Vakatakila 17 - Vakavakadewa Makawa

Sa raica e dua na yalewa ko Joni sa vodoka na manumanu, a sa tukuna na kenai balebale e dua na agilose, 1-18.

¹ A sa lako mai e dua vei iratou na agilose e le vitu sa taura na bilo e vitu, ka keirau veivosaki, ka kaya vei au, Lako mai ki ke; au na vakatakila vei iko na nona cudruvi na yalewa oqo sa dautagane vakalevu sa tiko e na bati ni wai levu:

² o koya era sa veibutakoci kaya ko ira na tui kei vuravura, a ra sa vakamatenitaki ko ira na kai vuravura e na waini ni nona dautagane.

³ Sa qai kauta na yaloqu ko koya ki na veikau; ia ka'u a raica e dua na yalewa sa vodo tiko e na dua na manumanu kulakula, ka sa vuqa na yacana sa vosavakacacataki kina na Kalou, a sa vitu na uluna ka tini na nonai leu.

⁴ A sa vakaisulu na yalewa oqo e nai sulu lokaloka kei nai sulu kulakula, sa vakaiukuuku e na koula kei na vatu dredre talega, kei na mata-ni-civa, a sa taura e ligana e dua na bilo koula sa sinai e na kena ca kei na kena dukadukali ni nona dautagane:

⁵ a sa volai e na yadrena na yacana vakaoqo, SA SEGA NI KILAI, O PAPILONI NA KA LEVU, A TINADRA NA DAUTAGANE KEI NA VEIKA VAKASISILA KEI VURAVURA.

⁶ Ia ka'u a raica na yalewa sa mateni e na kedra dra na tamata yalododonu, kei na kedra dra na tamata era sa mate e na vuku i Jisu: ia ni ka'u a raica, ka'u a kurabui vakalevu kina.

⁷ A sa kaya vei au na agilose, O sa kurabui e na vuku ni cava? Au na tukuna vei iko na kenai balebale vuni ni yalewa oqo, kei na manumanu sa vodo kina ko koya, o koya sa vitu na uluna ka tini na nonai leu.

⁸ A manumanu ko a raica sa bula eliu, a sa qai sega tale; ia ena lako cake mai bulubulu e sega ni vakabotona, ena qai lako ki na rusa: ia era na kurabui kina ko ira sa tiko e vuravura, o ira sa sega ni volai na yacadra e nai vola ni bula mai nai vakatekivu kei vuravura, ni ra raica na manumanu sa bula eliu, a sa sega tale, a sa na tiko tale.

⁹ Oqo na loma sa tu kina na vuku. Na uluna e vitu na ulu-ni-vanua e vitu, sa tiko kina na yalewa oqo.

¹⁰ Ia sa lewe vitu na tui: e le lima sa bale, e dua sa tiko, e dua tale sa bera ni lako mai: ia ni sa lako mai ko koya, ena tiko vakadede vakalailai.

¹¹ Ia na manumanu sa bula eliu, a sa qai sega tale, o koya oqo nai kawalu, a sa dua vei ira na lewe vitu ko koya, ka sa lako ki na rusa.

¹² Ia nai leu e tini ko a raica eratou sa le tini na tui, a ratou sa sega ga ni vakamatanitu edaidai, a ratou sa kaukauwa kei koya na manumanu, me vaka na tui, e na dua ga na aua.

¹³ O iratou oqo eratou sa lomavata, ia eratou na solia na nodratou qaqa kei na nodratou kaukauwa vei koya na manumanu.

¹⁴ O iratou oqo eratou na veivala kei na Lami, ia sa na rawai iratou na Lami: ni sa Turaga vei ira na turaga ko koya, kei na nodra Tui na tui: ia ena gumatua talega ko ira sa tiko vata kaya, era sa kacivi, ka digitaki, ka lomadina.

¹⁵ A sa kaya vei au ko koya, Na veiwai ko a raica, sa tiko kina na yalewa dautagane, oqori na veivanua kei na mataqali e vuqa, kei na veimatanitu, kei na duivosavosa.

¹⁶ Ia nai leu e tini ko a raica, kei na manumanu, eratou na cata na yalewa dautagane, a ratou na kitaki koya me biu ka me luvawale; ia eratou na kania na lewena, ka vakamai koya sara e na bukawaqa.

¹⁷ Ni sa vakavulica na yalodratou na Kalou me ratou vakayacora na nona lewa, me ratou lomavata, me ratou solia na nodratou matanitu vua na manumanu, me vakayacori mada na vosa ni Kalou.

¹⁸ Ia na yalewa ko a raica, na koro levu ko ya, sa lewa vei ira na tui kei vuravura.