Vakarua 8 - Vakavakadewa Makawa

Sa vakaroti ira ko Mosese me ra talairawarawa, e na vuku ni loloma ni Kalou vei ira.

¹ Ai vakaro kecega ka'u sa vakarota vei kemuni edaidai mo ni vakabauta ka cakava, mo ni bula kina, ka tubu me lewe levu, ka lako yani ka taukena na vanua sa bubului kina ko Jiova vei ira na nomuni qase.

² Ia mo ni nanuma na sala kecega sa kauti kemuni kina ko Jiova na nomuni Kalou, e na vanua liwa, e na yabaki e vasagavulu sa oti oqo, me vakamalumalumutaki kemuni, me vakatovolei kemuni, me kila kina na ka sa tiko e lomamuni, se ko ni na vakabauta na nona vunau, se segai.

³ A sa vakamalumalumutaki kemuni, a sa laivi kemuni mo ni viakana, ka sa vakani kemuni e na mana, na ka ko ni a sega ni kila eliu, ka sega talega ni kila ko ira na nomuni qase; me vakatakila vei kemuni ni sa sega ni bula na tamata e na madrai duaduaga, ka ni sa bula ga na tamata e na ka kecega sa vosataka ko Jiova.

⁴ Ai sulu ko ni a vakaisulu kina, sa sega ni madra mai, a sa sega ni vuvuce na yavamuni, e na yabaki e vasagavulu oqo.

⁵ Ia mo ni kila e na lomamuni, ni sa vakanakuitataki kemuni ko Jiova na nomuni Kalou me vaka sa vakanakuitataka na luvena na tamata.

⁶ Ia mo ni vakabauta kina nai vakaro i Jiova na nomuni Kalou, mo ni lako e na nona sala, ka mo ni rerevaki koya.

⁷ Ni sa kauti kemuni ko Jiova na nomuni Kalou ki na vanua vinaka, na vanua vakauciwai, ka vakamata-ni-wai kei na wai levu sa tovure mai na veikikilo kei na veiulu-ni-vanua;

⁸ a vanua ni witi, kei na parile, kei na veivaivaini, kei na lolo, kei na pomekaraneti; a vanua ni waiwai ni olive, kei na oni;

⁹ a vanua ko na kana madrai tiko kina ka mamau, ko na sega ni dravudravua kina e na dua na ka; a vanua sa aironi na kena vatu, ia ko ni na kelia na uma parasa mai na kena veiulu-ni-vanua.

¹⁰ Ia ni ko sa kana ka mamau, mo ni qai vakavinavinaka vei Jiova na nomuni Kalou e na vuku ni vanua vinaka sa solia vei kemuni ko koya.

¹¹ Mo ni qarauni kemuni mo ni kakua ni guilecavi Jiova na nomuni Kalou, mo sega kina ni vakabauta na nona vunau, kei na nona lewa, kei na nonai lesilesi, o koya ka'u sa vakarota vei kemuni edaidai:

¹² de ko ni sa kana ka mamau, ka tara eso na vale vinaka, ka tiko kina;

¹³ ka tubu me levu na nomuni qele ni pulumokau kei na nomuni qele ni sipi, a sa levu mai na nomuni siliva kei na nomuni koula, ka vakalevutaki na nomuni ka kecega;

¹⁴ ka qai viavialevu mai na yalomuni, ka ko ni guilecavi Jiova na nomuni Kalou, ko koya sa kauti kemuni tani mai na vanua ko Ijipita, mai na vale ni veivakabobulataki;

¹⁵ o koya ka kauti kemuni e loma ni vanua liwa ka rerevaki ko ya, sa tiko kina na gata vakabukawaqa kei na batibasaga, kei na vanua sa sega kina na wai; o koya ka kauta mai na memu wai mai na vatu qiwa;

¹⁶ o koya ka vakani iko e na mana e na vanua liwa, na ka era sega ni kila eliu na nomuni qase, me vakamalumalumutaki kemuni kina, ka vakatovolei kemuni, me caka vinaka vei kemuni e na gauna maimuri;

¹⁷ ia de ko ni sa kaya e lomamuni, A noqu qaqa kei na kaukauwa ni ligaqu sa rawata me noqu nai yau oqo.

¹⁸ Ia mo ni nanumi Jiova ga na nomuni Kalou: ni sai koya sa solia vei kemuni na kaukauwa mo ni rawata kina nai yau, me vakataudeitaka ko koya na nona veiyalayalati, sa bubului kina vei ira na nomuni qase, me vaka edaidai.

¹⁹ Ia kevaka ko ni sa guilecavi Jiova na nomuni Kalou e na dua na ka, ka muria na kalou tani, ka qaravi ira, ka cuva vei ira, au sa tukuni kemuni e na siga oqo kemuni na rusa vakaidina.

²⁰ Me vaka na veimatanitu sa vakarusa ko Jiova e matamuni, kemuni na rusa vakakina; ni kemuni sa sega ni vakarorogo ki na domo i Jiova na nomuni Kalou.