Vakarua 9 - Vakavakadewa Makawa

Sa vunauci ira me ra kakua ni dokai ira e na yalododonu: a sa tukuna na nodra dautalaidredre.

¹ Mo ni rogoca, na Isireli: Ko ni sa qalo kosova na Joritani edaidai, mo ni la'ki taukena eso na matanitu sa levu ka kaukauwa, ka lailai ka malumalumu koi kemuni, na veikoro lelevu ka sa yala ki lomalagi na kedra bai,

² a matanitu tamata lelevu ka babalavu, na luve i Anaki, ko ira ko sa kila, ia ko sa rogoca ka vaka, O cei e tu rawa e na matadra na luve i Anaki!

³ Mo ni kila mada edaidai, ni sa liutaki kemuni yani ko Jiova na nomuni Kalou, vaka na bukawaqa katakata: ena vakaoti ira, ka vakamalumalumutaki ira e matamuni: ia ko ni na vakasavi ira kina, ka vakaoti ira vakusakusa, me vaka ka kaya vei kemuni ko Jiova.

⁴ Mo ni kakua ni vosa e lomamuni, ni sa vakasevi ira tani e matamuni ko Jiova na nomuni Kalou, ka kaya, E na vuku ni noqu i valavala dodonu sa kauti au mai ko Jiova me'u taukena na vanua oqo: e na vuku ga ni nodra sega ni dodonu na veimatanitu oqori sa vakasevi ira kina e matamuni ko Jiova.

⁵ Sa segai e na vuku ni nomuni valavala dodonu, se na dodonu ni lomamuni, ko ni sa lako kina mo ni taukena na nodra vanua: e na vuku ga ni nodra sega ni dodonu na veimatanitu oqori sa vakasevi ira kina e matamuni ko Jiova na nomuni Kalou, ka me vakayacora ko koya na vosa ka bubului kina ko Jiova vei iratou na nomuni qase, kivei Eparaama, kei Aisake, kei Jekope.

⁶ Mo ni kila ga, ni sa sega ni solia vei kemuni na vanua vinaka oqo ko Jiova na nomuni Kalou mo ni taukena, e na vuku ni nomuni yalododonu; ni kemuni sa matanitu domoqa.

⁷ Mo ni nanuma, kakua ni guilecava, ni ko a dauvakacudrui Jiova na nomuni Kalou mai na vanua liwa: mai na siga ko ni a lako tani mai na vanua ko Ijipita, ka yacova na siga kemuni a yaco kina ki na yasana oqo, ko ni sa talaidredre ga vei Jiova.

⁸ Mai Orepi talega ko ni a vakacudrui Jiova, a sa cudruvi kemuni ko Jiova me via vakarusai kemuni.

⁹ Ni ka'u a cabe ki na ulu-ni-vanua me'u taura na vatu raraba, io na vatu raraba ni veiyalayalati sa ia kei kemuni ko Jiova, au a qai tiko e na ulu-ni-vanua ka siga vasagavulu ka bogi vasagavulu; au a sega ni kana madrai, se gunu wai:

¹⁰ a sa solia vei au ko Jiova e rua na vatu raraba sa volai e nai qaqalo ni Kalou; a sa volai kina na vosa kecega sa vosataka vei kemuni ko Jiova mai na ulu-ni-vanua mai na loma ni bukawaqa e na siga ni soqoni vata.

¹¹ Ia ni sa oti na siga e vasagavulu kei na bogi e vasagavulu, sa qai solia vei au ko Jiova na vatu raraba ruarua ko ya, io na vatu raraba ni veiyalayalati.

¹² A sa kaya vei au ko Jiova, Mo ia, mo lako sobu vakatotolo sara; ni ra sa vakadukadukalitaki na nomu tamata ko ira ko a kauta tani mai Ijipita; era sa vuki tani vakasauri mai na sala ka'u a vakarota vei ira; era sa cakava vei ira e dua na matakau sa vakawaicalataki.

¹³ Sa vosa talega vei au ko Jiova, ka kaya, Au sa raici ira oti na matanitu oqo, ka raica, era sa matanitu domoqa:

¹⁴ mo laivi au mada, me'u vakarusai ira, ka bokoca sara na yacadra mai na ruku i lomalagi: ia ka'u na qisi iko mo matanitu kaukauwa ka levu cake vei ira.

¹⁵ Au a qai lesu ka siro sobu mai na ulu-ni-vanua, a sa waqa tiko na ulu-ni-vanua e na buka: ka'u sa kauta na vatu ruarua ni veiyalayalati e na ligaqu ruarua.

¹⁶ Ka'u a qai rai yani, ka raica, kemuni sa kitaka oti na ka ca vei Jiova na nomuni Kalou; kemuni sa bulia oti vei kemuni e dua na luve ni pulumokau sa vakawaicalataki; kemuni sa lesu tani vakasauri mai na sala sa vakarota vei kemuni ko Jiova.

¹⁷ Ia ka'u a kauta na vatu raraba ruarua, ka viritaka yani mai na ligaqu ruarua, ka vorolaka e matamuni.

¹⁸ Au a qai cuva sobu e na mata i Jiova, me vaka eliu, ka siga vasagavulu ka bogi vasagavulu; au a sega ni kana madrai, se gunu wai; e na vuku ni nomuni valavala ca kecega kemuni sai valavala ca kina, ni kemuni a caka cala e na mata i Jiova, me vakacudrui koya.

¹⁹ Ni'u a rerevaka na lesa kei na cudru katakata sa cudru kina vei kemuni ko Jiova me vakarusai kemuni. A sa rogoci au ko Jiova e na gauna talega ko ya.

²⁰ Sa cudruvi Eroni vakalevu talega ko Jiova me via vakamatei koya: ia ka'u a masulaki Eroni talega e na gauna ko ya.

²¹ Ka'u a qai taura na ka ni nomuni valavala ca, na luve ni pulumokau kemuni a cakava, ia ka'u a vakama e na bukawaqa, ka buturaka, me vurumemeataka me matailalai sara, me vaka ga na kuvu ni soso: ia ka'u a biuta na kena kuvu ni soso ki na uciwai sa drodro sobu mai na ulu-ni-vanua.

²² Mai Tapera talega, kei Masa, kei Kipiroci-ateva, kemuni a vakacudrui Jiova.

²³ Ka ni sa talai kemuni talega ko Jiova mai Ketesa-parinea, ka kaya, Mo ni lako cake ka taukena na vanua ka'u sa solia vei kemuni; kemuni a talaidredre ga ki na vunau i Jiova na nomuni Kalou, ka sega ni vakabauti koya, se vakarorogo ki na nona vosa.

²⁴ Mai na siga ka'u a kilai kemuni kina, kemuni sa talaidredre ga vei Jiova.

²⁵ Ia ka'u a cuva sobu e na mata i Jiova ka siga vasagavulu ka bogi vasagavulu, me vaka ka'u a cuva sobu eliu, ni sa kaya ko Jiova ena vakarusai kemuni.

²⁶ Au a masu kina kivei Jiova, ka kaya, kemuni na Turaga, Jiova, mo ni kakua ni vakarusai ira na nomuni tamata kei na nomuni votavota, ko ira kemuni a vakabula e na nomuni vakaturaga, ko ira kemuni a kauta mai Ijipita e na ligamuni kaukauwa:

²⁷ mo ni nanumi iratou na nomuni tamata, ko Eparaama, ko Aisake, kei Jekope; kakua ni raica na nodra yalokaukauwa na tamata oqo, se na nodra caka cala, se na nodra i valavala ca:

²⁸ de kainaki e na vanua kemuni a kauti keimami maikina, Ni sa sega ni vakayacori ira rawa ko Jiova ki na vanua ka yalataka vei ira, ka ni sa cati ira talega, sa kauti ira yani ko koya me vakamatei ira e na vanua liwa.

²⁹ Ia era sa nomuni tamata ga kei na nomuni votavota, kemuni a kauta tani mai e na nomuni kaukauwa levu kei na ligamuni sa dodo tu.