Vakatakila 13 - Vakavakadewa Makawa

Sa tukuni na manumanu sa tubu cake mai wai, kei koya sa tubu cake mai vanua, 1-18.

¹ Ia sa tu e na veinukunuku mai matasawa ko koya, ia ka'u a raica e dua na manumanu sa lako cake mai na wasawasa, e vitu na uluna ka tini na nonai leu, a sa toka e na nonai leu nai sala-vakaturaga e tini, a sa tu ga e na uluna na yaca ni dauvosavakacacataki.

² Ia na manumanu ka'u a raica sa vaka na lepate, a yavana sa vaka na yava ni pera, a gusuna e vaka na gusu ni laioni: a sa solia vua na nona kaukauwa dina na gata levu, kei na nonai tikotiko-vakaturaga, me mai turaga levu.

³ Ia ka'u a raica e dua na uluna e vaka sa vuetaki me mate kina: a sa bula tale mai na nona vue ka voleka ni mate kina: a ra sa kurabui kecega na kai vuravura e na vuku ni manumanu.

⁴ A ra sa vakarokoroko vua na gata levu, o koya sa solia na kaukauwa vua na manumanu: a ra sa vakarokoroko vua na manumanu, ka kaya, O cei sa vaka na manumanu oqo? o cei sa rawata me rau veivala kaya?

⁵ A sa soli vua na gusu me vosataka na ka levu kei na vosa vakacaca sara; a sa soli vua me turaga ka vula vasagavulu ka rua.

⁶ A sa dalaga me vosa ca ki na Kalou, me vosavakacacataka na yacana, kei na nona vale, kei ira era sa tiko mai lomalagi.

⁷ A sa soli vua me veivala kei ira na tamata yalosavasava, ka me rawai ira: a sa soli vua me turaga vei ira na veimataqali kece, kei na veimatanitu kei na duivosavosa, kei na veivanua.

⁸ Ia ena vakarokoroko vua ko ira kecega era sa tiko e vuravura, ko ira sa sega ni volai na yacadra e nai vola ni bula ni Lami sa vakamatei mai nai vakatekivu kei vuravura.

⁹ Kevaka e dua sa vakadaligana, me mani rogoca sara.

¹⁰ O koya sa dauia na veivakabobulataki ena vakabobulataki; o koya sa ia na veivakamatei e nai seleiwau ena mate talega e nai seleiwau. Oqo na nodra vosota kei na nodra vakabauta na tamata yalosavasava.

¹¹ Ia ka'u a raica e dua tani tale na manumanu sa lako cake mai vuravura; ia sa rua na nonai leu me vaka na luve ni sipi, a sa vosa me vaka na gata levu.

¹² A sa tu vua na kaukauwa kecega ni manumanu sa liu vua, ka vakasaurarataki vuravura kina kei ira sa tiko kina me ra vakarokoroko vua na manumanu sa liu, o koya ka bula e na nona vue ka voleka ni mate kina.

¹³ Ia sa kitaka na ka levu e veivakidacalataki ko koya, a sa kauta mai lomalagi ki vuravura na bukawaqa e na matadra na tamata,

¹⁴ a sa temaki ira era sa tiko e vuravura e na vuku ni cakacaka mana sa kitaka ko koya e na mata ni manumanu; a sa kaya vei ira era sa tiko e vuravura, me ra cakava na matakau me nona na manumanu sa lauta e nai seleiwau, ka sa bula tikoga.

¹⁵ A sa rawata ko koya oqo me solia na bula ki na matakau ni manumanu, me vosa rawa kina na matakau ni manumanu, ka vakavuna talega na nodra mate ko ira era sa sega ni via vakarokoroko ki na matakau ni manumanu.

¹⁶ A sa vakasaurarataki ira kecega, na tamata lalai kei na turaga, o ira sa vutuniyau kei ira sa dravudravua, ai taukei kei na bobula, me volai e dua nai vakatakilakila e na ligadra i matau, se na yadredra:

¹⁷ ka me kakua ni veivoli e dua, o koya ga sa tu vua nai vola, se na yaca ni manumanu, se nai wiliwili ni yacana.

¹⁸ Oqo ga na vuku. O koya sa yalomatua me mani wilika nai wiliwili ni manumanu; ni sai wiliwili ni tamata; ka sa kenai wiliwili e ono na drau ka onosagavulu ka ono.