Vakatakila 11 - Vakavakadewa Makawa

Sa tukuni rau na dautukutuku erau lewe rua, 1-13. Sa oti nai karua ni ka ca, a sa uvuca nai kavitu ni agilose, 14-19.

¹ A sa dua na gasau sa soli vei au e vaka nai titoko; a sa tu na agilose, ka kaya, Mo tu cake, ka vakarauta na vale ni Kalou, kei nai cabocabo-ni-soro, kei ira era sa lotu kina.

² Ia na lomanibai e taudaku ni vale, kakua ni vakarauta: ni sa soli oqori kivei ira na veimatanitu tani: ia era na butuka na koro tabu ka vula vasagavulu ka rua.

³ Ia ka'u na solia vei rau na noqu i talatala, me rau parofisai rawa ka siga e dua na udolu ka rua na drau ka onosagavulu, ka rau na vakaisulu e nai sulu taga.

⁴ Na kau ruarua oqo na yacana na olive, kei nai tutu-ni-cina e rua sa tu e na mata ni Turaga kei vuravura.

⁵ Ia kevaka e dua na tamata sa via vakacacani rau, sa lako mai na gusudrau na bukawaqa, ka kania sara na nodrau meca: ia kevaka e dua na tamata sa via vakacacani rau, ena vakamatei ga vakaoqo.

⁶ Erau sa rawata me sogoti lomalagi, me kakua ni tau na uca e na gauna erau sa vunau kina: erau sa rawata talega me vukica na wai kece me dra, me rau yaviti vuravura talega e na mate ca kece, me vaka na nodrau veitalia.

⁷ Ia ni rau sa vakaotia na nodraui tukutuku, ena veivala kei rau na manumanu sa lako mai bulubulu sa sega ni vakabotona, ena kaukauwa vei rau ko koya, ka vakamatei rau.

⁸ Ia ena biu wale tu na yagodrau sa mate e na saqata ni koro levu, sa vakatokai vakaibalebale ko Sotoma kei Ijipita, sa lauvako talega kina e na kauveilatai na nodrau Turaga.

⁹ Ia ko ira na veimatanitu kei na veimataqali kei na duivosavosa kei na veivanua, era na raica na yagodrau sa mate ka tolu na siga kei na veimama ni dua tale na siga, a ra na sega ni laiva me buluti na yagodrau e nai bulubulu.

¹⁰ O ira talega era tiko e vuravura era na reki ni rau sa mate, ka marau vakalevu, a ra na dui veisoliyaka na nodra ka ni loloma; ni rau sa vakararawataki ira era sa tiko e vuravura koi rau na parofita oqo.

¹¹ A sa oti e tolu na siga kei na veimama ni ka va ni siga, sa qai curumi rau na Yalo ni bula mai vua na Kalou, a rau sa wavu tu kina; a sa ka levu na rere sa kani ira era sa raici rau.

¹² A rau sa rogoca e dua na domo levu mai lomalagi sa kaya vei rau, Drau lako cake mai ki ke. A rau sa lako cake ki lomalagi e na o; a sa raici rau ko ira na nodra meca.

¹³ E na tiki-ni-siga ga ko ya sa tavuki vakalevu kina na vanua, a sa bale nai katini ni wase ni koro, a sa le vitu na udolu na tamata sa vakamatei, ni sa tavuki na vanua: o ira sa vo era sa rere, ka vakavinavinaka vua na Kalou kei lomalagi.

¹⁴ Sa qai oti nai karua ni ka ca; ka raica, sa lako vakatotolo sara mai nai katolu.

¹⁵ SA qai uvu davui nai kavitu ni agilose; a sa muri eso na vosa sa domo levu mai lomalagi, sa kaya, Na matanitu kei vuravura oqo sa qai yaco me nona na noda Turaga, a nei koya na nona Karisito; ia ena lewa ko koya ka sega ni mudu.

¹⁶ O ira na qase e le ruasagavulu ka va, era sa tiko e nodra i tikotiko e na mata ni Kalou, era sa cuva vakatoboicu, ka vakarokoroko ki na Kalou,

¹⁷ ka kaya, Keitou sa vakavinavinaka vei kemuni, na Turaga na Kalou Kaukauwa, ko ni sa bula edaidai, ko ni a bula eliu, ko ni na bula talega emuri; ni kemuni sa kauta vei kemuni na nomuni kaukauwa levu, ka lewa tiko.

¹⁸ O ira na veimatanitu era sa cudru, ia sa yaco dina mai na nomuni cudru, kei na nodra gauna na mate, me ra saumi kina, mo ni solia talega vei ira na nomuni talatala na parofita na kedrai sau, vei ira talega na tamata yalosavasava, vei ira talega era rerevaka na yacamuni, se ra turaga se ra tamata lalai; mo ni vakawabokotaki ira era sa vakawabokotaki vuravura.

¹⁹ A sa dola na vale-ni-lotu ni Kalou mai lomalagi, a sa rairai e na nona vale na kato ni vola ni veiyalayalati: a sa qai muri na livaliva, kei na vosa, kei na kurukuru, kei na tavuki ni vanua, kei na uca-cevata levu.