Vakatakila 15 - Vakavakadewa Makawa

E lewe vitu na agilose sa tu vei iratou na mate ca e vitu: era sa reki ko ira sa sega ni rawai ira na manumanu, 1-4. Sa soli vei iratou na agilose na bilo e vitu, 5-8.

¹ Ia ka'u a raica e dua tani tale nai vakatakilakila mai lomalagi, na ka levu e veivakidacalataki, e le vitu na agilose sa taura e vitu na mate ca sa kenai otioti sara; ni sa vakayacori sara vei ira na cudru ni Kalou.

² Ia ka'u a raica e dua na ka e vaka na wasa iloilo sa veiwaki vata kei na bukawaqa; ia ko ira era sa gumatua vua na manumanu, kei na nona matakau, kei nai wiliwili ni yacana, era sa tu e na wasa iloilo, a ra sa taura na veiapi ni Kalou.

³ A ra sa meketaka na meke i Mosese nai talatala ni Kalou, kei na meke ni Lami, ka kaya, A ka levu ka veivakurabuitaki na nomuni cakacaka, na Turaga na Kalou Kaukauwa; sa dodonu ka dina na nomuni valavala, oi kemuni na Tui ni veigauna kecega.

⁴ O cei me sega ni rerevaki kemuni, na Turaga, ka vakarokorokotaka na yacamuni? ni sai kemuni ga sa yalosavasava: ko ira kecega na veivanua era na lako mai ka cuva e matamuni; ni sa vakatakilai mai na nomuni cakacaka dodonu.

⁵ Ia ka oti ka'u sa vakaraica, ka raica, sa dola tu na vale ni tikina tabu ni veiyalayalati mai lomalagi:

⁶ ia ko iratou na agilose e le vitu eratou sa lako mai na vale ni lotu, eratou sa taura na mate ca e vitu, eratou vakaisulu e na lineni savasava sara ka vulavula, a sa vau na lomaseredratou e na wa koula.

⁷ A sa dua vei iratou na ka bula e le va sa solia vei iratou na agilose e le vitu na bilo koula e vitu sa sinai e na cudru ni Kalou, ko koya sa bula ga ka tawa mudu.

⁸ A sa sinai na vale-ni-lotu e na kubou mai nai ukuuku ni Kalou, mai na nona kaukauwa talega; a sa sega na tamata sa curu rawa ki na vale-ni-lotu, ena vakayacori mada eliu na mate ca e vitu sa taura ko iratou na agilose e le vitu.