Vakatakila 16 - Vakavakadewa Makawa

Sa sovaraka na nodratou veibilo ko iratou na agilose, a sa vuqa na mate ca sa yaco kina, a sa lako mai ko Jisu me vaka na butako, 1-16. Eso tale na ka sa tukuni, 17-21.

¹ Ia ka'u a rogoca e dua na domo levu mai na vale-ni-lotu, sa kaya vei iratou na agilose e le vitu, Dou lako, ka sovaraka yani na bilo e vitu ni cudru ni Kalou ki vuravura.

² A SA lako na kenai matai, a sa sovaraka na nona bilo ki vuravura; a sa tauvi ira na tamata na vidikoso ca e rarawa sara, o ira sa tu kina nai vakatakilakila ni manumanu, kei ira sa vakarokoroko ki na nona matakau.

³ IA nai karua ni agilose sa sovaraka na nona bilo ki na wasawasa; a sa vuki kina me vaka na dra ni tamata mate: ia sa mate na ka kecega sa bula voli e na wasawasa.

⁴ IA nai katolu ni agilose sa sovaraka na nona bilo ki na veiuciwai kei na veivurevure-ni-wai; a ra sa vuki kina me dra.

⁵ Ia ka'u a rogoca na agilose ni veiwai ni sa kaya, Oi kemuni na yalododonu, o ni sa bula edaidai, o ni a bula eliu, o ni sa yalosavasava, ni kemuni sa lewa vakaoqo.

⁶ Ni ra sa vakadavea na dra ni tamata yalosavasava kei na dra ni parofita ko ira oqo, ko ni sa qai solia vei ira na dra me ra gunuva; sa dodonu me vakakina vei ira.

⁷ Ia sa dua tani tale ka'u a rogoca mai nai cabocabo-ni-soro, sa kaya, E vaka ga oqo, na Turaga na Kalou Kaukauwa, sa dina ka dodonu na nomuni lewa.

⁸ IA nai kava ni agilose sa sovaraka na nona bilo e na mata-ni-siga; a sa soli vua me vakamaqesataki ira na tamata e na bukawaqa.

⁹ A ra sa qesa na tamata ni sa katakata vakalevu, a ra sa vosavakacacataka na Kalou, o koya sa lewa rawa na veimate ca oqo: a ra sa sega ni veivutuni me ra vakarokorokotaki koya.

¹⁰ IA nai kalima ni agilose sa sovaraka na nona bilo ki nai tikotiko ni manumanu; a sa butobuto na nona matanitu; a ra sa katia na yamedra e na vuku ni rarawa,

¹¹ ka vosavakacacataka na Kalou ni lomalagi e na vuku ni nodra rarawa kei na nodra vidikoso, a ra sa sega ni veivutunitaka na nodra i valavala.

¹² IA nai kaono ni agilose sa sovaraka na nona bilo ki na uciwai levu ko Uferetisi; a sa di kina na kena wai, me caramaki na nodra sala na tui mai na tu-i-cake.

¹³ Ia ka'u a raica e le tolu na yalo velavela eratou sa vaka na boto, eratou sa lako mai na gusu ni gata levu, mai na gusuna talega na manumanu, mai na gusuna talega na parofita vakailasu.

¹⁴ Ni ratou sa yalo ni tevoro ko iratou, eratou sa kitaka na cakacaka mana, a ratou sa lako yani vei ira na tui ni veivanua kei vuravura taucoko, me vakasoqoni ira vata ki nai valu ni siga dina ko ya ni Kalou Kaukauwa.

¹⁵ (Raica, au sa lako mai me vaka na daubutako. Sa kalougata ko koya sa vakatawa, a sa taura tiko na nonai sulu, de lako voli ka luvawale, ia ka ra raica na nona luvawale.)

¹⁶ A ratou sa vakasoqoni ira vata e na vanua na yacana e na vosa vaka-Iperiu ko Amaketone.

¹⁷ IA nai kavitu ni agilose sa sovaraka na nona bilo e na macawa; a sa rogo mai na domo levu, mai na vale-ni-lotu mai lomalagi, mai nai tikotiko-vakaturaga, a sa kaya, Sa caka oti.

¹⁸ A sa rogo na domo ni vosa, kei na kurukuru, ka tibi na livaliva; a sa tavuki vakalevu na vanua, sa sega ni vakakina mai nai vakatekivu ni nodra tiko e vuravura na tamata, ka me tavuki vakaukauwa, ka vakalevu vakakina.

¹⁹ A sa tawase vakatikitolu na koro levu, ia sa bale na veikoro e na veivanua; a sa mai vakananumi ko Papiloni na koro levu e na mata ni Kalou, me soli kina na bilo ni waini ni nona cudru waqawaqa.

²⁰ A sa dro tani yani na veiyanuyanu kecega, ia na veiulu-ni-vanua sa sega ni kune.

²¹ A sa lutuki ira na tamata na uca-cevata levu mai lomalagi, a kena bibi e dua na taledi: a ra sa vosavakacacataka na Kalou ko ira na tamata e na vuku ni mate ca ni uca-cevata; ni sa ka levu sara na mate ca oqo.