Vakarua 7 - Vakavakadewa Makawa

Sa tabu ni ra veiriti kei na veimatanitu tani, de ra vakatevoro kina, 1-5. Ni ra sa vakatabui me nei Jiova, 6-8. A Kalou yalololoma ka dodonu ko Jiova, 9-11. Era na kalougata, ka gumatua vei ira na nodra meca, kevaka era sa talairawarawa, 12-26.

¹ Ni sa vakayacori kemuni ko Jiova na nomuni Kalou ki na vanua ko ni sa lako kina mo ni taukena, ka sa vakaseva tani e matamuni na matanitu e vuqa, na Itaiti, kei na Kakesaiti, kei na Amoraiti, kei na kai Kenani, kei na Perisaiti, kei na Aivaiti, kei na Jepusaiti, na matanitu e vitu sa levu ka kaukauwa, ka lailai ka malumalumu koi kemuni;

² a sa soli ira e matamuni ko Jiova na nomuni Kalou, ka kemuni sa mokuti ira; mo ni qai vakawabokotaki ira sara; mo ni kakua ni veiyalayalati kei ira, se lomani ira:

³ mo ni kakua talega ni veiwatini kei ira; mo ni kakua ni musuka na luvemuni yalewa vua na luvena tagane, se kauta na luvena yalewa me nona na luvemuni tagane.

⁴ Ni ra na vagolea tani na luvemuni me ra kakua ni muri au, ka me ra qarava eso na kalou tani: ena qai waqa mai na cudru i Jiova vei kemuni, ka na vakawabokotaki kemuni vakasauri.

⁵ Ia mo ni kitaka vei ira vakaoqo; mo ni vakacacana na nodra i cabocabo-ni-soro, ka musulaka na nodra matakau, ka taya sobu na nodra veikalou-yalewa ni veikau, ka vakama e na bukawaqa na nodra matakau ceuceu.

⁶ Ni kemuni sa matanitu tabu me nei Jiova na nomuni Kalou: sa digitaki kemuni ko Jiova na nomuni Kalou mo ni sa nona matanitu talei, vei ira kecega na veimatanitu e dela i vuravura.

⁷ Sa sega ni lomani kemuni ko Jiova, se digitaki kemuni, e na vuku ni kemuni sa lewe levu, ka lewe lailai na veimatanitu tani; kemuni a lewe lailai ga vei ira na matanitu kece:

⁸ sa ka ga ni sa lomani kemuni ko Jiova, ka ni sa vakabauta tiko na vosa sa bubului kina ko koya vei ira na nomuni qase, sa kauti kemuni tani kina ko Jiova e na liga kaukauwa, ka sa vakabulai kemuni mai na vale ni veivakabobulataki, ka mai na liga i Fero na tui Ijipita.

⁹ Mo ni kila mada ni sa Kalou ko Jiova na nomuni Kalou, na Kalou dina, sa vakabauta tiko na veiyalayalati, kei na loloma, vei ira era sa lomani koya ka kitaka na nona vunau, ka yacova nai tabatamata e udolu;

¹⁰ a sa sauma votu vei ira era sa cati koya, ni sa vakarusai ira: ena sega ni caka bera vua sa cati koya, ena sauma votu.

¹¹ Ia kemuni na vakabauta kina na vunau, kei nai lesilesi, kei na lewa, ka'u sa vakarota vei kemuni edaidai, mo ni cakava.

¹² Ia ena yaco, kevaka ko ni sa vakarorogo ki na lewa oqo, ka vakabauta, ka cakava, ena qai vakabauta vei kemuni ko Jiova na nomuni Kalou na veiyalayalati, kei na loloma, sa bubului kina vei ira na nomuni qase:

¹³ ia ena lomani kemuni, ka vakalougatataki kemuni, ka vakalewevuqataki kemuni: ena vakalougatataka talega na vua ni ketemuni, kei na vuata ni nomuni vanua, na nomuni sila, kei na nomuni waini, kei na nomuni waiwai, na nomuni luve ni pulumokau, kei na nomuni qele ni sipi, e na vanua sa bubului kina vei ira na nomuni qase me solia vei kemuni.

¹⁴ Kemuni na kalougata vakalevu, ka vakalailai na matanitu kecega: sa na sega na tagane se yalewa sa sega ni vakaluveni vei kemuni, se vei ira na nomuni manumanu e yavai va

¹⁵ Ia ena kauta tani mai vei kemuni ko Jiova na mate kecega, ka na lewa me kakua ni tauvi kemuni e dua na mate ca ko ni a kila mai Ijipita; ia ena lewa me tauvi ira kecega era sa cati kemuni.

¹⁶ Ia ko ni na vakarusai ira kecega na veimatanitu sa solia vei kemuni ko Jiova na nomuni Kalou; me kakua ni lomani ira na matamuni: ia mo ni kakua ni qarava na nodra kalou; de sa kenai cori vei kemuni.

¹⁷ Kevaka ko ni na kaya e lomamuni, Sa levu cake vei au na veimatanitu oqo; au na vakasavi ira tani rawa vakaevei?

¹⁸ Mo ni kakua ni rerevaki ira: mo ni nanuma vinaka na ka sa cakava ko Jiova na nomuni Kalou kivei Fero, kei Ijipita kecega;

¹⁹ na veivakatovolei levu sa kunea na matamuni, kei na veivakatakilakila, kei na veika-mana, kei na liga kaukauwa, kei na liga sa dodo yani, sa kauti kemuni tani kina ko Jiova na nomuni Kalou: ena kitaka vakakina ko Jiova na nomuni Kalou vei ira na matanitu kecega ko ni sa rerevaka.

²⁰ Ia ena vakatala talega ko Jiova na nomuni Kalou e dua na ka rerevaki vei ira, ka me ra vakarusai mada e matamuni ko ira era sa vo ka vunitaki tu.

²¹ Mo ni kakua ni domobula e na vukudra: ni sa tiko vata kei kemuni ko Jiova na nomuni Kalou, na Kalou levu ka rerevaki.

²² Ia ena vakasevi ira tani vakayavica tiko e matamuni na veimatanitu oqori ko Jiova na nomuni Kalou: mo ni kakua ni vakarusai ira vakatotolo sara, de sa tubu tiko me levu mai na manumanu ni vanua ka ra gumatua vei kemuni.

²³ Ia ena soli ira ga vei kemuni ko Jiova na nomuni Kalou, ka vakarusai ira e na veivakarusai levu, ka me ra kawayali.

²⁴ Ia ena soli ira na nodra tui ki na ligamuni, ia kemuni na bokoca na yacadra e ruku i lomalagi: sa na sega na tamata me tu rawa e matamuni, ko ni na vakarusai ira sara ga.

²⁵ A veimatakau ceuceu ni nodra kalou mo ni vakama e na bukawaqa: mo ni kakua ni kocova na siliva se na koula era sa botani kina, se taura me nomuni, de ko ni sa coriti kina: ni sa ka vakasisila oqori vei Jiova na nomuni Kalou.

²⁶ Ia mo ni kakua ni kauta ki na nomuni vale na ka vakasisila, de ko ni sa lesi me vakarusai me vaka na ka ko ya: ia mo cata vakaidina ga, ka vakasisilataka sara; ni sa lesi me vakarusai.