa: ni sa kaya e lomana ko koya, Oi au na kuini ka'u sa tiko oqo, ka'u sa sega ni yada, ka'u na sega ni kila na rarawa.

⁸ O koya oqo ena yaco vata kina vua na mate ca e na dua na siga, a mate, kei na tagi, kei na dausiga; ia ena vakamai e na bukawaqa: ni sa kaukauwa na Turaga na Kalou sa cudruvi koya.

⁹ Ia ko ira na tui kei vuravura, era sa veibutakoci kaya ka daugarosa vata kaya, era na tagicaka, ka yasovaka, ni ra sa raica na kubou ni kena kama,

¹⁰ a ra na tu vakayawa ni ra sa rerevaka na nona yaluma, ka kaya, Isa! Isa! na koro levu ko Papiloni, na koro kaukauwa ko ya! e na dua bauga na aua sa yaco na nomu cudruvi.

¹¹ O ira talega na dauveivoli kei vuravura era na tagicaka ka yasovaka: ni sa sega na tamata me volia tale na nodra i yau:

¹² Ai yau ni veivoli na koula, kei na siliva, kei na vatu talei, kei na mata-ni-civa, kei na lineni matailalai, kei na ka lokaloka, kei na silika, kei nai sulu kulakula, kei na kau boi vinaka kece, kei na bilo tabua kece, kei na bilo kau dredre sara kece kei na parasa, kei na aironi, kei na vatu veivolavolai,

¹³ kei na sinamoni, kei na macou, kei na ka boi vinaka kei nai lumu, kei na drega me vakamai, kei na waini, kei na waiwai, kei na madrai droka vinaka, kei na witi, kei na pulumokau, kei na sipi, kei na ose, kei na qiqi-ni-tamata, kei ira na bobula, kei na yalo ni tamata.

¹⁴ Ia na vuata sa garova na yalomu sa takali yani vei iko, kei na ka talei kei na ka vinaka sa lako tani vei iko, ia ko na sega sara ni kunea tale.

¹⁵ A tamata era dauveivoli e na veika oqo, a ra sa vakavutuniyautaki e na vukuna, era na tu vakayawa ni ra sa rerevaka na nona yaluma, era na tagi ka yaso,

¹⁶ ka kaya, Isa! Isa! na koro levu ko ya! ka vakaisulu e na lineni matailalai, kei nai sulu lokaloka, kei nai sulu kulakula, ka vakaiukuuku e na koula, kei na vatu dredre, kei na mata-ni-civa!

¹⁷ a sa vaqeavutaki na ka kecega oqo e na dua bauga na aua. O ira kecega nai taukei ni waqa, kei ira kecega e vodo e na waqa, kei ira na lewe ni waqa, ko ira kecega sa dausoko me ra veivoli, era sa tu vakayawa,

¹⁸ ka ni ra sa raica na kubou ni kena kama, era qolouvaka ka kaya, A koro cava beka erau tautauvata kei na koro levu oqo?

¹⁹ A ra sa kabua ki na uludra na kuvu ni soso, ka qoqolou, ka tagi, ka yaso, ka kaya, Isa! Isa! na koro levu ko ya! sa vakavutuniyautaki e na vukuna ko ira kecega nai taukei ni waqa sa soko voli e loma ni wasawasa e na vuku ni nona ka vakaturaga! a sa vaqeavutaki e na dua bauga na aua.

²⁰ Mo dou reki sara e na vukuna, na lomalagi, kei kemudou nai apositolo kei na parofita; ni sa qai cudruvaki kemudou na Kalou ni sa ca ko koya.

²¹ A sa dua na agilose kaukauwa sa laveta cake e dua na vatu e vaka na vatu levu i qaqi, a sa biuta ki loma ni wasawasa, ka kaya, Ena vakabalei vakaukauwa vakaoqo na koro levu ko ya ko Papiloni, ka na sega sara ni kune tale.

²² Ia ena sega sara ni rogoci tale e tikimu na domona sa dauqiri api, kei na dau-ni-vucu, kei na dauuvu bitu-ni-vakatagi kei na davui; ena sega talega na matai, e mataitaka e dua na ka, me kune tale e tikimu; ena sega talega ni rogo tale e tikimu na rorogo ni vatu i qaqi;

²³ ena sega talega ni caudre tale e tikimu na rarama ni cina; ena sega talega ni rogo tale e tikimu na domo ni tagane sa qai vakawati, se na domo ni yalewa sa qai vakawati: o ira na nomu tamata dauveivoli eliu era sa tamata turaga kei vuravura; ni sa nomu i lawaki sa vakacalai kece kina na veivanua.

²⁴ A sa kune e tikina na kedra dra na parofita, kei ira na tamata yalosavasava, kei na kedra dra ko ira kece era a vakamatei e vuravura.